2ሳሜላ ማጻፋ 1 - ጋሞ ማጻፋ

ዳዊቲ ሳኦሌ ሃይቆ ሲስ

¹ ሳኦሊ ሃይቂዳፔ ጉዬ ዳዊቲ ኣማሌቄ ኣሳ ኦሊ ጾኒዲ ሲሚዴስ፤ ጺጊላጌንካ ናምኡ ጋላስ ጋምኢዴስ።

² ሄን ጋላስ ዳኬቲዳ ማይኦ ማይኢዲ ባ ሁኤ ቦላ ጉዱላ ላሊዲ ኢሲ ናቴ ና ዳይሲ ሳኦሌ ጉታፔ ዪዴስ። ዳዊቴኮ ጋኪዳ ማላ ዛቁል ዚርጺ ጊዲ ቦንቾስ ኩሼ ዴንዴስ።

³ ዳዊቲካ ኢዛ፥ «ኔ ኣዋፔ ያዲ?» ጊዲ ኦይቺዴስ። ኢዚ ቃሴ፥ «ታኒ ኢስራኤሌ ኣሳይ ዲዛሶፔ ኬሳ ኤካ ያዲስ» ጊዴስ።

⁴ ዳዊቲ ቃሴ ኢዛ፥ «ኣዜ ዋኒዳይ ኣኔ ታስ ኡባ ዮታ» ጊዲ ኦይቺዴስ። ኢዚካ ዳዊቴስ፥ «ኣሳዚ ኦላሶፔ ባቃቲዴስ፤ ዳሮይ ኩንዲዴስ፤ ሳኦሊኔ ኢዛ ና ዮናታኔይ ሃይቂዳ» ጊዴስ።

⁵ ሄሳፌ ጉዬ ዳዊቲ ዎሬዛ ኢዛስ ዮቲዳ ናዛ፥ «ሳኦሊኔ ኢዛ ና ዮናታኔይ ሃይቂዳይሳ ኣዛን ኤራዲ?» ጊ ኦይቺዴስ።

⁶ ዎሬዛ ኢዛስ ዮቲዳ ናቴ ናዚ ኢዛስ ዛሪዲ፥ «ቶሮንታ ዳሼ ታኒ ፑዴ ጊልቦኣ ዙማ ቦላ ኬዛዲስ፤ ሳኦሊ ሄን ባ ቶራ ቦላ ዜምፒ ዲሺን ፓራ-ጋሬቲኔ ቶጋ ኣሳይ ጎዴሬሼ ኢዛ ቦላ ጋኪ ዎዳ።

⁷ ኢዚካ ጉዬ ሲሚ ጼሊዲ ታና ቤኢዲ ጼይጊዴስ፤ ታኒካ፥ ‹ታ ኔስ ኣይ ኦ?› ጋዲስ።

⁸ «ኢዚካ ታና፥ ‹ኔ ኦኔ?› ጊ ኦይቺዴስ። ታኒካ ኢዛስ፥ ‹ታኒ ኣማሌቄ ኣሳ› ጋዳ ዮታዲስ።

⁹ «ኢዚካ ታስ፥ ‹ታ ሃይቃናስ ቶቃይስ፤ ጊዶ ኣቲን ታስ ሼምፖይ ኬዞንታ ኢጺዴስ፤ ዛይ ሃ ያ፤ ታና ሼምፒሳ› ጊዴስ።

¹⁰ ሂስቲን ታኒ ኢዚ ኩንዲቺዳፔ ጉዬ ኣቶንታይሳ ኤራዳ ታ ኢዛኮ ሺቃዳ ኢዛ ዎዲስ። ኢዛ ሁኤ ቦላ ዲዛ ካላቻዛኔ ኢዛ ቄሴ ሳጋዮዛ ኤካዳ ሄኮ ታ ጎዳስ ኤሃዲስ» ጊዴስ።

¹¹ ሄሳፌ ጉዬ ዳዊቲኔ ኢዛራ ዲዛ ኣሳይ ኡባይ ባንታ ማይኦ ዳኪዳ።

¹² ኢስቲ ማሻን ሲፌቲዳ ጊሻስ ሳኦሌሲኔ ኢዛ ና ዮናታኔስ፥ ጎዳ ኦላንቻታሲኔ ኩሜ ኢስራኤሌ ኣሳስ ካዮቲዳ፥ ዬኪዳኔ ኦማርስ ጋካናስ ጾሚዳ።

¹³ ዳዊቲ ቃሴ ሄ ዎሬዛ ኢዛስ ኤሂዳ ናቴዛ፥ «ኔ ኣዋፔ ያዲ?» ጊ ኦይቺዴስ። ናዚካ፥ «ታኒ ኔ ዴሬን ቤቲ ዲዛ ኣማሌቄ ኣሳ ና» ጊዴስ።

¹⁴ ዳዊቲ ቃሴ፥ «ሂስቲን ኔኒ ጎዳይ ቲይዳይሳ ይሳናስ ኔ ኩሼ ዋና ጻላ ዴንዲ?» ጊ ኦይቺዴስ።

¹⁵ ሄሳፌ ጉዬ ዳዊቲ ናቴታፔ ኢሳ ጼይጊዲ፥ «ኔኒ ኢዛኮ ሺቃዳ ኢዛ ዎ» ጊዴስ። ሄ ናቴዚ ኣማሌቄዛ ጫዲ ዎዴስ።

¹⁶ ዳዊቲካ ኣማሌቄዛ፥ « ‹ጎዳይ ቲይዳይሳ ታኒ ዎዲስ› ጋዳ ኔ ቦላ ኔርካ ኔ ማርካቲዳ ጊሻስ ኔ ሱ ጎሜይ ኔ ቦላ ጊዶ!» ጊዴስ።

ሳኦሌ ጊሻሲኔ ዮናታኔ ጊሻስ ሺቂዳ ዚላሳ ጊንጾ

¹⁷ ዳዊቲ ሳኦሌ ጊሻሲኔ ዮናታኔ ሃይቆ ጊሻስ ዚላሊሼ ዬኪዴስ።

¹⁸ ቃሴካ፥ «ዎንዳፌ ሚላስ» ጌቴቲዛ ዚላሳ ዩሁዳ ዴራ ታማርሳና ማላ ኣዛዚዴስ። ሄሲ ያሻሬ ማጻፋን ጻፌቲ ኡቲዴስ።

¹⁹ «ሃይሶ ኢስራኤሌ! ኔ ቦንቾይ ዙምቡላታ ቦላ ጫዴቲ ሃይቂዴስ፤ ኦላ ቃራቲ ዋኒ ሃይሳ ኩንዲዶ!

²⁰ «ፊሊስጼሜ ማጫ ናይቲ ኡፋዬቶንታ ማላ፥ ቃጻሬቶንታ ኣሳ ማጫ ናይቲ ኢሊሎንታ ማላ፥ ሃይሳ ጌቴን ዎሬሶፒቴ፤ ኣስቄሎናንካ ኣዋጆፍቴ።

²¹ «ኢንቴኖ ጊልቦኣ ዙማቶ! ኢንቴ ቦላ ኢራይ ቡኮፎ፤ ጻዛይካ ኢንቴ ቦላ ዶፖ፤ ያርሾስ ጊዲዛ ካ ኢንቴ ጎሻ ቢታን ሞኮፎ። ሄን ኦላ ቃራዛ ጎንዳሌይ ቱኒዴስ፤ ሳኦሌ ጎንዳሌይ ሃይሳፌ ጉዬን ዛይቴን ቁጬቴና።

²² ዮናታኔ ዎንዳፌይ ዎንታ ሲሚ ኤሬና፤ ሳኦሌ ማሻይካ ሞርኬ ቃንጼሬ ዬጌስ፤ ዎልቃማታካ ሜንሬ ዬጌስ፤ ኢዛ ሞርኬታካ ዎዴስ።

²³ «ሳኦሊኔ ዮናታኔይ ሼምፖራ ፓጻ ዲሼ ሲቄቲዛይታኔ ቆፋን ጋይቲዛይታ። ሃይቂሼካ ሻኬቶንታይታ፤ ጎሌ ካፎፔ ፒላቲዛይታ፤ ጋሞፌካ ሚኒዛይታ።

²⁴ «ኢንቴኖ ኢስራኤሌ ማጫሳቶ! ኦቻ ቴራ ሚሳቲዛ ኣልኦ ቃሚሳ ኢንቴና ማይዚዳ፤ ኢንቴ ማይኦዛ ዎርቃ ጺባቤን ኣሌቂሲዳ፤ ሳኦሌስ ዬኪቴ።

²⁵ «ኦላ ቃራቲ ዋኒ ሃይሳ ማላ ኦላሶን ኩንዲዶ! ዮናታኔይ ኔ ዙምቡላታ ቦላ ጫዴቲ ሃይቂዴስ።

²⁶ ታ ኢሻ ዮናታኔ! ታኒ ኔ ጊሻስ ካዮታዲስ፤ ኔ ታስ ኬሃ ኣልኦኮሺን፤ ኔ ሲቆይ ታና ማላሊሲዛዛኮሺን ማጫ ሲቆፔካ ኬሂ ኣስኮሺን።

²⁷ «ኦላ ቃራቲ ዋኒ ኩንዲዶ! ኦላ ማሳራቲካ ዋኒ ሃዳ ጊዳኔ!»