ኣሞጼ ቲንቢቴ 2 - ጋሞ ማጻፋ

¹ ጎዳይ ሞኣቤስ፥ «ሞኣቤ ኣሳይ ዛሪ ዛሪዲ ኦዳ ናጋራ ጊሻስ ታ ኢስታ ቃጻዮንታ ኣጊኬ፤ ኢስቲ ኤዶሜ ካዎ ሜቄ ቢዲን ጊዳና ጋካናስ ጹጊዳ።

² ሄሳ ጊሻስ ታኒ ሞኣቤ ቦላ ታማ ዬዳና፤ ሄ ታማይ ቂሪያቴ ሚጻታ ማና። ኦላንቻቲ ማጉል፥ ዋሶኔ ዛዬ ጊሪስ ሲሲሼ ሞኣቤ ኣሳ ዎ ዉርሳና።

³ ታኒ ኢስታ ሃሪዛ ካዎዛኔ ዳናታ ኡባ ይሳና» ጌስ።

⁴ ጎዳይ ዩሁዳ፥ «ዩሁዳ ኣሳይ ዛሪ ዛሪዲ ኦዳ ናጋራ ጊሻስ ታ ኢስታ ቃጻዮንታ ኣጊኬ፤ ኢስቲ ታ ዎጋ ካዳ፤ ታ ኣዛዞታካ ናጎንታ ኢጺዳ፤ ካሴ ኢስታ ኣዋቲ ጎይኒዳ ኤቃ ጾሳታ ካሊዲ ኢስቲ ባሌቲዳ።

⁵ ሄሳ ጊሻስ ታኒ ዩሁዳ ቦላ ታማ ዬዳና፤ ሄ ታማይ ዬሩሳላሜ ሚጻታ ማና» ጌስ።

⁶ ጎዳይ ኢስራኤሌስ፥ «ኢስራኤሌ ኣሳይ ዛሪ ዛሪዲ ኦዳ ናጋራ ጊሻስ ታ ኢስታ ቃጻዮንታ ኣጊኬ። ጺሎ ኣሳታ ቢራስ፥ ሜቶቲዳይሳ ቶሆ ጫማስ ባይዚዳ።

⁷ ኢስቲ ማንቆታ ጉዱላ ቦላ ጌንዴሪሲዲ ኢስታ ሁኤ ዬቴቴስ፤ ቆሄቲዳይታስ ጌላ ፒርዴቴስ፤ ኣዋይኔ ናይ ኢሲ ማጫሳይራ ላይማቴቴስ፤ ኢስቲ ሄሳ ኦ ኦዲ ታ ሱን ቱኒሴቴስ።

⁸ ኣሳፔ ኦይሶ ኤኬቲዳ ማይኦ ሂጺዲ ያርሾ ያርሺዛሶዛ ጋርሳን ኣቄቴስ፤ ኢስቲ ባንታ ጾሳ ኬን ኤዳሲ ኤኪዲ ዎይኔ ኡሹ ኢዛን ኡዬቴስ።

⁹ «ኢስታስ ኣዱሳቴይ ዚጋ ሚ ማላ፤ ሚኖቴይካ ጺዳ ማላ ጊዲዳ ኣሞሬ ኣሳ ታኒ ኢንቴ ሲንፌ ይሳዲስ፤ ኣይፎንታ ማላ ጻጶፔ ሾዳ ዲጋዲስ።

¹⁰ ታኒ ኢንቴስ ኣሞሬ ዴሬ ቢታ ኢማናስ ኢንቴና ጊብጼፔ ኬሳዲስ፤ ኦይዱ ታሙ ላይ ኩሜ ባዞራ ካሌ ኤሃዳ ላቲሳዲስ።

¹¹ ቃሴካ ታኒ ኢንቴ ኣቱማ ናይታ ጋርሳፌ ናቤታ፥ ናቴታ ጊዶፌ ናዚራዌታ ዴንዲስ። ኢስራኤሌ ዴሬዞ! ሄሲ ቱሙ ጊዴኔ?» ጌስ።

¹² ጾሳይ፥ «ኢንቴ ጊዲኮ ናዚራዌታ ዎይኔ ኡሹ ኡሺዴታ፤ ናቤታካ ቲንቢቴ ዮቶንታ ማላ ኣዛዚዴታ።

¹³ ቤኢቴ ዳሮ ካ ዴጼቲ ጫኔቲዳ ጋሬይ ጋርሳራ ዲዛ ሚሽ ሊቂሲዛ ማላ ታኒካ ኢንቴና ሊቂሳና።

¹⁴ ፒላታ ኣሲ ኬሲ ኤኪ ኣቴና፤ ሚኖይካ ባ ሚኖቴን ማዴቴና፤ ዎልቃማይካ ባ ሼምፖ ኣሼና።

¹⁵ ዎንዳፌ ኦይኪዳዴይ ባ ዲዛሶን ሚኒ ኤቂዲ ኦላ ዛሬና፤ ፒላታ ኦላንቻይካ ዎጺ ኣቴና፤ ቶጋንቻይካ ባ ሼምፖ ኣሼና።

¹⁶ ኦላ ቃራቲካ ሄ ጋላስ ጎሮ ካሎ ባቃታና» ጌስ።