ኣሞጼ ቲንቢቴ 1 - ጋሞ ማጻፋ

¹ ኦዚያይ ዩሁዳ ካዎ፤ ሄሳካ ኢዮኣሳ ና ኢዮርባኣሜይ ኢስራኤሌ ካዎ ጊዲ ዲሺን ሄሲካ ቢታይ ቃጻናፔ ናምኡ ላይፌ ሲንን ኢስራኤሌ ጊሻስ ቴቁሄን ሜሄ ሄሚዛይታ ጊዶፌ ኣሞጼይ ቤኢዲ ዮቲዳ ቃላይ ሃይሳፌ ካሊ ዲዛይሳ፤

² ኣሞጼይ፥ «ጎዳይ ጺዮኔፔ ባ ቃላ ቁ ሂስቲ ሲሴስ፤ ዬሩሳላሜፔ ጊሬስ፤ ሜሄይ ሄሜቲዛሶቲ ሜላና፤ ቃርሜሎሴ ዙማን ዲዛ ጪሊላቲ ሹላና» ጊዴስ።

ኢስራኤሌ ሄራን ዲዛ ዴሬታ ቦላ ያና ፒርዳ

³ ጎዳይ ኣራሜስ፥ «ዳማስቆ ኣሳይ ዛሪ ዛሪዲ ኦዳ ናጋራ ጊሻስ ታ ኢስታ ቃጻዮንታ ኣጊኬ፤ ኢስቲ ጋላኣዴ ኣሳ ቢራታ ኣቻራ ዲዛ ካ ቡኪዛ ሎዳን ቡኪዳ።

⁴ ካዎ ኣዛሄሌ ኬን ታማ ዬዳና፤ ሄ ታማይ ካዎ ቤኒ-ሃዳዴ ሚጻታ ማና።

⁵ ዳማስቆ ካታማ ፔንጌታ ታ ሜንሬና፤ ቤቲ-ኤዴኔ ዴሬ ካዎዛኔ ኣዌ ዙላን ዲዛ ኣሳ ታ ይሳና፤ ኣራሜ ዴሬ ኣሳይካ ዲኤቲዲ ጌዴ ቂሬ ዴሬ ባና» ጌስ።

⁶ ጎዳይ ፊሊስጼሜስ፥ «ጋዛ ኣሳይ ዛሪ ዛሪዲ ኦዳ ናጋራ ጊሻስ ታ ኢስታ ቃጻዮንታ ኣጊኬ፤ ኢስታ ዴሬዛ ኡባ ዲኢ ኤፊዲ ኤዶሜስ ባይዚዳ።

⁷ ኢዚ ጊምቤታ ማና ማላ ጋዛ ሚጻን ታኒ ታማ ዬዳና።

⁸ ኣስቄሎና ዴሬ ካዎዛኔ ኣሽዶዴ ዴሬ ኣሳ ታ ፒታ ይሳና፤ ፊሊስጼሜን ዲዛይቲ ዉሪ ዉራና ጋካናስ ታኒ ታ ኩሼ ኣቃሮኔ ቦላ ዴንና» ጌስ።

⁹ ጎዳይ ጺሮሴስ፥ «ጺሮሴ ኣሳይ ዛሪ ዛሪዲ ኦዳ ናጋራ ጊሻስ ታ ኢስታ ቃጻዮንታ ኣጊኬ፤ ኢስቲ ባ ኢሻቴ ጫቆ ቃላ ላሊዲ ባ ዲኢዳ ዴሬዛ ኡባ ኤዶሜስ ባይዚዳ።

¹⁰ ሄሳ ጊሻስ ታኒ ጺሮሴ ካታማ ጊምቤታ ቦላ ታማ ዬዳና፤ ሄ ታማይ ኢዚ ሚጻታካ ማና» ጌስ።

¹¹ ጎዳይ ኤዶሜስ፥ «ኤዶሜ ኣሳይ ዛሪ ዛሪዲ ኦዳ ናጋራ ጊሻስ ታ ኢስታ ቃጻዮንታ ኣጊኬ፤ ኢስቲ ባ ኢሻታ ኢስራኤሌ ናይታስ ቃቶንታ ማሻን ጎዲዳ፤ ባ ሃንቆ ዶሺሶንታ ኤጺዲ ኢስታስ ሚሼቶንታ ኡባ ዲፒ ሂስቲዳ።

¹² ሄሳ ጊሻስ ታኒ ቴማኔ ጊምቤታ ቦላ ታማ ዬዳና፤ ሄ ታማይ ቦጺራ ሚጻታካ ማና» ጌስ።

¹³ ጎዳይ ኣሞኔስ፥ «ኣሞኔ ኣሳይ ዛሪ ዛሪዲ ኦዳ ናጋራ ጊሻስ ታ ኢስታ ቃጻዮንታ ኣጊኬ፤ ኢስቲ ዴሬ ዛዋ ኣሳናስ ጋላኣዴ ዴሬ ሻራ ማጫሳታ ኡሎ ዳኪዳ።

¹⁴ ሄሳ ጊሻስ ኤራባ ካታማ ጊምቤታ ቦላ ታኒ ታማ ዬዳና፤ ሄ ታማይ ኢስታ ሚጻታ ማና። ሄሳፌ ጉዬ ኦላ ጋላሳን ዋሶይ ዳራና፤ ኦላዚካ ጎቴ ጫርኮ ማላ ኤሶታና።

¹⁵ ኢስታ ካዎይኔ ዳናቲ ዲኤታና» ጌስ።