ኤራንቻታ ማጻፋ 11 - ጋሞ ማጻፋ

ኣ ኤራንቻይ ኦና ቤሲዛ ኦሶ

¹ ኔ ካ ሃን ዬጋ፤ ዳሮ ጋላሳታፔ ጉዬ ኔኒ ዛራ ዴማና።

² ኔስ ዲዛ ኣቆ ላፑን ዎይኮ ኦስፑን ሶሆን ሻኬሬ ዎ፤ ኣይስ ጊኮ ቢታ ቦላ ኣይ ኢታይ ያናኮ ኔኒ ኤራካ።

³ ሻራይ ካሬጺኮ ቢታ ቦላ ኢራይ ቡኬስ። ሚ ፑዴሃ ዎይኮ ዱጌሃ ኩንዲኮ ባ ኩንዲዳሶን ኢቺ ኣቴስ።

⁴ ጫርኮ ሃኖታ ናጊዛይ ዜሬና፤ ቃሴ ሻራ ማሊዛይ ባ ካ ሺሼና።

⁵ ጫርኮይ ኣዋራ ቢዛኮ ኢዛ ኦጌ ኤራካ፤ ቃሴ ሼምፖይ ዎይኮ ኣያናይ ኣዪ ኡሎን ዲዛ ሜታ ጊዶን ዋኒ ጌሊዛኮ ኔ ኤራካ። ሄሳካ ኡባ ሜዳ ጾሳ ኦሶ ኔ ሻካ ኤራና ዳንዳያካ።

⁶ ማላዶራ ኔ ዜሬ ዜራ፤ ኦማርሲካ ኔ ኩሼይ ኦሶ ቢርሾፎ፤ ጋሶይካ ሃይሲ ዎይኮ ሄሲ፥ ዎይኮ ናምኣይ ሎኣናኮ፥ ዎይኮ ኣዋይሲ ኣይፋናኮ ኔ ኤራካ።

ዬላጋቴን ኔና ሜዳይሳ ቆፓ

⁷ ፖኦይ ሎኦ፤ ኣዋ ኣይፌ ቤኦይ ኣይፌ ኡፋይሴስ።

⁸ ኣሲ ኬሂ ኣዱሳ ላይ ሃ ሳኣን ዴኢኮ ሄ ኡባንካ ኡፋዬቶ። ጊዶ ኣቲን ማ ጋላሳቲ ዳሪዛ ጊሻስ ቆፖ፤ ቡሮ ያና ሚሺ ኡባይካ ሃዳ።

⁹ ሃይሶ ዬላጋዞ! ኔ ናቴቴ ላይን ኡፋዬታ፤ ኔ ናቴቴ ላይን ኔ ዎዚናን ኡፋዬታ፤ ኔ ኣይፌይ ጼሊዳ ኡባኔ ኔ ዎዚናይ ኣሞቲዳ ኡባ ፖላ፤ ጊዶ ኣቲን ኔ ኦዳ ኦሶ ኡባ ጊሻስ ጾሲ ኔና ፒርዳስ ሺሻናይሳ ኤራ።

¹⁰ ሄሳ ጊሻስ ኔ ዎዚናፔ ጬጬ ሃሳ፤ ኢታ ሚሺካ ኔፔ ዲጋ፤ ጋሶይካ ናቴቴኔ ዬላጋቴ ኤሌ ኣና።