ኤራንቻታ ማጻፋ 1 - ጋሞ ማጻፋ

ኡባይካ ሃዳ

¹ ሃይሲ ዳዊቴ ና ዬሩሳላሜን ካዎቲዳ ኤራንቻዛ ቃላ።

² ሄ ኤራንቻይ፥ «ኡባ ሚሺ ሃዳ፤ ሃዳፔካ ኣዳ ሃዳ፤ ኡባ ሚሺካ ሃዳ» ጌስ።

³ ኣላሜ ቦላ ኣሳ ናይ ዳቡርዛ ዳቡራ ኡባስ ኣይ ዎይ ዲዜ?

⁴ ዬሌታይ ኣ ቢሺን ሃራ ዬሌታይ ዬስ፤ ጊዶ ኣቲን ቢታያ ሜርናስካ ሚና ዴኣዉስ።

⁵ ኣርሼይ ሞኬሲኔ ዉሌስ፤ ቃሴካ ባ ሞኪዛሶ ባናስ ኤሶቴስ።

⁶ ጫርኮይ ዱጌሃ ባጋ ጫርኬስ፤ ሃራ ዎዴ ፑዴሃ ባጋ ሲሜስ፤ ቃሴ ዩዪ ዩዪ ኣዲ ባ ሎሲዳ ኦጌን ጌሌስ።

⁷ ሻፋ ሃ ኡባይ ቢዲ ኣባን ጌሌስ፤ ጊዶ ኣቲን ኣባይ ሙሌካ ኩሚ ኤሬና፤ ሻፋ ሃቲ ካሴ ባ ዪዳሶ ሲሚ ቤቴስ።

⁸ ኣሲ ሃሳያናስ ዳንዳይዛዛፔ ቦላራ ዮኦቲ ኡባይ ሳሌዛዛ፤ ኣይፌይ ጼሊዲ ካሊ ኤሬና፤ ሃይካ ሲዪዲ፥ «ታስ ጊዲዴስ» ጊ ኤሬና።

⁹ ካሴ ሃኒዳይ ሲሚ ኢዚ ሃናና፤ ቃሴ ሃኢ ሃኒሼ ዲዛይካ ካሴ ሃኒዳይሳ። ሄሳ ጊሻስ ሳሎ ጉፋንን ኣይኮይካ ኦራ ሚሺ ዴና።

¹⁰ ኦኒካ፥ «ቤኢቴ! ሃይሲ ኦራ ሚሻ» ጊኮ ሄሲ ኦራ ሚሽ ጊዴና፤ ሄሲ ኑኒ ዬሌታናፔ ካሴካ ዲዛ ሚሻ።

¹¹ ቤኒ ዎዴ ሃኒዳ ሃኖታ ዛሪዲ ሃሳኢሲዛ ሚሺ ዴና፤ ሲንፌ ያናይቲካ ኢስታፌ ካሊ ያናይታን ቆፌቴቴና።

ኤራንቻዚ ዴኦ ሎሴፔ ዴሚዳ ቲሚርቴ

¹² ታኒ ኤራንቻዚ ዬሩሳላሜን ኢስራኤሌስ ካዎ ጊዳዳ ዴኣዲስ።

¹³ ታኒ ሳሎ ጉፋንን ዲዛ ኡባ ሻካ ኤራናሲኔ ኣ ኤራቴን ፒልጋ ጼላናስ ታ ቆፋ ቃቻዲስ፤ ጾሲ ኣሳ ናይታ ቶሲዳ ቶሆይ ኣይ ማላ ዴጾ!

¹⁴ ሳሎ ጉፋንን ሃኒዳ ሃኖታ ኡባ ታ ቤኣዲስ፤ ጊዶ ኣቲን ኡባይካ ሃዳ፤ ጫርኮ ኦይካና ዬዴዛ ማላ።

¹⁵ ጌላቲዳ ሚሺ ሲቲ ጋናዉ ዳንዳዬና፤ ቃሴ ባይንዳ ሚሺ ቆዴታና ዳንዳዬና።

¹⁶ ታኒካ ታ ዎዚናን፥ «ታፔ ካሴ ዬሩሳላሜ ሃሪዳ ኡባታፔ ታኒ ጊታኔ ኣ ኤራንቻ ጊዳዲስ፤ ታኒ ኣ ኤራቴኒኔ ኤራን ኬሃ ሎሃዲስ» ጋ ቆፓዲስ።

¹⁷ ቃሴ ታኒ ኣ ኤራቴ፥ ጎሻቴኔ ኤያቴ ሻካ ኤራናስ ኬሃ ባጼታዲስ፤ ጊዶ ኣቲን ዉርሴን ሄሲካ ጫርኮ ኦይካናስ ዬዴዛ ማላ ሃዳ ጊዲዳይሳ ኤራዲስ።

¹⁸ ኣ ኤራቴ ዳሪሺን ጬጬይ ዳሬስ፤ ኤራይ ዳሪዛ ዎዴካ ሜቶይ ዳሬስ።