1ታሪኬ ማጻፋ 9 - ጋሞ ማጻፋ

ዲኤቴፌ ሲሚዳ ኢስራኤሌ ኣሳ

¹ ኢስራኤሌ ኣሳይ ኡባይ ባ ዬሌታ ዛርኬን ዛርኬን ጻፌቲዴስ፤ ሃ ታሪኬይ ኢስራኤሌ ካዎታ ማጻፋን ጻፌቲ ኡቲዴስ። ዩሁዳ ኣሳይ ባ ናጋራ ጋሶን ባቢሎኔ ቢታ ዲኤቲ ቢዴስ።

² ዲኤቲ ቢዳሶፔ ኮይሮ ሲሚዲ ባንታ ቢታን ኡቲዳይቲ ቄሴታ፥ ሌዌታ፥ ጾሳ ኬን ዎልቃ ኦሶ ኦዛይታኔ ኢስራኤሌ ኣሳፔ ጉታ።

³ ዩሁዳ ዛሬታፔ፥ ቢኒያሜ ዛሬታፔ፥ ኤፍሬሜ ዛሬታፔኔ ሚናሴ ዛሬታፔ ጉቲ ዬሩሳላሜን ዴኢዳ።

ዩሁዳ ናይታ ዛርኬ

⁴ ዩሁዳ ና ፓሬሴ ዛርኬፌ ኡታዬይ ዬሩሳላሜን ኡቲዳይታስ ሃላቃ፤ ኡታዬይ ኣሚሁዴ ና፤ ኣሚሁዴይ ኢሚሬ ና፤ ኢሚሬይ ባኔ ና።

⁵ ዩሁዳ ና ሴሎ ዛሬታፔ ኣሳያይኔ ኢዛ ናይቲ ዬሩሳላሜን ዲዛይታስ ሃላቃታ።

⁶ ዩሁዳ ና ዛራሄ ዛሬታፔ ዪኢኤሌይ ዬሩሳላሜን ዲዛይታስ ሃላቃ። ዩሁዳ ዛሬቲ ቆዲን ሙሌራ 690።

ቢኒያሜ ናይታ ዛርኬ

⁷ ዬሩሳላሜን ዴኢዳ ቢኒያሜ ዛርኬ ሃላቃቲ ሃይሳፌ ካሊ ጻፌቲዳ፤ ሃላቃ ሳሉይ ማሹላሜ ና፤ ሃላቃ ማሹላሜይ ሆዳዬ ና፤ ሃላቃ ሆዳዬይ ሃሳኑኤ ና።

⁸ ሃላቃ ዪቤናዬይ ዪሮሃሜ ና። ሃላቃ ኤላይ ኡዜ ና፤ ኡዚ ሚኪሬ ና። ሃላቃ ማሹላሜይ ሻፋጺያ ና፤ ሻፋጺያ ኤራኡኤሌ ና፤ ኤራኡኤሌይ ዪቢናዬ ና።

⁹ ቢኒያሜ ዛሬታ ቆዳይ ሙሌራ 956፤ ሄይቲ ኡባይ ባ ኬ ኣሳታስ ሃላቃታ።

ዬሩሳላሜን ዴኢዳ ቄሴታ

¹⁰ ዬሩሳላሜን ዴኢዳ ቄሴቲ ሃይሳፌ ካሊዲ ጻፌቲዳይታ፤ ኢስቲ ያዳያ፥ ዮሃሪቤ፥ ያኪኔኔ

¹¹ ጾሳ ኬን ሃላቃቲዳ ኣዛሪያሳ፤ ኣዛሪያሲ ኪልቂያሳ ና፤ ኪልቂያሲ ማሹላሜ ና፤ ማሹላሜይ ሳዶቄ ና፤ ሳዶቄይ ማራዮቴ ና፤ ማራዮቴይ ኣሂጹቤ ና።

¹² ሃራቲ ቃሴ ዪሮሃሜ ና ኣዳያኔ ኣዲኤሌ ና ማኢሳያ፤ ዪሮሃሜይ ፓሽኩሬ ና፤ ፓሽኩሬይ ማልኪያ ና። ኣዲኤሌይ ያሂዜሬ ና፤ ያሂዜሬይ ማሹላሜ ና፤ ማሹላሜይ ማሺሌሚቴ ና፤ ማሺሌሚቴይ ኢሜሬ ና።

¹³ ባንታሶ ኣሳታስ ሃላቃቲዳ ቄሴቲ 1,760፤ ሃይቲ ጾሳ ኬን ኦሴቲዛ ኦሶስ ጋኪዳ ኣሳታ።

ዬሩሳላሜን ዴኢዳ ሌዌታ

¹⁴ ዬሩሳላሜን ዴኢዳ ሌዌቲ ሃይሳፌ ካሊ ጻፌቲዳይታ፤ ሃሹቤ ና ሻማኤይ ሜራሬ ዛርኬ፤ ሃሹቤይ ኣዚርቃሜ ና፤ ኣዚርቃሜይ ሃሻቢያ ና።

¹⁵ ባቂባቂሬ፥ ሄሬሼ፥ ጋላሌኔ ማታኒያ፤ ማታኒያይ ሚካ ና፤ ሚኪያሲ ዚኪሬ ና፤ ዚኪሬይ ኣሳፌ ና።

¹⁶ ሃራቲ ቃሴ ናጾፌታ ሞታን ኡቲዳ ኣብዲዩኔ ባራካዬ። ኣብዲዩይ ሻማኤ ና፤ ሻማኤይ ጋላሌ ና፤ ጋላሌይ ኤዶታኔ ና። ባራካዬይ ኣሳ ና፤ ኣሲ ሂልቃና ና።

ጾሳ ኬ ፔንጌ ናጊዛ ዛቤታ

¹⁷ ጾሳ ኬ ፔንጌ ናጊዛ ዛቤቲ ሻሎሜ፥ ኣቁቤ፥ ጻልሞኔ፥ ኣሂማኔኔ ኢስታ ዳቦታ፤ ሻሎሜይ ኢስታስ ሃላቃ።

¹⁸ ሃ ዜሬቲ ኣርሼይ ሞኪዛ ባጋራ ዲዛ ካዎ ፔንጌ ጌቴቲዛሶዛ ናጌቴስ፤ ሃይሳፌ ካሴ ኢስቲ ሌዌቲ ዱንካኒ ኡቲዳሶ ጌልዛ ፔንጌ ናጌቴስ።

¹⁹ ሻሉሜይ ኣቢያሳፌ ናዛ ቆሬ ና፤ ኢዚ ቆራሃ ዛርኬ ኣሳ። ቆሬ ዜሬቲ ካሴ ጎዳ ጾሳ ዱንካኔ ናጊዳ ማላ ሻሎሜይኔ ቆራሃ ዛርኬ ጊዲዳ ኢዛ ዳቦቲ ጾሳ ኬ ናጌቴስ።

²⁰ ኤልኤዜሬ ና ፊኒሃሲ ቤኒ ዎዴ ቆራሃ ዛርኬታ ሃላቃ፤ ጎዳይ ኢዛራ ዴስ።

²¹ ቃሴካ ማሼሌሚያ ና ዛካራሲ ዱንካኔ ፔንጌ ናጌስ።

²² ፔንጋ ናጋናስ ዶሬቲዳይቲ ሙሌራ 212፤ ሃይታንቲ ባንታ ካታማን ካታማን ቆዴቲዲ ጻፌቲዳ፤ ኢስታ ዛሬታስ ሃ ኣዋቴ ኢሚዳይ ካዎ ዳዊቴኔ ናቤ ሳሜላ።

²³ ሄሳ ጊሻስ ኢስቲኔ ኢስታ ናይቲ ጾሳ ኬ ዱንካኔ ፔንጌዛ ናጌቴስ።

²⁴ ዛቤቲ ኣርሼይ ዉሊዛ ባጋራ፥ ሞኪዛ ባጋራ፥ ፑዴሃ ባጋራኔ ዱጌሃ ባጋራ ኤቂዲ ናጌቴስ።

²⁵ ሄ ካታማታን ዲዛ ኢስታ ዳቦቲ ላፑን ጋላስ ላሜቲ ላሜቲ ናጊሼ ኢስታ ማዳናስ ቤሴስ።

²⁶ ፔንጌ ናጊዛ ዛቤታ ሃላቃታፔ ኦይዱ ሌዌቲ ጾሳ ኬ፥ ኢዛ ጊዶን ዲዛ ኪፊሌታኔ ሚንጃ ኬ ኣዋቴን ናጌቴስ።

²⁷ ጾሳ ኬ ናጊዛይኔ ቃሴ ማላዶ ማላዶ ካሬ ዶይዛይቲ ኢስታ ጊዲዳ ጊሻስ ሄን ኣቄቴስ።

²⁸ ኢስታፌ ጉቲ ጾሳ ኬ ኦሶስ ጎኤቲዛ ሚሻታ ኣዋቴን ናጌቴስ፤ ሄ ሚሻታ ካሬ ኬሲዛ ዎዴኔ ሶ ጌልዛ ዎዴ ኢስቲ ቆዴቴስ።

²⁹ ቃሴ ኢስታፌ ኢሶቲ ኢሶቲ ጾሳ ኬ ጊዶን ጎኤቲዛ ሃራ ሚሻታ፥ ሊቆ ሌዛ፥ ዎይኔ ኡሻዛ፥ ዛይቴዛ፥ ኤጻኔዛኔ ሳዎታ ኣዋቴን ናጌቴስ።

³⁰ ጊዶ ኣቲን ቄሴታ ናይታፔ ኢሶቲ ኢሶቲ ሳዎዛ ጌዳሪ ጌዳሪ ዋላኬቴስ።

³¹ ቆሬ ዛርኬፌ ሻሎሜስ ባይራ ና ሌዌ ማቲቲያስ ያርሾ ኡኬ ኡካናስ ኣዋቴ ዴስ።

³² ቃኣቴ ዛርኬ ጊዲዳ ኢስታ ዳቦታፔ ጉታስ ሳምባታን ሳምባታን ጻራጴዛ ቦላ ዎዛ ያርሾ ጊጊሳና ኣዋቴ ዴስ።

³³ ሌዌ ዛሬታፔ ኣማርዳ ሃላቃቲ ጾሳ ኬን ዬጺዛይታ፤ ኢስቲ ኦማርሲኔ ጋላስ ኦዛ ጊሻስ ሃራ ኦሶ ኦሴቴና፤ ኢስቲ ጾሳ ኬ ጊቤ ጊዶን ዲዛ ኬታን ዴኤቴስ።

³⁴ ሃይቲ ኡባይ ሌዌ ቆሞታስ ሃላቃቲ ባንታ ዛርኬን ዛርኬን ጻፌቲዲ ዬሩሳላሜን ዴቴስ።

ካዎ ሳኦሌ ዬሌታ

³⁵ ጌባኦኔ ኣዋ ዪኢኤሌይ ጌባኦኔ ካታማን ዴኢዴስ፤ ኢዛ ኬ ኣዬይ ሱን ማኢኮ።

³⁶ ኢዛስ ባይራ ናዚ ኣብዶኔ፤ ኢዛ ካሎቲ ጹሬ፥ ቂሴ፥ ባኣሌ፥ ኔሬ፥ ናዳቤ፥

³⁷ ጋዶሬ፥ ኣሂዮ፥ ዛካራሳኔ ሚቂሎቴ።

³⁸ ሚቂሎቴይ ሺሜኤ ዬሊዴስ፤ ኢስቲካ ባንታ ዳቦታ ማታን ዬሩሳላሜን ዴኢዳ።

³⁹ ኔሬይ ቂሴ ዬሊዴስ፤ ቂሴይ ሳኦሌ ዬሊዴስ። ሳኦሌይ ዮናታኔ፥ ማልኬሹኣ፥ ኣቢናዳቤኔ ኤሺባኣሌ ዬሊዴስ፤

⁴⁰ ዮናታኔ ናይ ማሪባ-ባኣሌ፤ ማሪባኣሌይ ሚኪያሳ ዬሊዴስ።

⁴¹ ሚኪያሳ ናይቲ ፒቶኔ፥ ሜሌኬ፥ ቴሬኣኔ ኣካዜ።

⁴² ኣካዜይ ያኢሬ ዬሊዴስ፤ ያኢሬይ ኣሌሜቴ፥ ኣዚሞቴኔ ዚሚሬ ዬሊዴስ፤ ዚሚሬይ ሞዛ ዬሊዴስ፤

⁴³ ሞዛይ ቢኒኤ ዬሊዴስ፤ ቢኒኤይ ኤራፋያ ዬሊዴስ፤ ኤራፋያይ ኤልኣሳ ዬሊዴስ፤ ኤልኣሲ ኣዜሌ ዬሊዴስ።

⁴⁴ ኣዜሌስ ኡሱፑን ኣቱማ ናይቲ ዴቴስ፤ ሄይቲካ ኣዚርቃሜ፥ ቦኬሬ፥ ኢስማኤሌ፥ ሻኣሪያ፥ ኣብዲዩኔ ሃናኔ፤ ሃይቲ ኡባይ ኣዜሌ ናይታ።