ኤራንቻታ ማጻፋ 12 - ጋሞ ማጻፋ

¹ ሜቶ ጋላሳቲ ዮንታ ዲሺን ኔኒ፥ «ታና ኡፋይሴቴና» ጊዛ ዎዴቲ ጋኮንታ ዲሺን ኔ ዬላጋቴ ላይን ኔና ሜዳይሳ ቆፓ።

² ኣዋይኔ ፖኦይ፥ ኣጊናይኔ ጾሊንቴይ ሞንታ ዲሺን፥ ኢራይ ቡኪ ሲሚን ሻራይ ኪቾንታ ዲሺን ኔና ሜዳይሳ ቆፓ።

³ ኬ ናጊዛይቲ ኮኮሪዛ ዎዴ፥ ሚኖቲ ኩኒዛ ዎዴ፥ ጋጪዛይቲ ቆዳን ጉ ጊዲዳ ጊሻስ ጋቼ ኣጊዛ ዎዴ፥ ማስኮቴራ ጼሊዛይቲ ዶልጁሚዛ ዎዴ፥

⁴ ዱቡሻሶ ኤፊዛ ኦጌቲ ጎርዴቲዛ ዎዴ፥ ዎጻይ ሎጬቲዲ ጊሬ ኣጊዛ ዎዴ፥ ካፎ ዋሶይ ኣስ ዴንዛ ዎዴ፥ ኢስታ ዬካ ዳቡርዛ ዎዴ፥

⁵ ፑዱን ኬሲ ጾኒዛ ዎዴ፥ ኦጌ ቡሲ ባቢሲዛ ዎዴ፥ ኦቾሎኔይ ጪዪዛ ዎዴ፥ ቦሌይ ባርካ ባና ጎቺዛ ዎዴ፥ ኣሳፔ ኣሞይ ይዛ ዎዴ ኣሲ ባ ሜርና ኬ ባና፤ ዬኪዛይቲካ ባሌን ዩያና።

⁶ ቢራ ሳንሳላታይ ዱጾንታ ዲሺን፥ ዎርቃ ሳኔይ ሜቆንታ ዲሺን፥ ሃ ኦቶይ ፑልቶ ኣቻን ሜቆንታ ዲሺን፥ ሃ ኦላፌ ኬሲዛ ዋጉምቦይ ሜቄሬቶንታ ዲሺን፥

⁷ ቢታይ ዱጌ ቢታን ሲሞንታ ዲሺን፥ ሼምፖይ ኢሚዳ ጾሳኮ ሲሞንታ ዲሺን፥ ኔና ሜዳ ጾሳኮ ሲማ።

⁸ ኤራንቻዚ፥ «ሃዳ! ሃዳፔካ ሃዳ! ኡባይካ ሃዳ!» ጌስ።

ኩሻ ቆፋ

⁹ ኤራንቻዚ ባ ሁኤስ ኣ ኤራንቻ ጻላ ጊዶንታ ኣሳካ ኤራቴ ታማርሲዴስ። ዳሮ ሌሚሶታ ፒልጊ ጼሊዳፔ ጉዬን ማራን ማራን ጊግሲዴስ።

¹⁰ ኤራንቻዚ ሱሬ ቃላ ዴማናስ ፒልጊዴስ፤ ኢዚ ጻፊዳይሲ ሱሬኔ ቱማ።

¹¹ ኣ ኤራንቻ ቃላይ ጪካ ማላ ሆጼ፤ ቃሴ ኢዛ ቶሴቲካ ኣዳፌ ሽኬቲዳ ሽኬ ማላ፤ ሄይቲካ ኢሲ ሄንንቻፌ ኢሜቲዳይታ።

¹² ታ ናዞ! ሃ ኡባፌ ቦላራ ኣይ ሚሻፌካ ናጌታ፤ ኣይኮካ ጉጆፋ፤ ዳሮ ማጻፋታ ጻፊኮካ ዉርሴ ዴና፤ ጺናቴ ዳሮይ ቦላ ዳቡርሴስ።

¹³ ሄኮ ኡባ ሚሺ ዮቴቲዴስ፤ ዮኦ ኡባስ ኩሺ ሃይሳ፤ ጾሳስ ያያ፤ ኢዛ ኣዛዞ ናጋ፤ ሄሲካ ኣሳ ናስ ኢሜቲዳ ኩሜ ኦሶ።

¹⁴ ጾሳይ ኦሶ ኡባ ቦላ፥ ጌሚዳ ዮኦ ኡባ ቦላ፥ ሎኦ ጊዲን ኢታ ጊዲንካ ፒርዳና።