2ታሪኬ ማጻፋ 12 - ጋሞ ማጻፋ

ዩሁዳ ቦላ ጊብጼ ዎራጆ

¹ ኤሮቢኣሜ ካዎቴይ ሚኒ ኤቂዳ ዎዴ ኢዚኔ ኢስራኤሌ ኣሳይ ኡባይ ጎዳ ዎጋ ዬጊ ኣጊዳ።

² ኢስቲ ጎዳስ ኣማኔቶንታ ኢጺዳ ጊሻስ ኤሮቢኣሜይ ካዎቲዳ ኢቻሻን ላይን ጊብጼ ካዎ ሺሻቂ ዬሩሳላሜ ካታማ ቦላ ዎራጂዴስ።

³ ኢዛራ ኢሲፌ ጊብጼፔ ዪዳይ 1,200 ፓራ-ጋሬታ፥ 60,000 ፓራ ኣሳታኔ ቆዳይ ባይንዳ ሊቢያ ኦላንቻታ፥ ሱካ ኦላንቻታኔ ቶጵያ ኦላንቻታ።

⁴ ካዎ ሺሻቂ ጊምቤቲዳ ዩሁዳ ካታማታ ኦሊ ኦይኪዲ ዬሩሳላሜ ካታማ ጋካናስ ካን ቢዴስ።

⁵ ሄሳፌ ጉዬ ናቤ ሻማኤይ ሺሻቄስ ባቢዲ ዬሩሳላሜን ሺቂ ኡቲዳ ዩሁዳ ካሌዛይታኮኔ ኤሮቢኣሜኮ ዪዲ፥ «ጎዳይ፥ ‹ኢንቴ ታና ኣጊዴታ፤ ሄሳ ጊሻስ ታኒካ ኢንቴና ሺሻቄ ኩሼን ኣ ኢማዲስ› ጌስ» ጊዴስ።

⁶ ካዎ ኤሮቢኣሜይኔ ኢስራኤሌ ካሌዛይቲ ባንታና ካዉሺዲ፥ «ጎዳይ ጺሎ» ጊዳ።

⁷ ኢስቲ ባንታና ካዉሺዳይሳ ጎዳይ ቤኢዲ ሻማኤ ባጋራ ጎዳይ፥ «ኢስቲ ባንታና ካዉሺዳ ጊሻስ ታኒ ኢስታ ኣሻና ኣቲን ይሲኬ። ታ ሃንቆይ ሺሻቄ ባጋራ ዬሩሳላሜ ቦላ ዬና።

⁸ ጊዲኮካ ኢስቲ ታስ ሃሬቴሲኔ ሃራ ቢታ ካዎታስ ሃሬቴስ ጊዶን ዲዛ ዱማቴ ሻኪ ኤራና ማላ ኢስቲ ሺሻቄስ ሃሬታና» ጊዴስ።

⁹ ሄሳ ጊሻስ ጊብጼ ካዎ ሺሻቂ ዬሩሳላሜ ካታማ ኦሊዲ ጾሳ ኬኒኔ ካዎ ኬን ዴኢዛ ቡቁራ ሚሽ ኡባ ኤኪዴስ። ቃሴ ሶሎሞኔይ ዎርቃፌ ኦሲሲዳ ጎንዳሌታካ ኤኪ ኤፊዴስ።

¹⁰ ኢዚ ኤፊዳ ዎርቃ ጎንዳሌታ ጊሻስ ካዎ ኤሮቢኣሜይ ጻርቂማላፔ ሃራ ጎንዳሌታ ኦሲሲዲ ካዎ ኬ ፔንጌ ናጊዛይታ ሃላቃዚ ኣላፌቴን ኦይካና ማላ ኢሚዴስ።

¹¹ ካዎይ ጎዳ ኬ ጌሊዛ ዎዴ ኡባን ዛቤቲ ሄ ጎንዳሌታ ኦይኪዲ ኢዛ ኣጃቤቴስ፤ ሄሳፌ ጉዬ ጎንዳሌታ ዛሪዲ ዛቤታ ኬን ዎቴስ።

¹² ኤሮቢኣሜይ ባና ካዉሺዳ ጊሻስ ኢዚ ኡባራ ዮንታ ማላ ጎዳ ሃንቆይ ኢዛፔ ሲሚዴስ። ዩሁዳ ቢታስ ኡባ ሚሺ ኢንጄቲዴስ።

ቃንራ ኤሮቢኣሜ ካዎቴ ታሪኬ

¹³ ካዎ ኤሮቢኣሜይ ዬሩሳላሜን ሚኒ ካዎቲዴስ፤ ኤሮቢኣሜይ ካዎቲሺን ኢዛስ ላይይ 41 ጊዲዴስ፤ ጎዳይ ባ ሱን ሄን ዎናስ ኢስራኤሌ ቢታ ኡባፌ ዶሪዳ ዬሩሳላሜ ካታማን 17 ላይ ካዎቲዴስ። ኤሮቢኣሜ ኣዬያ ኣሞኔ ዴሬ ኣስ ናኢሞ።

¹⁴ ኤሮቢኣሜይ ጎዳ ዎዚናፔ ኮዮንታ ጊሻስ ኢታ ሚሽ ኦዴስ።

¹⁵ ኤሮቢኣሜይ ኮይሮፔ ዉርሴ ጋካናስ ሃኒዳይሲኔ ኢዛ ዬሌታ ማራይ ናቤ ሻማኤ ታሪኬ ማጻፋኒኔ ኢዶይ ቤኢዳ ኣጁታ ማጻፋን ጻፌቲ ኡቲዴስ። ኤሮቢኣሜይኔ ኢዮርባኣሜይ ኡባ ዎዴ ኦሌቲሼ ዴኢዳ።

¹⁶ ኤሮቢኣሜይ ሃይቂዴስ፤ ዳዊቴ ካታማንካ ሞጌቲዴስ፤ ኢዛሶሆን ኢዛ ና ኣቢያይ ካዎቲዴስ።