ሂዚቄላ ቲንቢቴ 19 - ጋሞ ማጻፋ

ኢስራኤሌ ዳናታ ጊሻስ ዚላሌቲዳ ዚላስ

¹ ጎዳይ፥ «ኢስራኤሌ ዳናታ ጊሻስ ዚላስ ዚላላና ማላ ታስ ዮቲዴስ፤

² ኢዚካ ታስ፥ « ‹ኔ ኣያ ካሴ ጋሞታ ጊዶን ኣይ ማላ ጋሞ! ዎዳላ ጋሞታ ጊዶን ኢቻዱስ፤ ባ ማራታካ ሄን ዲቻዱስ።

³ ባ ማራታፔ ኢሳ ኢዛ ዲቺን፥ ኢዚ ሚኖ ጋሞ ጊዲዴስ፤ ኢዚ ሻንካቴ ታማርዲ ኣስ ሚዴስ።

⁴ ካዎቴቲ ኡባይ ኢዛ ሃኖ ሲዪዳ፤ ኢስቲ ቦኪዳ ኦላን ጌሊዲ ኦይኬቲዴስ፤ ኢስቲካ ኢዛ ሲን ዳፎ ኣ ጎቺዲ ጊብጼ ቢታ ኤፊዳ።

⁵ « ‹ኢዛ ሂዶታ ኦዳይሲ ጫልቃሚዳይሳ፥ ኢዛ ናጊዳይሲ ፖሌቶንታይሳ ቤኢዳ ዎዴ፥ ባ ማራታ ጊዶፌ ናምኣንዛ ዲቻዳ፥ ሚኖ ጋሞ ኬሳዱስ።

⁶ ኢዚ ጋሞታ ጊዶን ኖቹ ጊዴስ፤ ሚኒ ሚኒካ ቢዴስ፤ ዎ ሙስ ኤሪዲ ኣሳካ ሚዴስ።

⁷ ኢዚ ኢስታ ሚጻ ሜንሬዴስ፤ ኢስታ ካታማታካ ካይዚሲዴስ፤ ቢታይኔ ቢታን ዲዛ ኣሳይ ኡባይ ኢዛ ጻጎፔ ዴንዲዳይሳን ኮኮሪዳ።

⁸ ኢዛ ዩሾን ዲዛ ካዎቴቲ ኡባይ ኢዛ ቦላ ዴንዲዳ፤ ባንታ ዴሬ ኡባፌ ኢዛ ቦላ ሺቂዳ፤ ባንታ ጊቴ ኢዛ ኦይካና ዬጊዳ፤ ኢዚ ኢስታ ኦላን ጌሊዲ ኦይኬቲዴስ።

⁹ ሲን ዳፎ ዬጊዲ ኮ ጊዶን ጌልዳ፤ ባቢሎኔ ካዎኮ ኤፊዳ፤ ናምኣን ኢዛ ጬንጉርሲ ኢስራኤሌ ዙማታ ቦላ ሴቴቶንታ ማላ፥ ኢስቲ ኢዛ ቃሾ ኬ ጌልዳ።

¹⁰ « ‹ኔ ኣያ ሃ ዶናን ቶኬቲዳ ዎይኔ ቱራ ማላ፤ ጎሻ ጋዴን ዳሮ ሃ ዲዛ ጊሻስ፥ ዳዪዳ ኣይፊዳ ዎይኔ ቱራ ሚሳታዱስ።

¹¹ ኢዚ ሃጋቲ ካዎቴስ ቤሲዛ ሚኖ ጉፌታ። ጪፒ ጊዳ ሃይታ ጊዶን፥ ባ ኣዱሳቴኒኔ ባ ጮራ ሃጋታን ሎኣ ቤታዱስ።

¹² ጊዶ ኣቲን ሃንቆን ቃሌታዱስ፤ ዱጌ ቢታን ኦሌታዱስ፤ ኣርሼይ ሞኪዛ ባጋ ጫርኮይ ኢዞ ሜሊሲዴስ፤ ኢዛ ኣይፊዳ ኣይፌዛ ቆቆፊዴስ፤ ሚኖ ኢዚ ሃጋቲ ዳጋሚዳ፤ ታማይካ ኢስታ ሚዴስ።

¹³ ሃኢ ሃ ሳሜቲዳ ሜላ ቢታን ባዞን ቶኬታዱስ።

¹⁴ ኢዚስ ዎጋ ሃጋታ ኢሳፌ ታማይ ኬዚዴስ፤ ኢዛ ኣይፊዳ ኣይፌዛ ሚዴስ፤ ካዎቴስ ጊዲዛ ኢሲ ሚኖ ሃጋይካ ኣቲቤና፤ ሃይሲ ዚላሳ፤ ጬጬ ጋላስ ሚላሳስ ጊዳና› ጋ» ጊዴስ።