ኤራንቻታ ማጻፋ 3 - ጋሞ ማጻፋ

ኡባ ሚሻስካ ዎዴይ ዴስ

¹ ኡባሲካ ዎዴይ ዴስ፤ ሳሎፔ ጋርሳ ባጋራ ኦሴቲዛይሳስ ኡባስ ዎዴይ ዴስ።

² ሄሳ ጊሻስ ዬሌታናስ ዎዴይ ዴስ፤ ሃይቃናስካ ዎዴይ ዴስ፤ ቶካናስ ዎዴይ ዴስ፤ ሾዳናስካ ዎዴይ ዴስ።

³ ዎናስ ዎዴይ ዴስ፤ ኣሻናስካ ዎዴይ ዴስ፤ ላላናስ ዎዴይ ዴስ፤ ጊምባናስካ ዎዴይ ዴስ።

⁴ ዬካናስ ዎዴይ ዴስ፤ ሚጫናስካ ዎዴይ ዴስ። ካዮታናስ ዎዴይ ዴስ፤ ቃሴ ኡፋዬቲሼ ጉፓናስካ ዎዴይ ዴስ።

⁵ ሹች ላላናስ ዎዴይ ዴስ፤ ሹች ሺሻናስካ ዎዴይ ዴስ። ኢዲሜታናስ ዎዴይ ዴስ፤ ሻኬታናስካ ዎዴይ ዴስ።

⁶ ኮያናስ ዎዴይ ዴስ፤ ኣጋናሲካ ዎዴይ ዴስ። ሺሺ ኦይካናስ ዎዴይ ዴስ፤ ኬሲ ኦላናስካ ዎዴይ ዴስ።

⁷ ዳካናስ ዎዴይ ዴስ፤ ሲካናስካ ዎዴይ ዴስ። ጮኡ ጋናስ ዎዴይ ዴስ፤ ሃሳያናስካ ዎዴይ ዴስ።

⁸ ዶሳናስ ዎዴይ ዴስ፤ ኢጻናስካ ዎዴይ ዴስ። ኦላስ ዎዴይ ዴስ፤ ሳሮን ዳናስካ ዎዴይ ዴስ።

⁹ ሂስቲን ኦሳንቻይ ባ ዳፌቲ ዳቡርዳይሳፌ ኣይ ዎ ዴማኔ?

¹⁰ ታኒ ቃሴ ኣሳ ናይቲ ዳቡርዲ ኦና ማላ ጾሲ ኢሚዳ ቶሆይ ኬሂ ዴጾ ጊዲዳይሳ ቤኣዲስ።

¹¹ ኡባ ሚሽ ኢዛ ዎዴን ዎዴን ሎኤዲ ኦዴስ። ጾሲ ኣሳ ዎዚናን ሜርናቴ ዎዴስ፤ ጊዲኮካ ጾሲ ኦዳይሳ ኡባ ኮይሮፔ ዉርሴ ጋካናስ ኣሲ ኡባ ኤራናስ ዳንዳዬና።

¹² ሄሳ ጊሻስ ኣሲ ባ ዴኦ ላይን ሎኦ ኦሶ ኦዛይሳፌኔ ኡፋይሲዛዝ ኦዛዛፔ ኣዛ ሃራ ሚሺ ባይንዳይሳ ታኒ ኤራዲስ።

¹³ ቃሴ ኣሳስ ኢዛስ ኢዛ ዳቡራስ ዋጋ ጊዲዛይ ሚዲኔ ኡዪዲ ባና ኡፋይሲዛይሳ፤ ሄሲካ ኢዛስ ጾሳፌ ኢሜቲዳ ኢሞታ።

¹⁴ ጾሳይ ኦዳይሲ ኡባይ ሜርናስ ዴኣናይሳ ታ ኤራይስ፤ ኢዚ ኦዳይሳ ቦላ ጉጃናስ ዎይኮ ኢዛፔ ጉናስ ዳንዳዬቴና። ጾሲ ሄሳ ኦዳይ ኣሳይ ኢዛ ቦንቻና ማላሳ።

¹⁵ ሃኢ ዲዛይሲ ሃይሳፌ ካሴካ ዲዛይሳ፤ ሲንፌ ሃናናይሲ ቤኒካ ዲዛይሳ፤ ጾሲ ካሴ ኣዳይሳ ዛሪ ኮዬስ።

¹⁶ ቃሴካ ታኒ ሳሎ ጉፋንን ሃራ ሚሽ ቤኣዲስ፤ ፒርዳ ሶሆን ማካላቴ ዴስ፤ ሱሬ ፒርዳ ሶሆን ጌኔይ ዴስ።

¹⁷ ታኒካ ታ ዎዚናን፥ «ኡባ ዮኦሲኔ ኦሶስ ዎዴይ ዲዛ ጊሻስ ጾሲ ጺሎዛኔ ዎርዳንቻዛ ፒርዳስ ሺሻና» ጋዳ ቆፓዲስ።

¹⁸ ቃሴ ታኒ ታ ዎዚናን፥ «ኣሲ ሜሄ ማላ ጊዲዳይሳ ኢስቲ ኤራና ማላ ጾሲ ፓጬስ።

¹⁹ ኣሳ ቃዳይካ ሜሄይሳ ማላ፤ ናምኣ ቃዳይካ ኢሲኖ፤ ኢሶይ ሃይቂዛ ማላ ሃንኮይሲካ ሃይቄስ፤ ናምኣስካ ኢሲ ቆሞ ፔኖይ ዴስ፤ ሄሳ ጊሻስ ኢዚ ሜሄፔ ዱማቴና፤ ሄሲካ ሃዳ።

²⁰ ናምኣይካ ኢሲ ሶሆ ቤቴስ፤ ናምኣይካ ቢታፌ ሜቲዳ ጊሻስ ቢታን ሲሜቴስ።

²¹ ሂስቲን ኣሳ ሼምፖይ ፑዴ ሳሎ ኬዚዛይሳ፥ ሜሄታ ሼምፖይካ ዱጌ ቢታን ጌሊዛይሳ ኦኔ ኤሪዛይ?» ጋዳ ቆፓዲስ።

²² ሄሳ ጊሻስ ኣሲ ባ ኦዳ ኦሶን ኡፋይሳፌ ሃራ ኣዛ ሚሺ ባይንዳይሳ ታ ቤኣዲስ፤ ሄሲካ ኣሳስ ኢሜቲዳ ቃዳ፤ ኢዚ ሃይቂዳፔ ጉዬ ኦሴቲዳ ኦሶታ ኢዛ ዛሪ ኤሂዲ ቤሳናይ ኦኔ?