ኤራንቻታ ማጻፋ 2 - ጋሞ ማጻፋ

ባና ጻላ ሲቆይ ሃዳ

¹ ታኒ ታ ዎዚናን፥ «ኣኔ ታስ ጊታ ኡፋይስ ኢሚዛይ ኣዛኮ፥ ቃሴ ሎኦ ሚሺ ኣዛኮ ኤራናስ ኮያይስ» ጋ ቆፓዲስ፤ ጊዶ ኣቲን ሄሲ ሃዳ።

² ቃሴካ፥ «ሚቺ ኤያቴ፤ ኢሻሎሲኔ ኡፋይሳስ ኣይ ጎኣይ ዲዜ?» ጋዲስ።

³ ሄሲ ዉሪ ሃኒንካ ኣ ኤራቴ ዴማናስ ታ ዎዚናን ኣሞታዳ ታና ዎይኔ ኡሻን ኡፋይሳናሲኔ ኤያቴ ኦይካናስ ባጼታዲስ፤ ቃሴ ኣሳይ ሳኣ ቦላ ዲዛ ቃን ላይን ሳሎ ጉፋንን ዲዛ ሚሽ ኡባ ቦላ ኦዳኮ ኢስታ ጎኢዛዚ ኣዛኮ ታ ኤራና ኮያዲስ።

⁴ ሄሳ ጊሻስ ሃራ ኢሲ ጊታ ሚሻታ ኦዲስ፤ ታስ ኬታካ ኬጻዲስ፤ ዎይኔ ቱራካ ቶካዲስ።

⁵ ዱማ ዱማ ኣታኪልቴታ፥ ዱማ ዱማ ኣይፌ ኣይፊዛ ሚታ ቶካዲስ፤ ዩዪ ኡፋዬቲዛሶ ጊጊሳዲስ።

⁶ ሄ ዲጪዛ ሚታ ኡሻናስ ሃ ኤሊሲዛሶ ዜራ ጊጊሳዲስ።

⁷ ኣቱማኔ ማጫ ኣይሌታ ሻማዲስ፤ ታስ ሶን ዬሌቲዳ ሃራ ኣይሌቲካ ዴቴስ፤ ታፔ ካሴ ዬሩሳላሜን ዴኢዳ ኦናፔካ ቦላራ ዳሮ ሜሄ፥ ዴይሺኔ ዶርሳ ዉዴ ሃራዲስ።

⁸ ታኒ ዱማ ዱማ ቢታታፔ ጊታ ኣሳታፔኔ ካዎታፔ ኣቆታ፥ ዎርቃኔ ቢራ ታስ ዳጋሳዲስ። ቃሴ ኣዴኔ ማጫ ዬንቻታ ሺሻዲስ፤ ጉጃዳካ ኣሳ ኡፋይሳናስ ዳሮ ማጫ ናይታ ኤሃዲስ።

⁹ ሄሳ ጊሻስ ታኒ ታፔ ካሴ ዬሩሳላሜን ዴኢዳ ኦፔኔ ኣዳ ጊታ ኣስ ጊዳዲስ፤ ታ ኣ ኤራቴይካ ታናራ ዴኢዴስ።

¹⁰ ታ ኣይፌይ ጼሊዳይሳ ዲጋቤኬ፤ ታ ዎዚናይ ኣሞቲዳይሳ ኡባ ዲጋቤኬ፤ ታኒ ኦዳ ኡባ ታ ዎዚናይ ኡፋዬቲዴስ፤ ታ ዳቡራስ ዎይ ሄሳ።

¹¹ ጊዶ ኣቲን ሄሳ ኡባ ኦ ሲማዳ ታኒ ኣኬኪዛ ዎዴ ታኒ ኬሃ ዴማና ጋዳ ዳቡርዳ ዳቡራ ኡባ ታ ቆፒዛ ዎዴ ኡባይካ ሃዳ፤ ሳሎ ጉፋንን ኣይ ዎይካ ዴና፤ ኡባይካ ጫርኮ ኦይካናስ ዬዴዛ ማላ።

¹² ሄሳፌ ጉዬ ታኒ ኣ ኤራቴ፥ ኤያቴኔ ጎሻቴ ኣዛኮ ፒልጋ ኤራናስ ቆፋ ዶማዲስ፤ ካዎ ሶሆን ካዎቲዳ ሃራ ካዎይ ካሴ ኦሴቲዳይሳፌ ሃራ ኣይ ኦኔ?

¹³ ቱሙካ ፖኦይ ማፔ ሎኢዛ ማላ ኣ ኤራቴካ ኤያቴፌ ኣዛይሳ ቤኣዲስ።

¹⁴ ኤራ ኣሳ ኣይፌይ ኢዛዴስ ሁኤ ቦላ ዴስ፤ ኤያይ ጊዲኮ ማ ጊዶራ ሄሜቴስ፤ ጊዶ ኣቲን ኢስታ ናምኣ ቃዳይካ ኢሲኖ ጊዲዳይሳ ኣኬካዲስ።

¹⁵ ታኒ ታ ዎዚናን፥ «ኤያ ጋኪዛ ቃዳይ ታናካ ጋካና፤ ሂስቲን ታኒ ኣ ኤራንቻ ጊዶይሳስ ዎይ ኣዜ?» ጋዳ ቆፓዲስ። ቃሴ ታኒ ታ ዎዚናን፥ «ሃይሲ ኡባይካ ሃዳ» ጋዲስ።

¹⁶ ኣ ኤራንቻይካ ኤያዛ ማላ ሜርናስ ሃሳኤቴና፤ ሲንፌ ያና ላይታን ናምኣይካ ዶጌታና፤ ኤያይ ሃይቂዛ ማላ ኣ ኤራንቻሲካ ሃይቆይ ኣቴና።

ኣሳ ዳፌቴ ሃዳ

¹⁷ ሳሎ ጉፋንን ሃኒዛ ሚሺ ኡባይ ኢቲዛ ጊሻስ ሃ ሳኣ ዱሳይ ታና ኢቴስ፤ ሄሲ ኡባይካ ሃዳ፤ ጫርኮ ኦይካናስ ዬዴዛ ማላ።

¹⁸ ሳሎ ጉፋንን ታኒ ኬሃ ዳቡራ ዴሚዳ ኡባ ታፔ ጉዬን ዪዛ ዬሌታስ ዬጋዳ ቢዛ ጊሻስ ታኒ ዳቡራ ዴሚዳ ኡባይ ታና ኢቴስ።

¹⁹ ታፔ ጉዬራ ያናይሲ ኢዚ ኣ ኤራንቻ ጊዲን ዎይኮ ኤያ ጊዲን ኦኔ ኤሪዛይ? ኢዚ ኦና ጊዲኮካ ታኒ ኬሃ ዳቡርዳይሳኔ ታ ኣ ኤራቴን ታኒ ዴሚዳ ኡባ ቦላ ጎዳ ጊዳና፤ ሄሲካ ሃዳ።

²⁰ ሄሳ ጊሻስ ሳሎ ጉፋንን ሃይሳ ኬና ኣይስ ዳቡራዲና ጋዳ ታ ዎዚናን ሂዶታ ቃንጾ ዶማዲስ።

²¹ ጋሶይካ ኣሲ ባ ኡባ ኣ ኤራቴን፥ ኤራኒኔ ሂላን ዳቡርዲ ዴሚዳ ኡባ ኣይኮካ ዳቡሮንታ ኣሳስ ኣጊ ቤስ፤ ሄሲካ ሃዳኔ ጊታ ቆሆ።

²² ሄሳ ጊሻስ ሳሎ ጉፋንን ኣሲ ኬሂ ዳፌቲኮኔ ዳቡርኮ ኢዛስ ኣይ ዎይ ዲዜ?

²³ ኢዚ ባ ዴኦ ላይን ዳቡርዛ ዳቡራይ ኡባይ ዋዬኔ ሜቶ ጻላ፤ ኦማርሲካ ኢዛ ጉጌይ ሼምፖ ዴሜና፤ ሄሲ ኡባይካ ሃዳ።

²⁴ ኣሳስ ሙሳፌኔ ኡሻፌ ቃሴ ባ ኦዳ ኦሶን ኡፋዬቴፌ ሃራ ሎኢዛ ሚሺ ዴና፤ ሄሲካ ጾሳ ኩሼፔ ኢሜቲዛይሳ ታ ቤያዲስ።

²⁵ ኢዛ ኣቻፌ ኢሜቶንታ ኣጊኮ ኦኒ ማናሲኔ ኡፋዬታናስ ዳንዳይዜ?

²⁶ ጾሲ ባና ኡፋይሲዛ ኣሳስ ኣ ኤራቴ፥ ኤራቴኔ ኡፋይስ ኢሜስ፤ ጊዶ ኣቲን ናጋራንቻይ ጾሳ ኡፋይሲዛይታስ ዬጊ ባና ማላ ኣቆታ ዳጋሳናሲኔ ኦናስ ዎልቃ ኢሜስ፤ ሄሲካ ሃዳኔ ጫርኮ ኦይካናስ ዬዴዛ ማላ።