ኤራንቻታ ማጻፋ 6 - ጋሞ ማጻፋ

¹ ሳሎ ጉፋንን ሃራ ኢታ ሚሽ ታኒ ቤኣዲስ፤ ሄሲካ ኣሳስ ኬሂ ዴጾ።

² ኣሲ ባ ዎዚናን ኣሞቲዳ ሚሽ ዴማና ማላ ጾሲ ኣሳስ ኣቆታ፥ ዱሬቴኔ ቦንቾ ኢሜስ፤ ጊዶ ኣቲን ኬዋይ ኢስታን ኡፋዬታና ማላ ኩሜ ማታ ኢዛስ ኢሜና፤ ኢዚ ዳቡሪ ዴሚዳይሳን ሃራይ ኡፋዬቴስ፤ ሄሲካ ሃዳኔ ኬሂ ኢታ ሚሻ።

³ ኢሲ ኣሲ ጼቱ ናይታ ጋካናስ ዬሊ ጪሚዲ ኣዱሳ ላይ ዴኣናዉ ዳንዳዬስ፤ ጊዶ ኣቲን ኢዚ ባ ኣቆታን ኡፋዬቶንታ ኣጊኮኔ ሃይቂዲ ዎጋራ ሞጌቶንታ ኣጊኮ ኢዛፔ ኣዉጫያይ ኪያ።

⁴ ጋሶይካ ጮ ሃዳ ዪዲ ማን ቤስ፤ ኢዛ ሱንካ ማን ካሜቲዴስ።

⁵ ኢዚ ኤሮንታኔ ፖኦ ቤኦንታ ኣጊኮካ ሄ ኣዴዛፔ ኢዛስ ኣ ዎፓይ ዴስ።

⁶ ኡፋይሲ ባይንዳ ዲሺን ናምኡ ሺ ላይ ዴኢኮካ ኢዛስ ኣዛ ጎኣይ ዲዜ? ዉርሴን ናምኣይካ ኢሲ ሶሆ ባና ዴቴኔ?

⁷ ኣሲ ዳቡርዲ ኦዛ ኡባይ ኡሎሳ፤ ጊዶ ኣቲን ኢዛ ኣሞይ ሙሌካ ካሊ ኤሬና።

⁸ ሂስቲን ኣ ኤራንቻይ ኤያፔ ኣዛን ኣዜ? ማንቆይ ሃራታ ሲንን ዋኒ ሲሜሬታናኮ ኤሮይ ኢዛ ኣይ ማዲዜ?

⁹ ኣሞን ቶይላታናፔ ኣይፌን ቤኦይ ኪያ፤ ሄሲካ ሃዳኔ ጫርኮ ኦይካናስ ዬዴዛ ማላ

¹⁰ ሃኢ ዲዛ ኡባስ ካሴቲ ሱን ኢሜቲ ኡቲዴስ፤ ኣሲ ሃናናዚ ኤሬቲ ኡቲዴስ፤ ኣሲ ባፔ ሚኒዛይሳራ ባጼቴና።

¹¹ ሃሳያይ ዳሪሺን ሃዳ ዮኦይ ዳሬስ፤ ሂስቲን ሄሲ ኣስ ኣይ ጎኣኔ?

¹² ሃዳኔ ኤሾ ማላ ኤሌ ኣዛ ጉ ላይታን ኣሳስ ሎኦ ሚሺ ሃናናይሳ ኤሪዛይ ኦኔ? ቃሴካ ኢዚ ሃይቂዳፔ ጉዬ ሳሎ ጉፋንን ሃኒዛ ሚሽ ኢዛስ ዮታና ዳንዳይዛይ ኦኔ?