ኣሞጼ ቲንቢቴ 9 - ጋሞ ማጻፋ

ኢስራኤሌ ቦላ ያና ፒርዳ

¹ ጎዳይ ያርሾ ያርሺዛሶዛ ሚሌን ኤቂ ዲሺን ታ ቤያዲስ፤ ኢዚካ ታና፥ «ጾሳ ኬ ዮቻይ ቃጻና ጋካናስ ኬ ቁስቴ ሾጫ ላላዳኔ ኣሳ ቦላ ኩንዳና ማላ ኦ፤ ሄሳፌካ ኣቲዳይታ ታኒ ኢስታ ማሻራ ዎ ይሳና፤ ኢስታፌ ኦኒካ ባቃቴና፤ ባቃቲኮካ ታፔ ኬሲ ኤኪ ኣቴና።

² ኢስቲ ዱፎ ቦኪ ጌሊዳኮካ ታ ኩሼይ ኢስታ ሄፔ ሾዲ ሃ ኬሳና፤ ኢስቲ ፑዴ ሳሎ ኬዚዳኮካ ታኒ ኢስታ ሄፔ ሃ ዱጌ ጎቻ ዎና።

³ ኢስቲ ፑዴ ቃርሜሎሴ ዙማ ቦላ ኬዚ ቆቴቲዳኮካ ታ ካሌታ ባዳ ኢስታ ሄፔ ዎና፤ ኢስቲ ዱጌ ጪማ ኣባ ጊዶ ጌሊዲ ታፔ ቆቴቲዛኮካ ሄን ኢስታ ሾሺ ዱካና ማላ ታ ኣዛዛና።

⁴ ኢስቲ ባ ሞርኬታ ኩሼን ዲኤቲ ቢኮካ ሄን ኢስቲ ማሻን ሃይቃና ማላ ታ ኣዛዛና፤ ታኒ ኢስታ ቦላ ታ ኣይፌ ሎኦስ ጊዶንታ ኢታስ ዛራና» ጊ ኣዛዚዴስ።

⁵ ኡባ ሃሪዛ ጎዳይ ኢዚ ቢታዮ ቦቼስ፤ ኢዛካ ሴራዉስ፤ ኢዚን ዲዛ ኡባይ ዬኬስ፤ ናይሌ ሻፋይ ኪጺ ጉሚዛ ማላ ቢታ ኡባይ ቃጼስ፤ ቃሴ ዛሪዲ ኪጻ ሃ ዎዛ ማላ ዎና።

⁶ ባ ዱሳሶ ሳሎ ኦዳይ፥ ሳሎካ ሳኣፔ ቦላን ሚንዳይ፥ ኣባ ሃ ኣዛዚዲ ቢታ ቦላ ጎጊሲዛይ ኢዛስ ሱንይ ጎዳ።

⁷ ጎዳይ፥ «ኢስራኤሌ ኣሳዉ! ኢንቴ ታስ ቶጵያ ኣሳ ማላ ጊዴኬቲ? ታኒ ኢንቴና ጊብጼፔ ኬሶይሳ ፊሊስጼሜ ኣሳ ቃርጼሴፔ ቃሴ ሶሪያ ኣስ ቂሬፔ ኬሳቤኪና?

⁸ ታኒ ኡባ ሃሪዛ ጎዳይ ጌዴ ናጋራንቻ ኢስራኤሌ ኣሳ ካዎቴኮ ጼላይስ፤ ታ ኢዛ ቢታፌ ሙሌራ ይሳና፤ ጊዶ ኣቲን ያቆቤ ዜሬ ኡባ ይሲኬ» ጌስ።

⁹ «ቤኢቴ ካ ዛይዛሬን ዛይዛሪዛ ማላ ኢስራኤሌ ኣሳ ኣይዛቤ ካዎቴ ጊዶን ዛይዛራና ማላ ታ ኣዛዛና፤ ጊዶ ኣቲን ኢስታፌ ኢሳዴይካ ዎራ ዎ ዬና።

¹⁰ ‹ኑ ቦላ ኣይኮ ኢታይካ ጋኬና ዎይኮ ኑና ቦቼና› ጊዛ ታ ዴሬ ኣሳ ጋርሳን ዲዛ ናጋራንቻቲ ኡባይ ኦላን ሃይቃና» ጌስ ጎዳይ።

ኢስራኤሌ ኣሳ ሲሞ ሂዶታ

¹¹ «ጮ ኩንዲ ላሌቲዳ ኬ ማላ ጊዲዳ ዳዊቴ ዜሬታ ካዎቴስ ታኒ ዛራ ኤሳና ዎዴይ ያና፤ ታኒ ጊምቤዛ ዛራ ጊምባና፤ ላሌቲዳይሳካ ኦራጺሳና፤ ካሴይሳ ዛራ ኦና።

¹² ሄሳካ ኤዶሜ ዴሬን ኣቲዳይታኔ ታ ሱንን ጼይጌቲዳ ዴሬታ ኡባ ኢስቲ ላታና» ጌስ ጎዳይ።

¹³ «ካ ማጺዛይቲ ማጺ ዉርሶንታ ዲሺን ጎሻ ዎዴይ ጋኬስ፤ ዎይኔ ኣይፌ ጉምኢዛዴይ ጉምኢ ጊጎንታ ዲሺን ዎይኔ ፑቴ ቶኪዛ ዎዴይ ጋኬስ፤ ሄ ዎዴ ማልኢዛ ሎኦ ዎይኔ ኡሺ ዙማፔ ፑልታና፤ ዙምቡላታፔካ ጎጋና።

¹⁴ ዲኤቲ ቢዳ ኢስራኤሌ ኣሳ ሃ ኢስታ ዴሬ ዛራ ኤሃና፤ ላሌቲዳ ካታማታ ዛሪ ኬጺዲ ኢዛን ዴኣና፤ ኢስቲ ዎይኔ ቶኪዲ ኢዛፔ ኣጌቲዳ ኡሹ ኡያና፤ ዱማ ዱማ ኣይፊዛ ሚ ቶኪዲ ኢዛ ኣይፌ ማና።

¹⁵ ታ ዴሬ ኢስራኤሌ ኣሳ ታኒ ካሴ ኢስታ ቢታን ዛራዳ ቶካና፤ ታኒ ኢስታስ ኢሚዳ ቢታፌ ኢስቲ ናምኣን ቃሌቲ ዬቴና» ጌስ ጎዳይ ሳሎ ጾሳይ።