ኤራንቻታ ማጻፋ 10 - ጋሞ ማጻፋ

¹ ሃይቂዳ ኡዱንጼቲ ሺቶ ዜቄቴስ፤ ሄሳካ ጉ ኤያቴ ኣ ኤራቴኔ ቦንቾ ካዉሼስ።

² ኣ ኤራንቻ ዎዚናይ ኢዛ ኡሻች ካሌስ፤ ጊዶ ኣቲን ኤያ ዎዚናይ ሃዲርስ ካሌስ።

³ ኤያይ ኦጌ ቢሺን ኢዛስ ኣኬካይ ፓጬስ፤ ባ ኤያቴ ኦናስካ ቆንጪሴስ።

⁴ ኔ ጎዳይ ኔ ቦላ ሃንቄቲኮ ኔ ሶሆ ዬዶፋ፤ ጋሶይካ ዳንዳያይ ጊታ ሃንቆ ጮኡ ሂስቴስ።

⁵ ሳሎ ጉፋንን ታኒ ቤኢዳ ኢታ ሚሺ ዴስ፤ ሄሲካ ዴሬ ሃሪዛዴፌ ኬዚዛ ባላ።

⁶ ኤያቲ ኬሂ ቃሶሆን ኡቲን ዱሬቲ ሂርኪ ዚቃ ሶሆን ኡቲዳ።

⁷ ኣይሌቲ ዳናታ ማላ ቶጋን ቢሺን ዳናቲ ቃሴ ኣይሌታ ማላ ቶሆን ቢሺን ቤኣዲስ።

⁸ ኦላ ቦኪዛ ኣሲ ሄ ኦላን ኢዚ ኩንዳና፤ ቃሴ ዲርሳ ላሊዛ ኣስ ሾሺ ዱካና።

⁹ ሹች ቃሊዛይ ሄ ሹቻን ዴሼቴስ፤ ቃሴ ሚ ቄሪዛይ ሄ ሚን ቆሄቴስ።

¹⁰ ዱንኤ ካልታ ሌፎንታ ኦኮ ዳሮ ዎልቃ ዉርሴስ፤ ጊዶ ኣቲን ሂላን ኦኮ ኦሶዛ ኣይፊሴስ።

¹¹ ሾሺ ሙሬኖን ጃላናፔ ሲንን ዱኪኮ ሙሬኒዛዴ ኣይኮካ ጎኤና።

¹² ኣ ኤራንቻ ዶናፔ ኬዚዛ ቃላይ ፑላን ኩሚዳዛ፤ ጊዶ ኣቲን ኤያይ ባርካ ባ ኢንጻርሳን ዬስ።

¹³ ኮይሮፔ ዶሚዲ ኢዛ ቃላይ ኤያቴ፤ ዉርሴንካ ኢታ ጎሽ ጊዴስ።

¹⁴ ኤያይ ሃሳያ ዳሪሴስ፤ ቡሮፔ ሃናናይሳ ኤሪዛይ ዴና፤ ሃይቂዳዴስ ኢዛፔ ጉዬን ሃናናይሳ ኦኔ ኢዛስ ዮታና ዳንዳይዛይ?

¹⁵ ኤያ ኦሶይ ኦዛዴ ዳቡርሴስ፤ ኢዚ ካታማ ጋዛ ኦጌ ኤሬና።

¹⁶ ሃኔ ኔ ካዎይ ዬላጋ ጊዲዳሬ! ኔ ዳናቲ ዎንታራ ጊቢራ ጊግሲዛ ቢታዬ ኔስ ኣዬ ኣና!

¹⁷ ሃኔ ኔ ካዎይ ቦንቼቲዳ ዛሬፔ ጊዲዳሬ! ማታናስ ጊዶንታ ሚኔታናስ ኮሺዛ ዎዴ ሚዛ ዳናቲ ዲዛ ቢታዬ! ኔኒ ኣንጄቲዳሮ።

¹⁸ ኣዴይ ኣዛላ ጊዲኮ ካራይ ያርጳቴስ፤ ኢዛ ኩሼቲ ዳቡርኮ ኬ ኣስ።

¹⁹ ጊቢራይ ሚጪሴስ፤ ዎይኔ ኡሺ ኣስ ኡፋይሴስ፤ ሚሺ ዲኮ ሚሺ ሃኔስ።

²⁰ ቆፋንካ ጊዲን ካዎ ካፓ፤ ኔ ኣቂዛ ኪፊሌን ዳሼ ዱሬ ቃንጎፋ፤ ቄፌን ፒራዛራ ኔ ጊዛይሳ ኤፋ ጋና ዳንዳያዉስ።