ሂዚቄላ ቲንቢቴ 27 - ጋሞ ማጻፋ

ጺሮሲስ ዚላሌቲዳ ዚላስ

¹ ጎዳ ቃላይ ታኮ ዪዲ፥

² «ሃይሶ ኣሳ ናዉ! ጺሮሲ ጊሻስ ዚላላ።

³ ኣባን ጌሊዛሶ ፔንጌን ዲዛሪሲኔ ዳሮ ኣባ ጋጻታን ዲዛ ዴሬታራ ዛልኢዛ ጺሮሲስ፥ ኡባ ሃሪዛ ጎዳይ፥ «ሃኔ ጺሮሴ! ‹ኔኒ ኔና ኬሂፔ ሎኦ› ጋዳሳ፤

⁴ ኔ ዛዋይ ኣባ ጊዶን ዴስ፤ ኔና ኦዳይቲ ኬሂ ሎኤ ኦዳ።

⁵ ኔ ሳንቃታ ኡባ፥ ሳኒሬፔ ዪዳ ጺዳን ኦዳ፤ ማርካቤ ቱሳቲ ሊባኖሴፔ ዪዳ ዚጋፔ ጊጊዳ።

⁶ ባሳኔፔ ዪዳ ዎላፔ ማርካቤ ላጊዛ ሚሽ ኦዳ፤ ቆጲሮሴ ዛዋፔ ዪዳ ዚጋ ሚ፥ ዳንጋርሳ ዛሌን ኣሌቄሲዲ ኔ ዉይጌዛ ኦዳ።

⁷ ኔ ማርካቤዛ ጺባቤይ ጊብጼ ቢታ ላይኖፔ ኦሴቲዴስ፤ ሄሲ ኔና ባንዲራ ማላ ጎኢዴስ። ሳሎ ሚሳቲዛኔ ኦቻ ቴራ ሚሳቲዛ ኔ ሻራቲ ቆጲሮሴፔ ዪዳ።

⁸ ማርካቤ ሶሎሊሲዛይቲ ሲዶናፔኔ ኣርዋዴፔ ዪዳይታ፤ ሃኔ ጺሮሴ፥ ኔ ማርካቤ ላጊዛይቲ ሎሂዳ ኔ ኣሳታ።

⁹ ጌባሌፔ ሎሂዳ ዳናቲኔ ሂላንቻቲ ኔ ማርካቤታ ኮላናስ ኔ ጊዶን ዴቴስ፤ ኣባ ቦላራ ቢዛ ማርካቤቲኔ ማርካቤ ላጊዛይቲ ኡባይ ሄሬጌቲዲ ኔናራ ዛልኤታናስ ኔኮ ዬቴስ።

¹⁰ «ፓሪሴ፥ ሉዴኔ ፑጼ ኣሳቲ ዎታዳራ ጊዲዲ ኔ ኦላንቻታ ጊዶን ኔና ሃጋዜቴስ፤ ኔስ ቴማ ጊዳና ማላ ባንታ ጎንዳሌኔ ባንታ ቢራታ ቆቤ ኔ ጎዳ ቦላ ካቂዳ።

¹¹ ኣርዋዴኔ ሄሌኬ ኣሳቲ ኔ ጊምቤታ ኡባሶራ ናጌቴስ፤ ጋማዴፔ ዪዳ ኣሳቲ ኔ ጊምቤ ጊዶን ዴቴስ፤ ኢስቲ ባንታ ጎንዳሌ ኔ ጊምቤዛ ዩሾን ካቂዳ፤ ኔ ፑላቴ ኩሜ ኦዳ።

¹² «ኬሂ ዳሮ ጊዲዳ ኔ ዱሬቴ ጋሶን ታርሴሴይ ኔናራ ዛልኤን ጋይታዱስ፤ ኢዛ ቢራኔ ቢራታ፥ ቆርቆሮኔ ኢርሳሴ ኤሃዳ ኔ ሻቃጬታ ላሜ ኤካዉስ።

¹³ «ያዋኔይ፥ ቱባሌይኔ ሜሼኬይ ኔናራ ኢሲፌ ዛልኤቴስ፤ ኣይሌታኔ ጻርቂማላፔ ኦሴቲዳ ሚሻታ ሻቃጬራ ላሜቴስ።

¹⁴ «ቤቲ-ቶጋርማ ኣሳቲ ጫና ፓራታ፥ ኦላ ፓራታኔ ባቁሎታ ሻቃጬን ላሜቴስ።

¹⁵ «ኤሮዶሴ ኣሳቲ ዛልኤን ኔናራ ጋይቲዳ፤ ዳሮ ሃሩሮ ዴሬቲ ኔ ሻቃጬታ ዳንጋርሳ ዛሌኒኔ ዞጴ ጌቴቲዛ ሚን ላሜቴስ።

¹⁶ «ኬሂ ዳሮ ጊዲዳ ኔ ኣቆታ ጋሶን ኣራሜይ ኔናራ ዛልኤን ጋይታዱስ፤ ኔ ሻቃጬካ ቤሉሬን፥ ኦቻ ቴራ ሚሳቲዛ ጫርቃን፥ ጺባቤን፥ ሎኦ ላይኖን፥ ሄሌሎኒኔ ዞኦ ኢንቁን ላሜቴስ።

¹⁷ «ዩሁዳይኔ ኢስራኤሌይካ ኣቶንታ ኔናራ ዛልኤን ጋይቲዳ፤ ኢስቲ ሚኒቴፔ ዪዳ ጊስቴ፥ ማሊዶ፥ ኤስ፥ ዛይቴኔ ባላሳኔ ጌቴቲዛ ሊዛ ዛይቴ ኔ ሻቃጬዛራ ላሜቴስ።

¹⁸ «ኔ ዳሮ ዱሬቴኔ ኢሻሎ ዱሳ ጋሶን ዳማስቆ ኣሳቲ ሄልቦኔ ዎይኔ ኡሺኔ ዛሃሬ ዴሬ ዶርሳ ኢስኬ ሺሺዲ ኔናራ ዛልኤቲዳ።

¹⁹ «ኦዜሌን ዲዛ ዳኔይኔ ጊርኬ ኣሳይ ኔ ዱማ ዱማ ሚሻ ሻሚዳ፤ ኢስቲ ኔ ሚሻራ ላማናስ ኣሌቄቲዳ ቢራታ፥ ዱማ ዱማ ሳዎታኔ ቃራፋ ኤሂዳ።

²⁰ «ዳዳኔይ ኔ ሻቃጬ ጊላሴራ ላማዉስ።

²¹ «ኣራቢያ ሃላቃቲኔ ቄዳሬ ሃላቃቲ ኡባይ ኔ ላጌታ፤ ኢስቲ ላቃ፥ ርሾኔ ዴይሼ ኤሂዲ ኔናራ ዛልኤቴስ።

²² «ሳባ ዛልኣንቻቲኔ ኤራኢሜ ዛልኣንቻቲ ኔናራ ዛልኤቴቴስ፤ ዶሬቲዳ ቂማሜ ኡባ፥ ኣልኦ ሹቺኔ ዎርቃ ሺሺዲ ሻቃጬን ኔናራ ዛልኤቴቴስ።

²³ «ካራኔ፥ ካኔ፥ ኤዴኔ፥ ሳባ፥ ኣሶሬኔ ኪልማዴ ዛልኣንቻቲ ኔናራ ዛልኤቴቴስ።

²⁴ ሄይቲካ ኔ ጊያ ጊዶን ሎኦ ማይኦ፥ ሳሎ ሚሳቲዛ ካባ፥ ጺባቤ፥ ሄሳካ ቢራታ ቃላሜን ጶሊዛኔ ሚኒ ዳዴቲዳ ሲጋጃ ኤሂዲ ኔናራ ዛልኤቴቴስ።

²⁵ «ታርሴሴ ማርካቤቲ ኔ ሻቃጬ ጫኒ ጫኒ ኤፊዳ፤ ኔኒ ኣባ ጊዶን ዴጾ ጫና ጫኔታዳ ዳሳ።

²⁶ ማርካቤ ሶሎሊሲዛይቲ ጪማ ኣባ ጊዶን ኔና ኤፊዳ፤ ጊዶ ኣቲን ኣርሼይ ሞኪዛ ባጋ ጫርኮይ ኣባ ጊዶን ኔና ሜንሬዴስ።

²⁷ ማርካቤ ዳፋይ ኔ ቦላ ጋኪዛ ጋላስ ኔ ኣቆታይ፥ ኔ ሻቃጬይኔ ኔ ዛልኤ ሚሻይ፥ ኔ ማርካቤዛ ሶሎሊሲዛይቲ፥ ማርካቤዛን ቢዛይቲኔ ማርካቤ ኦሳንቻቲ፥ ኔ ዛልኣንቻቲኔ ኔ ዎታዳራቲ ኡባይ፥ ማርካቤዛን ዲዛይቲ ኡባይ፥ ዱጌ ጪማ ኣባን ሚቴታና።

²⁸ ኔ ማርካቤ ሶሎሊሲዛይቲ ዋሲሺን፥ ኣባ ጋጻን ዲዛይቲ ያርኪያርኬቴስ።

²⁹ ማርካቤ ሶሎሊሲዛይቲ ኡባይ ባንታ ማርካቤታ ኦሊ ባና፤ ማርካቤ ሶሎሊሲዛይቲኔ ማርካቤን ዲዛይቲ ኡባይ ዎዲ ኣባ ጋጻን ኤቃና።

³⁰ ባንታ ቃላ ቁ ሂስቲዲ ጫሞ ዬሆ ኔስ ዬካና፤ ባንታ ሁኤን ጉዱላ ቆሊዲ ቢዲን ቦላ ቡሉሌታና።

³¹ ኔ ጊሻስ ካዮቲዲ ባንታ ሁኤ ቡሉሳና፤ ማቃካ ማይኣና፤ ዎዚናፔ ጬጪዲ ጫሞ ዬሆ ኔስ ዬካና።

³² ኔ ጊሻስ ኢስቲ ዋሲሼ ዬካና፤ ኢስቲ ኔስ ዚላሊሼ፥ ‹ኣባን ሚቴቲ ጮኡ ጊዳይ፥ ጺሮሴ ማላይ ኦኔ?› ጋና።

³³ ኔ ሻቃጬይ ኣባፌ ፒኒ ኬዚዳ ዎዴ፥ ዳሮ ዴሬታ ካልሳሳ፤ ኔኒ ኔ ጊታ ኣቆታኒኔ ኔ ሻቃጬዛን ቢታን ዲዛ ካዎቴታ ዱሬሳዳሳ።

³⁴ ሃኢ ጊዲኮ ጪማ ሃን ኣባ ጊዶን ሜቄሬታ ኩንዳዳሳ፤ ኔ ጫናይኔ ጫኔቲዳ ኣሳይ ኡባይ ኔናራ ኣባን ሚቴቲዳ።

³⁵ ኣባ ጋጻን ዴኢዛ ኣሳይ ኡባይ ኔ ቦላ ጋኪዳይሳ ቤኢዲ ዳጋሚዳ። ኢስታ ካዎቲካ ሂርጋን ኮኮሪዳ፤ ኢስታ ኣይፌሶይ ላሜቲዴስ።

³⁶ ሃራ ካዎቴታ ጊዶን ዲዛ ዛልኣንቻቲ ኔ ቦላ ኣይ ኬና ዋይቂዶ! ኔ ዉርሴይ ዳጋንዛዝ ጊዲዴስ፤ ኔ ሜርናስ ቤታካ» ጊዴስ።