ኤራንቻታ ማጻፋ 9 - ጋሞ ማጻፋ

ኡባስ ዲዛ ዉርሴ ቃዳ

¹ ሄሳ ጊሻስ ሃ ኡባ ዮኦታ ታ ዎዚናን ቆፓዳ ኣ ኤራንቻቲኔ ጺሎቲ ኦዛ ኦሶይ ጾሳ ኩሼና፤ ጊዶ ኣቲን ኣሲ ሲንፌ ባና ናጊዛይሲ ሲቆ ጊዲን ዎይኮ ኢጾ ጊዲን ኤሬና።

² ጺሎታ ዎይኮ ናጋራንቻታ ጊዲን፥ ሱሬታ ዎይኮ ኢታታ ጊዲን፥ ጌሻታ ዎይኮ ቱናታ ጊዲን፥ ያርሾ ሺሺዛይታ ዎይኮ ያርሾ ሺሾንታይታ ጊዲን ኡባታሲካ ዉርሴ ቃዳይ ኢሲኖ። ሎኦ ኣሳስ ሃኒዛይሳ ማላ ናጋራንቻስካ ሃኔስ፤ ጫቂዛይሳስ ሃኒዛይሳ ማላካ ጫቆስ ባቢዛይታስ ሃኔስ።

³ ሳሎ ጉፋንን ኡባ ቦላ ጋኪዛ ኢታቴ ሃይሳ፤ ኡባስ ዉርሴ ቃዳይ ኢሲኖ፤ ሄሳፌ ቦላራካ ኣሳ ዎዚናይ ኢታቴን ኩሚዴሲኔ ጎዪዴስ፤ ዉርሴንካ ሃይቂዳ ኣሳን ጋይቴስ።

⁴ ሃይቂዳ ጋሞፌ ፓጻ ዲዛ ካናይ ኪያ፤ ሄሳካ ሼምፖራ ፓጻ ዲዛይታ ጊዶን ዲዛ ኣሳስ ሂዶታይ ዴስ።

⁵ ሼምፖራ ፓጻ ዲዛ ኣሲ ባ ሃይቃናይሳ ኤሬስ፤ ጊዶ ኣቲን ሃይቂዳይቲ ኣይኮካ ኤሬቴና፤ ኢስታ ቆፍሲዛ ሚሺ ኡባይ ዶጌቴስ፤ ኢስቲ ጎኤታና ሚሺካ ዴና።

⁶ ኢስታ ሲቆይ፥ ኢጾይኔ ቃናቴይ ኡባይ ኢስታራ ኢሲፌ ይዴስ። ሄሳ ጊሻስ ሳሎ ጉፋንን ሃኒዛ ሚሽ ኡባን ኣይኮ ቃዳይካ ኢስታስ ዴና።

⁷ ባዳ ኔ ካ ኡፋይሳን ማ፤ ኔ ዎይኔ ኡሻካ ኔ ዎዚናይ ኡፋዬቲሺን ኡያ፤ ኣይስ ጊኮ ጾሲ ኔ ኦዳ ኦሶን ኡፋዬቴስ።

⁸ ኡባ ዎዴ ኔ ማይኦይ ቦ ጊዶ፤ ኔ ሁኤይካ ዛይቴን ቲዬቶ።

⁹ ሳሎ ጉፋንን ጾሲ ኔስ ኢሚዳ ጉ ጊዲዳ ኔ ዴኦ ላይታ ኡባን ኔ ሲቂዛ ኔ ማቼይራ ኡፋይሳን ዴኣ፤ ኣይስ ጊኮ ሳሎ ጉፋንን ኔ ዴኦኒኔ ኔ ዳቡርዳ ዳቡራ ኡባን ሃይሲ ኔስ ቃዳ።

¹⁰ ኔ ኩሼይ ኦናስ ዴሚዳይሳ ኡባ ኔ ኩሜ ዎልቃን ኦ፤ ኣይስ ጊኮ ኔኒ ባና ዱፎን ኦሶይ፥ ሃልቾይ፥ ኤራቴኔ ኣ ኤራቴ ዴና።

¹¹ ታኒ ሳሎ ጉፋንን ሃራ ሚሽ ቤኣዲስ፤ ዎን ጾኖይ ፒላታታስ ኦላን ጾኖይ ዎልቃማታስ ጊዴና፤ ካ ኣ ኤራንቻታስ፥ ዱሬቴ ኪጳታንቻታስ፥ ሳባይ ኤራንቻታስ ጊዴና፤ ጊዶ ኣቲን ኡባቲካ ዎዴይኔ ቃዳይ ጋዳ ማላ ሃኔቴስ።

¹² ቃሴካ ባ ዎዴ ኤሪዛ ኣሲ ዴና፤ ካፎይ ያርዴን ጌሊዛ ማላ፥ ሞሌይ ጊቴን ኦይኬቲዛ ማላ፥ ኣሲካ ቆፖንታ ዲሺን ዪዛ ኢታ ዎዴታን ኦይኬቴስ።

ኣ ኤራቴኔ ኤያቴ

¹³ ሄሳካ ታና ኬሂ ማላሊሲዳ ሃይሳ ኣ ሌሚሶ ሳሎ ጉፋንን ቤኣዲስ።

¹⁴ ሄሲካ ኢሲ ቢታን ኣማርዳ ኣሳቲ ዴኢዛ ቄሪ ካታማይ ዳዉስ፤ ሄ ካታማዮ ኦላናስ ኢሲ ዎልቃማ ካዎይ ዎራጂ ዶዲዴስ፤ ኢዚ ዩሾን ሚጻ ጊግሲዴስ።

¹⁵ ሄ ካታማይን ኣ ኤራንቻ ጊዲዳ ኢሲ ማንቆ ኣሲ ዴስ፤ ኢዚ ባ ኣ ኤራቴን ሄ ካታማዮ ኣሺዴስ። ጊዶ ኣቲን ሄ ማንቆዛስ ኦኒካ ቆፒቤና።

¹⁶ ሄሳ ጊሻስ ታኒ፥ «ኣ ኤራቴ ዎልቃፌ ኣስ» ጋዲስ። ጊዲኮካ ሄ ማንቆዛስ ዲዛ ኣ ኤራቴዚ ካቲዴስ፤ ኢዛ ቃላይካ ሲዬቲቤና።

¹⁷ ኤያታ ኣይሲዛ ዳና ዋሶፔ ኣ ኤራንቻይ ሊቆን ሃሳይዛ ቃላይ ሴቴቴስ።

¹⁸ ኣ ኤራቴ ኦላ ሚሻፌ ኣስ፤ ጊዶ ኣቲን ኢሲ ናጋራንቻይ ዳሮ ሎኦ ሚሽ ይሴስ።