ሂዚቄላ ቲንቢቴ 24 - ጋሞ ማጻፋ

ዲስቴ ሌሚሶ

¹ ኑኒ ዲኤቲዳ ኡዱፉን ላይን፥ ታማን ኣጊናን፥ ታማን ጋላሳን ጎዳ ቃላይ ታኮ ዪዲ፥

² «ሃይሶ ኣሳ ናዉ! ሃች ሃኖ ጋላሳዮ ዱማ ማዝጋባ፤ ባቢሎኔ ካዎይ ዬሩሳላሜ ሃ ጋላሳይን ዶዲ ኦይኪዴስ።

³ ሃ ማካላንቻ ኬስ ሃይሳፌ ካሊ ዲዛ ሌሚሶዛ ዮታ፤ ኡባ ሃሪዛ ጎዳይ፥ « ‹ቢራታ ዲስቴ ታማ ቦላ ዎ፤ ሄሳፌ ጉዬ ኢዛን ሃ ጉጃ።

⁴ ጌዳፔኔ ሚሳፌ ቃንጻዳ፥ ሎኦ ሎኦ ኣሾ ሙጻዳ፥ ዶሬቲዳ ሜቄታ ጩኬሬዳ ኢዛን ዬጋ።

⁵ ዉዴዛፔ ሞ ዶርስ ኤካ ሹካ፤ ኢዛ ሜቄ ዶይሳናስ ኤሶ ሚ ዳርሳ ዎ፤ ሱ ጋናሼ ጋካናስ ዶይሳ፤ ሜቄዚካ ካጾ› ጌስ።

⁶ «ኡባ ሃሪዛ ጎዳይ፥ ‹ሺኢዳ ቢራታ ዲስቴይስ፥ ኢዚ ሺኢ ዬዶንታሪስ፥ ሱ ጉሲዳ ካታማይስ ኣዬ ኣና! ሻካናስ ሳማ ዬጎንታ ኢሳ ኢሳ ኬሳዳ ካይስ ኣሻ።

⁷ ኢዚ ጊዶን ኣሳ ሱ ዴስ፤ ዛላ ቦላ ቆንጬሶን ጉሳዱስ ኣቲን ቢታይ ካማናስ ዳንዳይዛ ጋዴን ጉሳቤኩ።

⁸ ታ ሃንቆይ ኤጻና ማላኔ ሃሎ ኬሳናስ ታስ ኢንጄታና ማላ፥ ኢዚ ካማናስ ዳንዳዮንታ ማላ፥ ኢዚ ሱ ዛላ ቦላ ቆንጬሶን ጉሳዲስ› ጌስ።

⁹ «ሄሳ ጊሻስ ኡባ ሃሪዛ ጎዳይ፥ ‹ሱ ጉሲዳ ካታማይስ ኣዬ ኣና! ታኒ ኢዛ ጹጌታና ሚ ጉፓና።

¹⁰ ኤሶ ሚ ዶራ፤ ታማካ ኤ። ሳዎ ጉጃዳ ኣሾዛ ሎኤ ዶይሳ፤ ሜቄዚካ ሚጮ።

¹¹ ሺኣዚ ሴራና ማላኔ ቢራታ ሺኣዚ ታማን ጹጌታና ማላ፥ ሜላ ዲስቴይ ሴላና ጋካናስ፥ ታማዚ ቦንቃናሼ ጋካናስ ጮጬዛ ቦላ ዎ።

¹² ዳሮ ዎልቃይ ዉሪኮካ ዶሬቲዳ ቢራታ ሺኢ ታማንካ ዬዳና ዳንዳዬና።

¹³ « ‹ኔ ቱኒዳይ ኔ ባላጌ ኦሶና፤ ታ ሃንቆይ ኔ ቦላ ፖሌታናሼ ጋካናስ ሃይሳፌ ጉዬ ኔ ጌሽ ጊዳካ፤ ጋሶይካ ታኒ ኔና ኔ ቱናቴፌ ጌሻና ኮዪንካ ኔ ጌያና ዶሳቤካ።

¹⁴ « ‹ታኒ ጎዳይ ሃይሳ ዮታዲስ፤ ታ ኦናስ ዎዴይ ጋኪዴስ፤ ታ ጉዬ ጊኬ፤ ቃቲኬኔ ሲኬ፤ ኔ ኦጌ ማላኔ ኔ ኦሶ ማላ ኔ ቦላ ፒርዴታና› ጌስ» ጊዴስ።

ሂዚቄላ ማቼይ ሃይቆ

¹⁵ ጎዳ ቃላይ ታኮ ዪዲ፥

¹⁶ «ሃይሶ ኣሳ ናዉ! ኔኒ ኔ ኣይፌ ሼምፒሲዛ ሚሽ ታኒ ታ ሃንቆን ኔፔ ኤካ ዲጋና፤ ኔኒ ጊዲኮ ዋሶፋ፤ ዬኮፋ፤ ኣፉንካ ጉሶፋ።

¹⁷ ኔ ቃላ ዚቂ ሂስታዳ ካዮታሼ ሚላላ ኣቲን ሃይቂዳይሳስ ዬኮፋ፤ ኔ ሁኤፔ ቁራጬ ዲጎፋ፤ ኔ ቶሆፔ ጫማ ኬሶፋ፤ ኔ ዶና ጋ ካሞፋ፤ ሾቺካ ሞፓ» ጊዴስ።

¹⁸ ታኒካ ዎንታራ ዴራስ ሄሳ ዮታዲስ፤ ሄ ጋላሳ ኦማርሳ ዎዴ ታ ኬ ኣዬያ ሃይቃዱስ፤ ዎንቴ ጋላስ ማላዶ ጎዳይ ታና ኣዛዚዳ ማላ ኦዲስ።

¹⁹ ዴሬዚ ታና፥ «ኑስ ኣይ ኪታ ዮታና ኮያዳ ኔ ሃይሳ ኦዳኮ ኑስ ዮቲኪ?» ጊ ኦይቺዴስ።

²⁰ ታኒካ ዴራስ ዛራዳ፥ «ጎዳ ቃላይ ታኮ ዪዲ፥

²¹ ኢስራኤሌ ኬስ ኡባ ሃሪዛ ጎዳይ፥ ‹ኢንቴ ጬቄቲዛ ዎልቃ፥ ኢንቴ ኣይፌ ሼምፒሲዛሶዛኔ ኢንቴ ዎዚናስ ኡፋይስ ጊዲዳ ጾሳ ኬ ታይሳ ታ ቱኒሳና። ኢንቴ ዬጊ ቢዳ ኢንቴ ማጫ ናይቲኔ ኣቱማ ናይቲ ማሻን ዉራና።

²² ታ ኦዳ ማላ ሄ ዎዴ ኢንቴካ ኦና፤ ኢንቴ ዶና ጋ ካሜኬታ፤ ሾቺካ ሜኬታ።

²³ ኢንቴ ሁኤፔ ቁራጬ ዲጌኬታ፤ ኢንቴ ቶሆፔ ጫማ ኬሴኬታ፤ ኢንቴ ኢንቴ ናጋራን ጊልቃና፤ ኢሶይ ኢሳራ ቶኪ ሼምፓና ኣቲን ካዮስ ኡቴኬታኔ ዬኬኬታ።

²⁴ ሄ ዎዴን ሂዚቄሊ ኢንቴስ ማላታ ጊዳና፤ ኢዚ ኦዳ ማላ ኢንቴካ ኦና› ጊዴስ። ኡባ ሃሪዛ ጎዳይ ታና ጊዲዳይሳ ሃይሲ ሃኒዛ ዎዴ ኢንቴ ኤራና» ጌስ።

²⁵ ጎዳይ ታና፥ «ሃይሶ ኣሳ ናዉ! ባንታ ዎልቃ፥ ባንታ ኡፋይሳ፥ ባንታ ቦንቾ፥ ኢስታ ኣይፌስ ሼምፖሶኔ ኢስታ ዎዚናስ ኡፋይስ ጊዲዳ ኢስታ ማጫ ናይታኔ ኣቱማ ናይታ ጋ ታ ኢስታፌ ኤኪዛ ዎዴ፥

²⁶ ሄ ጋላስ ኬሲ ኤኪ ኣቲዳ ኣሲ ሄ ፓፑን ዮታናስ ኔኮ ያና።

²⁷ ሄ ጋላስ ኔ ዶናይ ዶዬታና፤ ኔኒካ ኢዛራ ሃሳያና፤ ሄሳፌ ጉዬ ኔ ዶና ዱዴ ጊዳካ፤ ኔ ኢስታስ ማላታ ጊዳና፤ ታኒ ጎዳ ጊዲዳይሳ ኢስቲ ሄ ዎዴ ኤራና» ጊዴስ።