ሂዚቄላ ቲንቢቴ 2 - ጋሞ ማጻፋ

ናቤቴስ ሂዚቄላ ጼይጌቴ

¹ ኢዚ ታና፥ «ሃይሶ ኣሳ ናዉ! ዴንዳ ኔ ቶሆን ኤቃ፤ ታኒ ኔስ ዮታና» ጊዴስ።

² ኢዚ ታስ ዮቲሺን ጾሳ ኣያናይ ታ ጊዶ ጌሊዲ ታና ታ ቶሆን ኤሲዴስ። ኢዚ ታስ ዮቲዛይሳካ ሲያዲስ።

³ ኢዚካ ታስ፥ «ሃይሶ ኣሳ ናዉ! ታ ቦላ ማካሊዳ ማካላንቻ ዴሬ ኢስራኤሌ ኣሳኮ ታ ኔና ኪታይስ፤ ኢስቲኔ ኢስታ ኣዋቲ ሃች ጋካናስካ ታ ቦላ ማካሊዳ።

⁴ ኢስቲ ዬላይ ባይንዳይታኔ ዎዚና ሙሜታ ጊዲዳ ጊሻስ ታኒ ኔና ኢስታኮ ኪታይስ። ኔ ባዳ ኢስታስ፥ ‹ኡባ ሃሪዛ ጎዳይ ዮቲዴስ› ጋ ዮታ፤

⁵ ኢስቲ ማካላንቻ ኬ ጊዲዳ ጊሻስ ኢስቲ ሲዪኮካ ሲዮንታ ኢጺኮካ ኢስታ ጊዶን ናቤይ ዲዛይሳ ኢስቲ ኤራና።

⁶ ሃይሶ ኣሳ ናዉ! ኢስታስ ዎይኮ ኢስታ ቃላስ ባቦፋ! ኣጉንኔ ኪንዲቾይ ኔ ዩሾን ዲኮካ ቃሴ ማሲማሶታ ጊዶን ኔ ኡቲኮካ ባቦፋ። ኢስቲ ማካላንቻ ዛሬ ጊዲኮካ ኢስቲ ኔና ጊዛይሳስ ባቦፋ፤ ኢስታስ ዳጋሞፋ።

⁷ ኢስቲ ማካላንቻ ዛሬ ጊዲዳ ጊሻስ ኢስቲ ሲዪኮካ ሲዮንታ ኢጺኮካ ታ ቃላ ኢስታስ ዮታ።

⁸ ኔኒ ጊዲኮ ሃይሶ ኣሳ ናዉ! ታ ኔስ ዮቲዛይሳ ሲያ! ሄ ማካላንቻ ዛሬታ ማላ ማካሎፋ፤ ኔ ዶና ዶያዳ ታኒ ኔስ ኢሚዛይሳ ማ» ጊዴስ።

⁹ ሄሳፌ ጉዬ ታኒ ጼሊሺን ኢሲ ኩሼይ ታኮ ሚጬቲዳይሳ ሄራካ ቤኣዲስ፤ ሄ ኩሼዛን ጻ ማጻፋይ ዴስ።

¹⁰ ኢዚ ታ ሲንን ሄ ጻ ማጻፋ ቢርሺዴስ፤ ሄ ጻ ማጻፋን ጊዶ ባጋራኔ ካሬ ባጋራ ዚላሲ፥ ዬሆይኔ ዋሶ ቃላይ ጻፌቲ ኡቲዴስ።