ኣሞጼ ቲንቢቴ 8 - ጋሞ ማጻፋ

ኣሞጼይ ኣጁታን ቤኢዳ ቴራይ ኩሚዳ ኬሼ

¹ ኡባፌ ዎልቃማ ጎዳይ ታና ሃራ ኣጁታ ቤሲዴስ፤ ሄሲካ ቴራይ ኢዛን ኩሚ ዲዛ ኬሼ።

² ጎዳይ ታና፥ «ሄሲ ኔ ቤኢዛይሲ ኣዜ?» ጊ ኦይቺዴስ፤ ታኒካ ኢዛስ፥ «ቴራራ ዲዛ ዳቾ ቤያይስ» ጋዲስ፤ ቃሴካ ጾሲ ታስ፥ «ታ ዴሬ ኢስራኤሌስ ዉርሴ ጋኪዴስ፤ ሃይሳፌ ጉዬን ታኒ ኢስታ ቃጻዮንታ ኣጊኬ።

³ «ኢስቲ ጾሳ ኬን ሲሲዛ ዬይ ሄ ዎዴ ዬሆን ላሜታና፤ ዳሮ ኣሳ ኣሃይ ኣዋን ኣዋንካ ኩንዲ ኣታና፤ ኣዋንካ ጮ ዬጌቲ ኣታና» ጌስ።

ኢስራኤሌ ኩንዴ

⁴ ኢንቴኖ ሜቶቲዳ ኣሳ ቆሂዛይቶ! ቃሴ ማንቆታ ቢታፌ ይሳና ኮይዛይቶ! ሃይሳ ሲዪቴ!

⁵ ኢንቴ፥ «ኑኒ ኑ ካ ባይዛና ማላ ኣጊና ጼሮን ቦንቺዛ ባኣሌይ ኣይዴ ኣኔሻ! ኑኒ ካ ጊያ ጌልናስ ሳምባታይካ ኑስ ኣይዴ ኣኔሻ! ሄ ባኣሌይ ኣኮ ኑኒ ማካ ሚሻ ጉዲ ኣልኦ ዋጋን ባይዛና፤ ቃሴካ ዎርዶ ሜዛኔን ኣሳ ባሌና።

⁶ ጊስቴ ሃርቆካ ሙሩታ ጊስቴ ዋጋን ባይዛና፤ ማንቆታ ቢራን፥ ሜቶቲዳይታካ ቶሆ ጫማን ሻማና» ጌታ።

⁷ ያቆቤይኔ ኢዛ ዜሬቲ ኢዛን ጬቄቲዛ ጎዳይ፥ «ኢስቲ ኦዳ ኦሶ ኡባ ታኒ ባሊኬ፤

⁸ ሃይሳ ጌዶን ቢታይ ቡሮ ቃጻና፤ ቢታይ ቦላ ዲዛይ ዉሪካ ዬካና፤ ኣባዬ ሻፋይ ኪጺዲ ጉሚዛይሳ ቢታ ኡባይ ቃ ዮሺኩዮሺካና» ጊዲ ባርካ ባናን ጫቂዴስ።

⁹ ኡባፌ ዎልቃማ ጎዳይ፥ «ሄ ዎዴ ታኒ ጋላሳ ሴታን ኣዋ ኣርሼ ዉልሳና፤ ጋላሳ ሴታን ጋዴ ሚሳና።

¹⁰ ኢንቴ ላይን ላይን ቦንቺዛ ባኣሌዛ ዬሆን ላማና፤ ኢንቴ ዬጺዛ ዬካ ዋሶን ላማና፤ ዲዛ ፔጺ ኢሲ ናይ ሃይቂን ጫሞ ዬሆ ዬኪዛ ኣሳ ማላ ኢንቴ ኢንቴ ሁኤ ቢናና ቡጪዲ ማቃ ማይኣና ማላ ታኒ ኢንቴና ኦና፤ ሄ ዉርሴ ጋላሳይ ጫሞ ጋላስ ጊዳና።

¹¹ ሄኮ ታኒ ቢታ ቦላ ኮሻ ኤሃና ዎዴይ ያና፤ ሄሲካ ኣሳይ ጾሳ ቃላ ሲያና ጋፋኔ ሳሞ ኣቲን ካ ጋፋኔ ሃ ሳሞ ጊዴና።

¹² ዴሬይ ዉሪ ፑዴሃፔ ዱጌሃ ጋካናስ ኣርሼይ ሞኪዛሶፔ ዉሊዛሶ ጋካናስ ጎዳ ቃላ ኮሽ ያኔ ሃ ዬሞታናሺን ዴሜና።

¹³ ሄ ዎዴ ሎኦ ጌላኦቲኔ ሚኖ ፓንቲ ሳሞፔ ዴንዳናይሳን ዳቡራና።

¹⁴ ሳማሪያ ዴሬን፥ ‹ኣሻሞ› ጌቴታ ጼይጌቲዛ ኤቃ ጾሳይን ጫቂዛይቲ፥ ‹ዳኔ ጾሳይ ቤዪን› ዎይኮ፥ ‹ቤርሳቤሄ ጾሳይ ቤዪን› ጊ ጫቂዛይቲ ዉሪካ ኩንዳና፤ ባ ኩንዲዳሶሆፔ ሙሌካ ዴንዳናስ ዳንዳዬቴና» ጌስ።