ኣሞጼ ቲንቢቴ 3 - ጋሞ ማጻፋ

ኢስራኤሌ ኣሳ ቦላ ጋካና ሃንቆ

¹ ኢስራኤሌ ኣሳዉ! ጊብጼፔ ኬዚዳ ኢስራኤሌ ኣሳስ ኢንቴስ ጎዳይ ዮቲዳ ቃላ ሃይሳ ሲዪቴ።

² ጾሳይ፥ «ኩሜ ኣላሜን ዲዛ ዴሬ ኡባፌ ታ ኢንቴና ጻላ ዶራዲስ፤ ኢንቴ ኦዛ ናጋራ ኡባ ጊሻስ ታ ኢንቴና ቃጻያይስ» ጌስ።

³ ናምኡ ኣሳቲ ኦጌ ኢሲፌ ባና ጊዲ ቃቾንታ ኣጊኮ ኢሲፌ ባናስ ዳንዳይዞ?

⁴ ጋሞይ ዎራ ጊዶን ኣይኮ ሚዛ ሚሽ ሻንካቲ ዴሞንታ ዲሼ ጮ ሜላ ጻጊ ኤሪዜ? ዎዳላ ጋሞይ ኣይኮ ሚዛ ሚሽ ዴሞንታ ዲሼ ባ ዲዛሶን ጮ ሜላ ባ ቃላ ሲሲ ኤሪዜ?

⁵ ያርዴይ ዎይኮ ጊቴይ ባይንዳሶን ጮ ሜላ ጋዴን ካፎይ ኦይኬቲ ኤሪዜ? ዎይኮ ዲዛይ ኢሲ ሚሺ ባና ቦቾንታ ዲሺን ጮ ሜላ ፒሪ ኤሪዜ?

⁶ ካታማ ጊዶን ኦላስ ዛዬይ ፑኔቲሺን ባቦን ኮኮሮንታ ኣሲ ዲ ኤሪዜ? ጎዳ ሼኔይ ባይንዳ ዲሺን ካታማ ቦላ ኢታ ሚሺ ጋኪ ኤሪዜ?

⁷ ጎዳይ ባ ጹራ ባ ኦሳንቻ ናቤታስ ኮይሮቲ ዮቶንታ ዲሼ ኣይኮካ ኦና።

⁸ ጋሞይ ጻጊን ሲዪዲ ዳጋሞንታይ ኦኔ? ጎዳይ ባ ጹራ ኢዛስ ዮቲን ቲንቢቴ ሃሳዮንታይ ኦኔ?

ሳማሪያ ኩንዴ

⁹ ኣሽዶዴኒኔ ጊብጼን ዲዛ ሚጻታን ዲዛ ኡባስ፥ «ሳማሪያ ዙማታ ቦላ ሺቂቴ፤ ሄን ኢስታን ኦሴቲዛ ጌኔ ኦሶኔ ቡልኣኬቲዛይሳ ጼሊቴ» ጊ ኣዋጂቴ።

¹⁰ ጎዳይ፥ «ሃይቲ ዴሬቲ ሎኦ ኦሶ ኤሬቴና። ማካላኒኔ ጌኔን ኤኪዳ ሚሻን ባ ሚጻ ኩንቴስ።

¹¹ ሄሳ ጊሻስ ኢንቴ ዴሬ ሞርኬይ ዎራጃና፤ ኢንቴ ሚጻታ ላሊዲ ኢንቴ ኬካ ቦንቃና» ጌስ።

¹² ጎዳይ፥ «ሄንንቻይ ጋሞ ዶናፔ ዶርስ ዎ ኤኪዛ ዎዴ ዶርሳስ ናምኡ ጌዳታ ዎይኮ ዱጻ ሃይታ ዎ ኤኪዛ ማላ ሳማሪያ ቢታን ኢሻሎን ኡቲዳ ኢስራኤሌ ኣሳፔ ጉቲ ጻላ ኣታና» ጌስ።

¹³ ሳሎ ጎዳይ፥ «ሄኮ ኣኔ ሃይሳ ሲዪቴ! ያቆቤ ዜሬ ቦላ ማርካቲቴ።

¹⁴ ኢስቲ ኦዳ ናጋራ ጊሻስ ታኒ ኢስራኤሌ ኣሳ ቃጻዪዛ ዎዴ ቤቴሌን ዲዛ ያርሾ ያርሺዛሶሆታ ታኒ ላላና፤ ያርሺዛሶሆታ ቦላ ዲዛ ካጬቲ ሜቄሬቲ ኩንዳና።

¹⁵ ኢስቲ ኢዛን ቦኔኔ ባልጎ ዲዛ ኬታ ኡባ ታ ላላ ይሳና፤ ዳንጋርሳ ዛሌን ሎኤ ኣሌቂሲዳ ኬቲ ዉሪካ ላሌታና፤ ጊታ ኬቲ ዉሪካ ያና» ጌስ።