1ታሪኬ ማጻፋ 3 - ጋሞ ማጻፋ

ካዎ ዳዊቴ ናይታ ዛርኬ

¹ ዳዊቲ ኬብሮኔን ዲሼ ዬሊዳ ኣቱማ ናይታ ሱን ሃይሳፌ ካሊ ዲዛይታ፤ ባይራ ና ኣሚኖኔ ኢዝራኤሌ ዴሬ ማጫስ ኣሂናሆምፔ ዬሊዴስ፤ ኢዛ ካሎ ዳኔላ ቃርሜሎሴ ዴሬ ማጫስ ኣቢጋሊፔ ዬሊዴስ።

² ሄንዛ ኣቤሴሎሜ ጌሹሬ ካዎ ታሊማዬ ና ማኢኪፔ ዬሊዴስ። ኦይዳንዛ ኣዶኒያሳ ሃጊቲፔ ዬሊዴስ።

³ ኢቻሻንዛ ሻፋጺያ ኣቢጻሊፔ ዬሊዴስ ኡሱፑንዛ ዪቲራሜ ኤግሊፔ ዬሊዴስ።

⁴ ሃይቲ ኡሱፑናቲ ዳዊቲ ኬብሮኔን ላፑን ላይኔ ባጋ ዴራ ኣይሲዛ ዎዴ ዬሌቲዳ፤ ዳዊቲ ዬሩሳላሜን 33 ላይ ካዎቲዴስ።

⁵ ኢዚ ሄን ዲሼ ዬሊዳ ኣቱማ ናይቲ ሃይሳፌ ካሊ ዲዛይታ፤ ኣምኤሌ ና ቤርሳቤሃ ሺምኣ፥ ሾባቤ፥ ናታኔኔ ሶሎሞኔ ጌቴቲዛ ኦይዱ ኣቱማ ናይታ ኢዛስ ዬላዱስ።

⁶ ቃሴ ሃራ ኡዱፉን ኣቱማ ናይቲ ኢዛስ ዴቴስ፤ ሄይቲካ ኢያቤሄሬ፥ ኤልሱኤ፥ ኤልፋሌጼ

⁷ ኖጋሄ፥ ኔፌጌ፥ ናፊያ፥

⁸ ኤልሻማ፥ ኤልኣዳኔ ኤልፋሌጼ ጌቴቲዛይታ።

⁹ ሄይታፔካ ሃራ ዳዊቲ ጋራዴታፔ ዬሊዳ ኣቱማ ናይቲ ዴቴስ፤ ኢስታስካ ቲኢማሮ ጌቴቲዛ ሚቻ ዳዉስ።

ካዎ ሶሎሞኔ ናይታ ዛርኬ

¹⁰ ካዎ ሶሎኖኔይ ኤሮቢኣሜ ዬሊዴስ፤ ኤሮቢኣሜይ ኣቢያ ዬሊዴስ፤ ኣቢያይ ኣሳ ዬሊዴስ፤ ኣሳይ ኢዮሳፊጼ ዬሊዴስ፤

¹¹ ኢዮሳፊጼይ ኢዮራሜ ዬሊዴስ፤ ኢዮራሜይ ኣካዚያሳ ዬሊዴስ፤ ኣካዚያሲ ኢዮኣሳ ዬሊዴስ፤

¹² ኢዮኣሲ ኣማሲያሴ ዬሊዴስ፤ ኣማሲያሲ ኣዛሪያሴ ዬሊዴስ፤ ኣዛሪያሲ ኢዮኣታሜ ዬሊዴስ፤

¹³ ኢዮኣታሜይ ኣካዜ ዬሊዴስ፤ ኣካዜይ ሂዝቂያሳ ዬሊዴስ፤ ሂዝቂያሲ ሚናሴ ዬሊዴስ፤

¹⁴ ሚናሴይ ኣሞኔ ዬሊዴስ፤ ኣሞኔይ ኢዮሲያሳ ዬሊዴስ፥

¹⁵ ኢዮሲያሲ ኦይዱ ኣቱማ ናይታ ዬሊዴስ፤ ባይራዚ ዮሃናኔ፥ ኢዛ ካሎቲ ኢዮኣቄሜ፥ ሴዴቂያሳኔ ሻሎሜ፤

¹⁶ ኢዮኣቄሜይ ኢኮኒያኔኔ ሴዴቂያሳ ዬሊዴስ።

ካዎ ኢኮኒያኔ ናይታ ዛርኬ

¹⁷ ባቢሎኔ ዲኤቲ ቢዳ ኢኮኒያኔ ናይቲ ሳላቲያሌ፥

¹⁸ ማሊክራሜ፥ ፓዳያ፥ ሼናጻሬ፥ ዪቃሚያ፥ ሆሻሜኔ ናዳቢያ ጌቴቲዛይታ።

¹⁹ ፓዳያይ ዜሩባቤሌኔ ሺምኤ ዬሊዴስ፤ ዜሩባቤሌይካ ማሹላሜ፥ ሃናኒያኔ ኢስታ ሚቾ ሻሎሚቶ ዬሊዴስ።

²⁰ ቃሴካ ሃራ ኢቻሽ ኣቱማ ናይቲ ኢዛስ ዴቴስ፤ ሄይቲካ ሃሹቤ፥ ኦሄሌ፥ ባራካዬ፥ ሃሳዲያኔ ዮሻቢ-ሄሲዴ።

²¹ ሃናኒያይ ፓላጺያኔ ዬሻኢያ ጌቴቲዛ ናምኡ ኣቱማ ናይታ ዬሊዴስ፤ ዬሻኢያይካ ኤራፋያ ዬሊዴስ፤ ኤራፋያይ ኦርናኔ ዬሊዴስ፤ ኦርናኔይ ኣብዲዩ ዬሊዴስ፤ ኣብዲዩይ ሻካኒያ ዬሊዴስ።

²² ሻካኒያይካ ሻማኤ ዬሊዴስ፤ ሻማኤይ ሃጹሼ፥ ዪጊኣሌ፥ ባርያሄ፥ ናራያኔ ሳፋጼ ጌቴቲዛይታ 5 ኣቱማ ናይታ ዬሊዴስ፤ ሻካኒያ ዜሬቲ ኩሜ ኡሱፑና።

²³ ናራያይ ኤልዮኤናዬ፥ ሂዝቂያሳኔ ኣዚርቃሜ ጌቴቲዛ 3 ኣቱማ ናይታ ዬሊዴስ።

²⁴ ኤልዮኤናዬይ ሆዳዬ፥ ኤልያሼቤ፥ ፔላያ፥ ኣቁቤ፥ ዮሃናኔ፥ ዳላያኔ ኣናኔ ጌቴቲዛ 7 ኣቱማ ናይታ ዬሊዴስ።