2ካዎታ ማጻፋ 1 - ጋሞ ማጻፋ

ናቤ ኤላሳኔ ካዎ ኣካዚያሳ

¹ ኣካቤይ ሃይቂዳፔ ጉዬ ሞኣቤ ዴሬይ ኢስራኤሌ ዴሬ ቦላ ዴንዲዴስ።

² ሄ ዎዴ ኣካዚያሲ ሳማሪያን ዲዛ ባ ኢልፒኔ ፖቄ ቦላፌ ማስኮቴራ ዱጌ ኩንዲዲ ሳኬቲዴስ፤ ሄሳ ጊሻስ ኢዚ፥ «ኣኔ ኢንቴ ቢዲ ታ ሳኮዛ ጊሻስ ታ ፓጻናኮ ኣቃሮኔ ኤቃ ጾሳ ባኣሊ-ዜቡላ ታስ ኦይቺቴ» ጊዲ ኣስ ኪቲዴስ።

³ ጎዳ ኪታንቻይ ቴሲቤ ዴሬ ኣስ ናቤ ኤላሳስ፥ «ኔኒ ዴንዳዳ ሳማሪያ ካዎይ ኪቲዳ ኣሳታራ ጋይታናስ ኬዛ ባዳ ሄ ኣሳታስ፥ ‹ኢንቴ ኣቃሮኔ ኤቃ ጾሳ ባኣሊ-ዜቡላ ኦይቻናስ ቢዛይ ኢስራኤሌን ጾሲ ባይንዳ ጊሻሴ?› ጋዳ ኢስታ ኦይቻ።

⁴ ሄሳ ጊሻስ ጎዳይ፥ ‹ኔ ኢቺዳ ሂጻፔ ዴንዳካ፤ ቱማፔ ኔ ሃይቃና› ጌስ» ጊዴስ፤ ሄሳፌ ጉዬ ኤላሲ ቢዴስ።

⁵ ኪቴቲ ቢዳ ኣሳቲ ካዎዛኮ ጉዬ ሲሚ ዪን ኢዚ ኢስታስ፥ «ኣይስ ሲሚ ዪዴቲ?» ጊ ኦይቺዴስ።

⁶ ኢስቲካ ኢዛስ፥ «ኢሳዴይ ኑናራ ጋይታናስ ዪዲ ጎዳይ፥ ‹ኢንቴ ኢንቴና ኪቲ ዬዲዳይሳኮ ሲሚ ቢዲ ኣቃሮኔ ኤቃ ጾሳ ባኣሊ-ዜቡላ ኦይቻናስ ኔኒ ኣስ ኪቲዳይ ኢስራኤሌን ጾሲ ባይንዳ ጊሻሴ? ሄሳ ጊሻስ ኔ ኢቺዳ ሂጻፔ ዴንዳካ፤ ቱማፔ ኔ ሃይቃና› ጊዴስ» ጊዳ።

⁷ ካዎዚካ ኢስታስ፥ «ኢንቴናራ ጋይታና ዪዲ ኢንቴስ ሄሳ ጊዳይ ኢዚ ኣይ ማላ ኣሴ?» ጊዲ ኦይቺዴስ።

⁸ ኢስቲካ ኢዛስ፥ «ኑስ ዮቲዳይሲ ኢስኬራ ዲዛ ማይኦ ማይኢዴስ፤ ጼሳን ዳፎ ዳንጪዴስ» ጊዳ። ካዎዚ ኢስታስ፥ «ታ ኢዛ ኤራዲስ፤ ሄሲ ቴሲቤ ዴሬ ኣስ ኤላሳ» ጊዴስ።

⁹ ሄሳፌ ጉዬ ካዎዚ ሃምሳ ሃላቃዛ ኢቻሽ ታሙ ዎታዳራታራ ኤላሳኮ ዬዲዴስ። ሃምሳ ሃላቃዚ ኤላሲ ዲዛ ዙምቡላ ሁኤ ኬዚዲ፥ «ሃይሶ ጾሳ ኣሶ! ካዎይ ኔና ሃ ዱጌ ዎ ጌስ» ጊዴስ።

¹⁰ ኤላሲካ ዛሪዲ ሃምሳ ሃላቃዛስ፥ «ታኒ ጾሳ ኣስ ጊዲኮ ሳሎፔ ታማይ ዎዲ ኔናኔ ኔናራ ዲዛ 50 ኣሳ ሞ!» ጊዴስ። ሄሳፌ ጉዬ ታማይ ሳሎፔ ዎዲ ሃምሳ ሃላቃዛኔ ኢዛራ ዲዛ ኣሳ ኡባ ዲፒ ሂስቲዴስ።

¹¹ ካዎዚ ቃሴ ሃራ ሃምሳ ሃላቃኔ ኢቻሽ ታሙ ዎታዳራታ ኪቲዴስ፤ ሃምሳ ሃላቃዚካ፥ «ሃይሶ ጾሳ ኣሶ! ካዎይ ኔና ኤሶን ሃ ዎ ጌስ» ጊዴስ።

¹² ኤላሲካ ዛሪዲ፥ «ታኒ ጾሳ ኣስ ጊዲኮ ታማይ ሳሎፔ ዎዲ ኔናኔ ኔናራ ዲዛ 50 ኣሳ ሞ!» ጊዴስ፤ ሄሳፌ ጉዬ ታማይ ሳሎፔ ዎዲ ኢዛኔ ኢዛራ ዲዛ ኣሳ ዲፒ ሂስቲዴስ።

¹³ ሄሳ ጊሻስ ካዎዚ ሄን ሃምሳ ሃላቃዛኔ ኢዛራ 50 ኣስ ዬዲዴስ፤ ሃ ሄን ሃምሳ ሃላቃዚ ቢዲ ኤላሳ ሲንን ጉልባቲዲ፥ «ኣቤት ጾሳ ኣሶ! ታ ሼምፖይኔ ሃይታ ኔ ኣይሌ ኢቻሽ ታማታ ሼምፖይ ኔ ሲንን ቦንቼቶ።

¹⁴ ሃይሳፌ ካሴ ሳሎፔ ዎዳ ታማይ ናምኡ ሃምሳ ሃላቃታኔ ኢስታራ ዲዛ ኣሳታ ኡባ ሚዴስ፤ ሃኢ ጊዲኮ ታ ሼምፒያ ኔ ሲንን ቦንቼቱ» ጊዴስ።

¹⁵ ጎዳ ኪታንቻዚ ኤላሳ፥ «ኔኒ ኢዛራ ዱጌ ዎ፤ ኢዛስካ ባቦፋ!» ጊዴስ። ሄሳ ጊሻስ ኤላሲ ኢዛራ ኢሲፌ ካዎዛኮ ዱጌ ዎዴስ።

¹⁶ ኢዚ ካዎዛስ፥ «ጎዳይ፥ ‹ኔኒ ኣቃሮኔ ኤቃ ጾሳ ባኣሊ-ዜቡላ ኔ ጊሻስ ኦይቻናስ ኣሳታ ኪታ ዬዲዳይ ኢስራኤሌን ጾሲ ባይንዳ ጊሻሴ? ኔኒ ሄሳ ኦዳ ጊሻስ ሃኢ ኔ ኢቺዳ ሂጻፔ ሙሌካ ዴንዳካ፤ ቱሙ ኔ ሃይቃና› ጊዴስ» ጊዲ ዮቲዴስ።

¹⁷ ሄሳ ጊሻስ ኤላሲ ኢዛስ ዮቲዳ ጎዳ ቃላ ማላ ኣካዚያሲ ሃይቂዴስ። ኣካዚያሳስ ኣቱማ ናይ ባይንዳ ጊሻስ ኢዮሳፊጼ ና ኢራሜይ ዩሁዳ ዴሬ ቦላ ካዎቲዳ ናምኣን ላይን ኢዛ ኢሻ ኢዮራሜይ ኢዛሶሆን ካዎቲዴስ።

¹⁸ ኣካዚያሲ ባ ዎዴን ኦዳ ኦሶቲኔ ኢዚ ፖሊዳ ኦሶቲ ኡባይካ ኢስራኤሌ ካዎታ ታሪኬ ማጻፋን ጻፌቲ ዴስ ጊዴኔ?