2ጺምቶሳስ 3 - ጋሞ ማጻፋ

ዉርሴ ዎዴን ያና ሜቶታ

¹ ጊዶ ኣቲን ዎዴ ዉርሴን ኣስ ሜቲዛ ዎዴይ ያናይሳ ኔ ኤራ።

² ኣሳይ ባና ዶሲዛዴ ጊዳና፤ ሚሽ ሲቂዛይታ፥ ባናን ጬቄቲዛይታ፥ ኦቶራንቻታ፥ ጫሻንቻታ፥ ባና ዬሊዳይታስ ኣዛዜቶንታይታ፥ ጋላቶንታይታኔ ጌሻቴ ባይንዳይታ፥

³ ሲቆይ ባይንዳይታ፥ ኣቶ ጊ ማሮንታይታ፥ ኣሳ ሱን ሞሪዛይታ፥ ባርካ ባና ሃሮንታይታ፥ ሜንጼ ኢታታ፥ ሎኦ ሚሽ ዶሶንታይታ፥

⁴ ካዲዛይታ፥ ናጌቶንታይታ፥ ጮ ሜላ ኦቶሬቴን ኩሚዳይታ፥ ጾሳፌ ኣዲ ሎኦ ዴ ዶሲዛይታ ጊዳና።

⁵ ኣማኒዛ ኣስ ሚሳታና ሺን ኣማኖስ ዲዛ ዎልቃ ካዳና፤ ሄይታ ማላታፔ ኔ ሃካ።

⁶ ሄይታንቲ ኢሲ ኢሲ ኬ ካልጺ ጌሊዲ ዳሮ ዴጾ ናጋራኒኔ ዱማ ዱማ ኢታ ኣሞቴ ጋርስ ጌሊዲ ያኔ ሃ ቃጺዛ ኣማኖን ላፋ ማጫሳታ ቃጺ ኦይኬቴስ።

⁷ ሄይታ ማላ ማጫሳቲ ኡባ ዎዴ ታማሬቴስ ሺን ቱማ ኤሬቴና።

⁸ ኢያኔሲኔ ኢያንባራሲ ሙሴ ቦላ ዴንዲዳ ማላ ሃይቲካ ኢስታ ቆፋይ ሞሬቲን ባስ ኣማኖፔ ኩንዲዳ ጊሻስ ቱማቴ ኢጼቴስ።

⁹ ጊዶ ኣቲን ኢስታ ቆፋይ ኩሜና፤ ጋሶይካ ኢያኔሳኔ ኢያንባራሳ ኤያቴ ኣሳስ ቆንጪዳ ማላካ ሃይታ ሃኖይካ ኡባስ ቆንጫና።

ጳዉሎሲ ጺምቶሳስ ኢሚዳ ሃዳራ

¹⁰ ኔ ጊዲኮ ታ ቲሚርቴዛ፥ ታ ዱሳ፥ ታ ዋና ቆፋ፥ ታ ኣማኖዛ፥ ታ ዳንዳያ፥ ታ ሲቆዛኔ ታ ሚኖቴ ኡባ ኤራሳ።

¹¹ ታ ጎዴቴኔ ታ ዋዬዛ ኣንጾኪያን፥ ኢቆኒዮኒኔ ሊስቲራንካ ታ ቦላ ጋኪዳይሳ ኡባ ታኒ ዳንዳያን ኤኪዳይሳ ኔ ኤራሳ፤ ጊዲኮካ ጎዳይ ሄሳ ኡባፌ ታና ኣሺዴስ።

¹² ቱማፔ ዬሱስ ኪርስቶሳ ጌሻ ዎዚናፔ ኣማኒ ዳና ጊዛይቲ ዉሪካ ጎዴቲዛይታ ጊዳና።

¹³ ኢታ ጊዲዳ ባሌዛ ኣሳቲ ባስ ባሌቲዲ ኣሳ ባሌሼ ኢታቴ ቦላ ኢታቴ ጉጂ ጉጂ ባና።

¹⁴ ኔ ጊዲኮ ካሴ ኔ ታማራዳ ኤሪዳ ኦጌን ሚና፤ ሄሳ ኦናፔ ታማርዳኮ ኔ ኤራሳ።

¹⁵ ኔ ጉ ናቴፌ ሃኢ ጋካናስ ዬሱስ ኪርስቶሳ ኣማኖን ኣቶቴ ቤቲዛ ቲሚርቴ ኢሚዛ ጌሻ ማጻፋታ ሎኤ ኤራዳሳ።

¹⁶ ጌሻ ማጻፋቲ ዉሪካ ጾሳ ኣያናይ ካሌን ጻፌቲዳይታ፤ ኢስቲካ ኣስ ታማርሳናስ፥ ሃንቃናስ፥ ሱሪሳናስ ቃሴካ ጺሎቴ ኦጌን ካሌናስ ጎኤቴስ።

¹⁷ ሄሲካ ጾሳ ኣሲ ሎኦ ኦሶ ኡባስ ቤሲዛዴ ጊዳና ማላሳ።