1ካዎታ ማጻፋ 4 - ጋሞ ማጻፋ

ሶሎሞኔይ ሱንዳ ሹሜታ

¹ ካዎ ሶሎሞኔይ ኢስራኤሌ ቢታ ኡባ ቦላ ካዎቲዴስ።

² ኢዚ ሹሚዳ ኣላፌቲ ሃይሳፌ ካሊ ጻፌቲዳይታ። ሳዶቄ ና ኣዛሪያሲ ቄሴ።

³ ሺሻ ናይቲ ኤሊሆሬፊናይኔ ኣካያይ ዋና ጻፌታ፤ ኣሂሉዴ ና ኢዮሳፊጼይ ታሪኬ ጻፌ፤

⁴ ዮዳሄ ና ባናያይ ኦላ ጋዳዋ፤ ሳዶቄይኔ ኣቢያታሬይ ቄሴታ፤

⁵ ናታኔ ና ኣዛሪያሲ ዴሬ ኣይሲዛይታስ ኣላፌ፤ ናታኔ ና ዛቡዴይ ቄሴኔ ካዎስ ማታ ዞራንቻ፤

⁶ ኣሂሻሬይ ካዎ ኬ ኣላፌ፤ ኣቢዳ ና ኣዶኒራሚ ኡንኤቲዲ ዎልቃ ኦሶ ኦዛይታ ኣላፌ።

⁷ ቃሴ ሶሎሞኔስ ኢስራኤሌ ቢታ ኡባን ታማኔ ናምኡ ዴሬታ ኣይሲዛይቲ ዴቴስ፤ ኢስቲ ካዎሲኔ ካዎሶን ዲዛ ኣሳ ኡባስ ሚዛ ካ ሺሺዛይታ፤ ኢስቲ ታራን ታራን ላይ ጊዶን ኢሲ ኢሲ ኣጊናስ ጊዲዛ ካ ኤሄቴስ።

⁸ ኢስታ ሱንኔ ኢስታ ኣይሲዛ ዞኔቲ ሃይሳፌ ካሊዲ ጻፌቲዳ። ቤኒ-ሁሬይ ኤፍሬሜ ጌዜ ኣይሴስ።

⁹ ቤኒ-ዲቃሬይ ማቃጻ፥ ሻኣልቢሜ፥ ቤቲ-ሼሚሼኔ ኤሎኔኔ ቤቲ-ሃናኔ ዴሬታ ኣይሴስ።

¹⁰ ቤኒ-ሄሴዲ ኣሩቦቴ ዴሬን ዲዛ ሶኮኔ ሄፌሬ ዴሬ ኡባ ኣይሴስ።

¹¹ ቤኒ-ኣቢናዳቢ ናፎቲ-ዶሬ ቢታ ኣይሴስ፤ ኢዚካ ሶሎሞኔ ናዮ ጻፊቲ ኣዚና።

¹² ኣሂሉዴ ና ባኣናይ ታኢናኬኔ ማጊዶ ዴሬ፥ ጳርታኔፔ ዱጌ ቢዲ ኢዝራኤሌን ዲዛ ቤቲ-ሻኣኔ ጋካናስ፥ ሄፔካ ቢዲ ዮቂማኣሜ ፒኒዲ ኣቤሊ-ማሆሌ ዴሬ ጋካናስ ዲዛይሳ ኣይሴስ።

¹³ ቤኒ-ጌቤሪ ጋላኣዴን ዲዛ ኤራሞቴ ዴሬ፥ ጋላኣዴን ሚናሴ ና ያኢሬ ዴሬታ፥ ኢዛ ዩሾን ጊምቤኔ ጊምቤ ፔንጌታን ጻርቂማላ ቢራታ ኮላታቲ ዲዛ 60 ጊታ ካታማታኔ ባሳኔ ቢታን ዲዛ ኣርጎባ ዴሬ ኣይሴስ።

¹⁴ ኢዶ ና ኣሂናዳቢ ማሃናይሜ ዴሬ ኣይሴስ።

¹⁵ ኣሂማኣሲ ኒፍታሌሜ ዴሬ ኣይሴስ፤ ኢዚ ሶሎሞኔ ናዮ ባሴማቲ ኣዚና።

¹⁶ ሁሼ ና ባኣናይ ኣሴሬኔ ባኣሎቴ ዴሬ ኣይሴስ።

¹⁷ ፓሩሄ ና ኢዮሳፊጼይ ዪሳኮሬ ዴሬ ኣይሴስ።

¹⁸ ኤላ ና ሺምኤይ ቢኒያሜ ዴሬ ኣይሴስ።

¹⁹ ኡሬ ና ጌቤሪ ጋላኣዴ ቢታን ዲዛ ኣሞሬታ ካዎ ሲሆኔ ዴሬኔ ባሳኔ ካዎ ኣጌ ዴሬ ኣይሴስ። ሄ ዴሬታ ኡባ ኣይሲዛይታ ቦላ ኣላፌቴ ዲዛ ኢሲ ኣሲ ዴስ።

ዱሬቴ ኩሚዳ ሶሎሞኔ ካዎቴ

²⁰ ዩሁዳ ኣሳ ቆዳይኔ ኢስራኤሌ ኣሳ ቆዳይ ኣባ ሻሚንታ ማላ ጮራቲዴስ፤ ኢስቲ ሚሼኔ ኡዪሼ ኡፋይሳን ዴኢዳ።

²¹ ሶሎሞኔይ ኤፊራጺሴ ሻፋፔ ዶሚዲ ፊሊስጼሜ ቢታ ጋካናስ፥ ሄሳፌካ ቦላራ ጊብጼ ዛዋ ጋካናስ ዲዛ ካዎቴታ ኡባ ሃሪዴስ፤ ሄ ቢታ ኣሳቲ ኢዛስ ጊራ ጊሪዳ፤ ኢስቲ ኢዚ ዲዛ ላይ ኡባን ኢዛስ ሃሬቲዳ።

²² ሶሎሞኔስ ሃች ሃች ቁማስ 50 ኮንታሌ ሙሩታ ሌ፥ 100 ኮንታሌ ሌ፥

²³ ኬቲዳ 10 ቦራታ፥ ዬዳ ሚዛ 20 ቦራታኔ 100 ዶርሳታ፥ ኢስታ ቦላካ ጮፎሾታ፥ ጋራታ፥ ጌኔሳታኔ ሎኦ ካፎታ ኮሼስ።

²⁴ ሶሎሞኔይ ኤፊራጺሴ ሻፋፔ ኣርሼይ ዉሊዛ ባጋራ ዲዛ ካዎቴታ ኡባ ቲፊሳ ካታማፔ ዶሚዲ ጋዛ ካታማ ጋካናስ ሃሪዴስ፤ ባ ዩሾን ዲዛ ኡባ ዴሬታራካ ሳሮን ዴኢዴስ።

²⁵ ሶሎሞኔይ ዴኢዳ ላይ ኡባን ዳኔፔ ቢዲ ቤርሳቤሄ ጋካናስ ዩሁዳ ኣሳይኔ ኢስራኤሌ ኣሳይ ኡባይ ባ ዎይኔ ቱራ ኩዋኒኔ ባ ኤ ኩዋን ዎፓን ኡቲዳ።

²⁶ ሶሎሞኔስ ፓራ-ጋሬታ ጎቺዛ 40,000 ፓራቲኔ 12,000 ቶጋ ኣሳቲ ዴቴስ።

²⁷ ሄ ዞኔታ ኣይሲዛይቲ ባና ጋኪዳ ኣጊናን ታራን ታራን ካዎ ሶሎሞኔሲኔ ኢዛ ማዳፌ ማናስ ዪዳ ኣሳስ ኡባስ ኣይኮካ ፓጪሶንታ ሺሼቴስ።

²⁸ ቃሴካ ጋሬ ጎቺዛ ፓራቲኔ ሃንኮ ፓራቲ ባንጋኔ ሃርቆ ኤሂዲ ዎዛሶን ዎቴስ።

²⁹ ጾሳይ ሶሎሞኔስ ኣ ኤራቴ፥ ኬሂ ጊታ ኣኬካኔ ዛዋይ ባይንዳ ኤራቴ ኢሚዴስ።

³⁰ ሶሎሞኔስ ዲዛ ኣ ኤራቴይ ኣርሼይ ሞኪዛ ባጋራ ዲዛይታ ኣ ኤራቴፌኔ ጊብጼታስ ዲዛ ኣ ኤራቴ ኡባፌካ ኣ።

³¹ ኢዚ ኣሳ ኡባፌ ኣ ኤራንቻ፤ ቃሴ ኢዚ ኤዚራሄ ኣስ ኤታኔፔ፥ ማሆላ ናይታፔ ሄማኔፔ፥ ካልኮሌፔኔ ዳሪዳፔካ ኣ ኤራንቻ፤ ኢዛ ጎባቴ ኢዛ ዩሾን ዲዛ ካዎቴ ኡባን ሲዬቲዴስ።

³² ኢዚ 3,000 ሌሚሶታ ሃሳይዴስ፤ ቃሴካ 1,005 ዬታ ዬጺዴስ።

³³ ሶሎሞኔይ ሊባኖሴ ዚጋፔ ቢዲ ኬ ጊምቤ ቦላ ሞኪዛ ሂሶጴ ሚ ጋካናስ ዲዛ ዶዛታ ጊሻስ ዮቲዴስ፤ ሄሳካ ሜሄታ፥ ዶኣታ፥ ካፎታ፥ ሳኣራ ጎሼቲዛ ሜቴታ ጊሻሲኔ ሞሌታ ጊሻስ ታማርሲዴስ።

³⁴ ኢዛ ኣ ኤራቴ ሲዪዳ ሳኣ ካዎታ ኡባፌ ኪቴቲዳይቲ ኢዛ ኣ ኤራቴ ሲያናስ ዪዳ።