ኤራንቻታ ማጻፋ 4 - ጋሞ ማጻፋ

ቆሆ፥ ዳፌቴ፥ ቢዛቴ

¹ ታኒ ቃሴካ ሳሎ ጉፋንን ዲዛ ቆሆ ኡባ ቤኣዲሲኔ ኣኬካዲስ፤ ቆሄቲዳይታ ኣፉን ቤኣዲስ፤ ኢስታ ሚንዛ ኣሲካ ዴና፤ ዎልቃይ ኢስታ ቆሂዛ ኣሳታ ኩሼን ዴስ፤ ኢስታ ሚንዛ ኣሲካ ዴና።

² ሄሳ ጊሻስ ታኒ፥ «ሃኢ ሼምፖራ ፓጻ ዲዛይታፔ ካሴ ሃይቂዳይቲ ኪያ» ጋዲስ።

³ ጊዶ ኣቲን ሃ ናምኣታፔካ ቦላራ ሙሌካ ዬሌቶንታይታ ቃዳይ ሎኦ፤ ጋሶይካ ኢስቲ ሳሎ ጉፋንን ኦሴቲዛ ቆሆዛ ሙሌካ ቤኢቤቴና።

⁴ ሄሳካ ኣሳይ ባ ኣሞቲዳይሳ ዴማናስ ኬሂ ዳቡርዲ ኦስ፤ ጊዶ ኣቲን ሄ ዳቡራይ ባ ላጌ ቦላ ቃናቴቴን ዴንዶን ጊዲዳይሳ ታኒ ኣኬካዲስ። ሄሲካ ሃዳ፤ ጫርኮ ኦይካናስ ዬዴዛ ማላ።

⁵ ኣዛላይ ባ ኩሼ ኢዲሚ ኡቴስ፤ ባርካ ባና ዎስ።

⁶ ጮ ዳቡራኒኔ ጫርኮ ካሎን ናምኡ ኩሼ ዴማናፔ ዎፓን ቤቲዛ ኢሲ ኩጳይ ኪዬስ።

⁷ ቃሴካ ታኒ ሳሎ ጉፋንን ዲዛ ሚሺ ሃዳ ጊዲዳይሳ ቤኣዲስ።

⁸ ዬሎይ ዎይኮ ኢሻይ ባይንዳ ቢዛ ኣሲ ዴስ፤ ኢዛ ዳፌቴስ ዛዋይ ዴና፤ ኢዛ ኣይፌይ ኢዛስ ዲዛ ኣቆታ ካሊቤና፤ ኢዚካ፥ «ታኒ ሃይሳ ኦሲ ዳቡራዚና? ታኒ ታ ሁኤ ኡፋይሳናይሳ ኣይስ ኡዜታዚና?» ጊዴስ። ሄሲካ ሃዳኔ ቱጋ ዴኦ።

⁹ ኢስታ ኦሶይ ሎኦ ኣይፌ ኢማናስ ዳንዳይዛ ጊሻስ ኢሲኖ ጊዳናፔ ናምኡ ጊዴ ሎኦ።

¹⁰ ቃሴ ናምኣፌ ኢሶይ ኩንዲኮ ኢሶይ ዴንስ፤ ጊዶ ኣቲን ኩንዲኮ ዴንዛ ላጌይ ባይንዳዴይ ኣይ ማላ ቃዜ!

¹¹ ናምኣይ ኢሲፌ ኢቺኮ ሆኤስ፤ ጊዶ ኣቲን ባርካ ኢቺዳዴ ዋኒ ሆኣና ዳንዳይዜ?

¹² ኣሲ ቢዛ ቆሃና ዳንዳዬስ፤ ናምኡ ጊዲኮ ኢዛራ ኤቄታና ዳንዳዬቴስ፤ ሄን ዶቄቲዳ ዎዶሮይ ኤሌ ዱጼና።

¹³ ዞሬ ኤኮንታ ኤያኔ ጪማ ካዎ ጊዳናፔ ኣ ኤራቴ ዲዛ ናቴ ማንቆይ ሎኦ።

¹⁴ ኣይስ ጊኮ ኢዚ ሄ ሂዬሳ ጊዲዳ ሶሆፔ ዴንዲዲ ዎይኮ ቃሾ ኬፌ ኬዚዲ ባ ቢታን ካዎታናስ ዳንዳዬስ።

¹⁵ ታኒ ሳሎ ጉፋንን ዲዛይቲኔ ሲሜሬቲዛይቲ ኡባይ ካዎ ኣራታ ላቲዛ ዬላጋ ካሊዛይሳ ቤኣዲስ።

¹⁶ ኢዛ ሲንን ቆዳይ ባይንዳ ዴሬይ ዴስ፤ ካዎቴፌ ኢዚ ኪቺዛ ዎዴ ኢዚ ኦዳይሳስ ኦኒካ ኢዛ ጋላቴና። ሄሲካ ሃዳ፤ ጫርኮ ኦይካናስ ዬዴዛ ማላ።