ኣሞጼ ቲንቢቴ 5 - ጋሞ ማጻፋ

ኢስራኤሌ ኣሳ ማሬቴ

¹ ኢስራኤሌ ኣሳዉ! ኢንቴ ጊሻስ ታ ዚላሊዛ ዚላስ ሲዪቴ።

² «ጌላኦያ ኢስራኤሌይ ኩንዳዱስ፤ ናምኣን ዴንዳናስ ዳንዳዩኩ፤ ኢዞ ማዲ ዴንናይ ባይንዳ ጊሻስ ኢዛ ባርካ ባ ዴሬን ኩንዳ ኣታና።»

³ ኡባ ሃሪዛ ጎዳይ፥ «ኢስራኤሌ ካታማ ኢሲኔይፔ 1,000 ኦላንቻቲ ኦላስ ባናሺን ኢስታፌ ሃይቆንታ ፓጻ ኣታናይ 100 ኣሳታ ጻላ ጊዳና፤ ሃራ ካታማፔካ 100 ኦላ ኣሳቲ ኦላስ ባናሺን ኢስታፌ 10 ኣሲ ጻላ ሲሚ ያና» ጊዴስ።

⁴ ጎዳይ ኢስራኤሌ ኣሳስ፥ «ኢስራኤሌ ኣሳዉ! ሃ ታኮ ሲሚቴ፤ ኢንቴ ሃይቆንታ ዴኣና።

⁵ ኢንቴ ቤርሳቤሄ ቦፒቴ፤ ቤቴሌይ ላሌታዳ ሙሌራ ያና፤ ጌልጌላን ዲዛ ኣሳይ ዲኤታና፤ ሄሳ ጊሻስ ቤቴሌ ጊዲን ዎይኮ ጌልጌላ ቦፒቴ» ጊዴስ።

⁶ ሃ ጾሳኮ ሲሚቴ፤ ሂስቲኮ ኢንቴ ሼምፖራ ፓጻ ዴኣና፤ ኣካይ ጊኮ ጾሲ ታማ ማላ ኢስራኤሌ ዴራ ማና፤ ቤቴሌን ዲዛይታካ ታማይ ማና፤ ሄ ታማ ቶይሳናይ ኢስታስ ቤቴና።

⁷ ኢንቴኖ ፒርዳ ጌላሲዛይቶ! ቱማካ ጌዴ ዎርዶን ላሚዛይቶ ኢንቴስ ኣዬ ኣና!

⁸ ፒሊያዲሴ ጌቴቲዛ ላፑን ጾሊንቴታኔ ኦርዮኔ ጌቴቲዛ ኢሲ ቦላ ዲዛ ጾሊንቴታ ሜዳይ ጋላሳ ኦማርሳን፥ ኦማርሳ ጋላሳን ላሚዛይ፥ ኣባ ሃ ኣዛዚዲ ቢታ ቦላ ጎጊሲዛይ፥

⁹ ዎልቃማታኔ ኢስታ ሚጻታ ላሊ ይሲዛይ ኢዛ፤ ኢዛስ ሱንይካ ጾሳ።

¹⁰ ኢንቴ ቃሴ ኢንቴና ፒርዳሶን ሃንቂዛዴ ኢጼታ፤ ቱሙ ሃሳይዛዴካ ካታ።

¹¹ ማንቆታ ኡንኤታ፤ ኢስታ ዎልቃራ ካ ጊሪሴታ፤ ኢንቴስ ማሴቲዳ ሹቻፌ ኬ ኬጺዴታ ሺን ሄ ኬን ዴኬታ። ኣራዳ ቢታን ዎይኔ ሚ ቶኪዴታ ሺን ኢዛፔ ኣጌቲዳ ዎይኔ ኡሹ ኡዬኬታ።

¹² ኢንቴ ቆሆይ ኣይ ማላ ዳሮኮኔ ኢንቴ ናጋራይ ኣይ ማላ ዴጾኮ ታ ኤራይስ፤ ኢንቴ ጺሎ ኣሳታ ኡንኤታ፤ ማታኤ ኤኪዲ ፒርዳሶን ማንቆታስ ጌላ ፒርዴታ።

¹³ ሄሳ ጊሻስ ሄ ዎዴ ዎዴይ ኢታ ጊዲዳ ጊሻስ ኣኬካይ ዲዛ ኣሲ ጮኡ ጌስ።

¹⁴ ኢንቴ ሼምፖራ ፓጻ ዴኣና ማላ ሎኦፔ ኣቲን ኢታ ኦፍቴ፤ ኢንቴ ሄሳ ኦኮ ኢንቴ ጊዳ ማላ ጎዳይ ሳሎ ጾሳይ ኢንቴናራ ጊዳና።

¹⁵ ኢታ ሚሽ ኢጺቴ፤ ሎኦ ጊዲዳዝ ዶሲቴ፤ ፒርዳ ፒርዲዛሶን ቱሙ ፒርዳ ጌላሶፒቴ። ጎዳይ ሳሎ ጾሳይ ኣቲዳ ኢስራኤሌ ኣሳ ማራናኮ ኦኔ ኤሪዛይ?

¹⁶ ሄሳ ጊሻስ ጎዳይ ሳሎ ጾሳይ፥ «ኦጌ ቦላኔ ዱቡሻይ ዲዛሶን ኡባን ዋሶይኔ ዬሆይ ሲዬታና፤ ጎሻንቻቲ ኮይሳስ ዚላሊዛይቲ ዬሆስ ጼይጌታና።

¹⁷ ዎይኔ ሚ ቶኬቲዛሶን ኡባን ዬሆ ጻላ ጊዳና፤ ሄሲካ ዉሪ ሃናናይ ታ ኢንቴ ጊዶራ ኣዛ ጊሻሳ» ጌስ።

ጾሳ ፒርዳ ጋላሳ

¹⁸ ኢንቴኖ ጎዳ ጋላስ ናጊዛይቶ! ኢንቴስ ኣዬ ኣና! ሄ ጋላሳይ ማፔ ኣቲን ፖኦ ጋላስ ጊዶንታ ጊሻስ ኢንቴ ኣይስ ሄ ጋላሳ ኮዬቲ?

¹⁹ ሄ ጋላሳይ ኣሲ ጋሞፌ ኣታናስ ቆቴቲሼ ዛርዶራ ጋጊዛ ማላ ዎይኮ ኬሲ ኤኪ ባሶ ጌሊዲ ባ ኩሼን ኬ ጎዳ ኦይኪን ሾሺ ዱኪዳ ማላ ሃናና።

²⁰ ጎዳይ ፒርዲዛ ጋላሳይ ኢንቴስ ማፔ ኣቲን ፖኦ ጊዴና፤ ሄ ጋላሳይ ኢዛን ኣይኮ ፖኦይካ ባይንዳ ጊርዲ ጊዳ ማ ጊዳና።

²¹ «ታኒ ኢንቴ ላይን ላይን ቦንቺዛ ባኣሌዛ ካይሲኔ ኢጻይስ፤ ኢንቴ ጎይኖስ ሺቂዛ ሺቆይካ ታና ኡፋይሴና።

²² ታማን ጹጌቲዛ ያርሾኔ ካ ያርሾ ኢንቴ ታስ ሺሺኮካ ታ ሄሳ ኢንቴፌ ኤኪኬ፤ ኬቲዳ ኢንቴ ሜሄታፔ ኢንቴ ታስ ኢሲፌቴ ያርሾስ ሺሺኮ ታ ኢዛ ኣይፌንካ ጼሊኬ።

²³ ኢንቴ ዬጺሼ ታ ሃይን ካጮፍቴ፤ ኢንቴ ዲ ጊሪስ ታ ሲያናስ ኮይኬ።

²⁴ ጊዶ ኣቲን ቱሙ ፒርዳይ ጎጊዛ ሃ ማላ፤ ጺሎቴካ ሚጮንታ ፑልቶ ማላ ጎጎ።

²⁵ «ኢስራኤሌ ኣሳዉ! ቱማፔ ኢንቴ ኦይዱ ታሙ ላይ ባዞ ቢታን ዲዛ ዎዴ ቱሙ ያርሾኔ ካ ጼራ ታስ ሺሺዴቲ?

²⁶ ኢንቴ ኢንቴስ ኦዳ፥ ‹ካዎ ዛኩቴ› ጌቴቲዛ ኤቃ ጾሳዛ፤ ቃሴካ፥ ‹ኬዌኔ› ጌቴቲዛ ኢንቴ ሜ ኬሲዳ ጾሊንቴ ሚሳቲዛ ኤቃ ጾሳታ ቶኪዴታ።

²⁷ ታኒ ኢንቴና ዳማስቆፌ ጌዴ ሃሳ ጎዳና» ጌስ ጎዳይ ሳሎ ጾሳይ።