1ታሪኬ ማጻፋ 27 - ጋሞ ማጻፋ

ኢስራኤሌ ኦላንቻታ ካሌዛይታ

¹ ባንታ ቡቴን ቡቴን ላይ ኩሜ ኣጊናን ኣጊናን ካዎዛሲኔ ዴራስ ታራን ታራን ኦዛ ኢስራኤሌ ኬ ኣሳታ ሃላቃቲ፥ ሻላቃቲኔ ማቶ ሃላቃቲ፥ ኦላ ጋዳዋቲ ሃይሳፌ ካሊዛይታ፤ ኢሲ ኢሲ ቡቴን 24,000 ኣሲ ዴስ።

² ኮይሮ ኣጊናን ኦዛ ቡቴዛስ ኣላፌይ ዛብዲኤሌ ና ያሾቢኣሜ፤ ኢዛ ቡቴዛን 24,000 ኣሲ ዴስ።

³ ያሾቢኣሜይ ፓሬሴ ዛሬ፤ ኢዚ ኮይሮ ኣጊናን ኦላስ ኬኢዛ ሃላቃታስ ጋዳዋ።

⁴ ናምኣን ኣጊናን ኦዛ ቡቴዛስ ኣላፌይ ኣሂሆሄ ዴሬ ኣስ ዶዴያ፤ ኢዛ ቡቴዛን 24,000 ኣሲ ዴስ፤ ሃ ቡቴዛ ኢዛፔ ጋርሳራ ካሌዛይ ሚቂሎቴ።

⁵ ሄን ኣጊናን ኦዛ ቡቴዛስ ኣላፌይ ቄሴ ዮዳሄ ና ባናያ፤ ኢዛ ቡቴዛን 24,000 ኣሲ ዴስ።

⁶ ባናያይ 30 ኣሳታፔ ኣ ኤሬቲዳ ሚኖ ኣስ ጊዲዳ ጊሻስ ኢዚ ኢስታ ቦላ ሃላቃ ጊዲዴስ፤ ኢዛ ና ኣሚዛባዴይ ኢዛፔ ጋርሳራ ኣዛዚዛዴ ጊዲዴስ።

⁷ ኦይዳን ኣጊናን ኦዛ ቡቴዛስ ኣላፌይ ኢዮኣቤ ኢሻ ኣሳሄሌ፤ ኢዛ ቡቴዛን 24,000 ኣሲ ዴስ፤ ኢዛሶሆን ኣላፌቲዳይ ኢዛ ና ዛባዲያ።

⁸ ኢቻሻን ኣጊናን ኦዛ ቡቴዛስ ኣላፌይ ዪጺራ ኣስ ሻሚሁቴ፤ ኢዛ ቡቴዛን 24,000 ኣሲ ዴስ።

⁹ ኡሱፑን ኣጊናን ኦዛ ቡቴዛስ ኣላፌይ ቴቁሄ ኣስ ኢቄሻ ና ኢራ፤ ኢዛ ቡቴዛን 24,000 ኣሲ ዴስ።

¹⁰ ላፑን ኣጊናን ኦዛ ቡቴዛስ ኣላፌይ ኤፍሬሜ ዛሬፔ ፒሎኔ ዴሬ ኣስ ሄሌጼ፤ ኢዛ ቡቴዛን 24,000 ኣሲ ዴስ።

¹¹ ኦስፑን ኣጊናን ኦዛ ቡቴዛስ ኣላፌይ ሁሼ ኣስ ሲቢካዬ፤ ኢዚ ዛራሄ ዛሬፔ ዪዴስ፤ ኢዛ ቡቴዛን 24,000 ኣሲ ዴስ።

¹² ኡዱፉን ኣጊናን ኦዛ ቡቴዛስ ኣላፌይ ቢኒያሜ ዛሬፔ ኣናቶቴ ኣስ ኣቢኤዜሬ፤ ኢዛ ቡቴዛን 24,000 ኣሲ ዴስ።

¹³ ታማን ኣጊናን ኦዛ ቡቴዛስ ኣላፌይ ዛራሄ ዛሬፔ ናጾፌ ዴሬ ኣስ ማሂራዬ፤ ኢዛ ቡቴዛን 24,000 ኣሲ ዴስ።

¹⁴ ታማኔ ኢሲን ኣጊናን ኦዛ ቡቴዛስ ኣላፌይ ኤፍሬሜ ዛሬፔ ፒራቶኔ ኣስ ባናያ፤ ኢዛ ቡቴዛን 24,000 ኣሲ ዴስ።

¹⁵ ታማኔ ናምኣን ኣጊናን ኦዛ ቡቴዛስ ኣላፌይ ኦቲንኤሌ ዛሬፔ ናጾፌ ዴሬ ኣስ ሄልዳዬ፤ ኢዛ ቡቴዛን 24,000 ኣሲ ዴስ።

ኢስራኤሌ ኣሳ ጋርሳን ቆሞታ ቆሞታ ካሌዛ ኦላ ጋዳዋታ

¹⁶ ኢስራኤሌ ኣሳ ጋርሳን ቆሞታ ቆሞታ ቦላ ሹሜቲዳ ኦላ ጋዳዋቲ ሃይሳፌ ካሊዲ ጻፌቲዳይታ። ኦሮቤሌ ቆሞ ቦላ ሱሚዳይ ዚኪሬ ና ኤልኤዜሬ። ሲሞና ቆሞ ቦላ ሱሚዳይ ማኢካ ና ሻፋጺያ።

¹⁷ ሌዌ ቆሞ ቦላ ሱሚዳይ ቃሙኤሌ ና ሃሻቢያ። ኣሮኔ ዛርኬ ቦላ ሱሚዳይ ሳዶቄ።

¹⁸ ዩሁዳ ቆሞ ቦላ ሱሚዳይ ዳዊቴ ኢሻ ኤሊሁ። ዪሳኮሬ ቆሞ ቦላ ሱሚዳይ ሚካኤሌ ና ኦሚሬ።

¹⁹ ዛቢሎኔ ቆሞ ቦላ ሱሚዳይ ኣብዲዩ ና ዪሺማኤ። ኒፍታሌሜ ቆሞ ቦላ ሱሚዳይ ኣዛሪኤሌ ና ያርሞቴ።

²⁰ ኤፍሬሜ ቆሞ ቦላ ሱሚዳይ ኣዛዚያ ና ሆሴኤ። ዮርዳኖሴ ሻፋፔ ኣርሼይ ዉሊዛ ባጋን ዲዛ ሚናሴ ቆሞ ባጋታ ቦላ ሱሚዳይ ፓዳያ ና ኢዩኤሌ።

²¹ ዮርዳኖሴ ሻፋፔ ኣርሼይ ሞኪዛ ባጋን ጋላኣዴን ዲዛ ሚናሴ ቆሞ ባጋታ ቦላ ሱሚዳይ ዛካራሳ ና ኢዶ። ቢኒያሜ ቆሞ ቦላ ሱሚዳይ ኣቢኔሬ ና ያኢሲኤሌ።

²² ዳኔ ቆሞ ቦላ ሱሚዳይ ዪሮሃሜ ና ኣዛሪኤሌ። ሃይቲ ኢስራኤሌ ኣሳ ጋርሳን ቆሞታ ቆሞታ ካሌዛ ኦላ ጋዳዋታ።

²³ ጎዳይ፥ «ታኒ ኢስራኤሌ ኣሳ ሳሎ ጾሊንቴ ማላ ጮራሳና» ጊዲ ሂዶታ ቃላ ኢሚዳ ጊሻስ ዳዊቲ ናምኡ ታማኔ ሄሳፌ ጋርሳራ ጊዲዳ ኣሳ ቆዲቤና።

²⁴ ጹሪያ ና ኢዮኣቤይ ኣሳ ቆዳ ዶሚዴስ ሺን ፖሊቤና፤ ኣሳ ቆዲዳ ጋሶን ጎዳይ ኢስራኤሌ ኣሳ ቦላ ሃንቄቲዴስ፤ ሄሳ ጊሻስ ኢስታ ቆዳይ ካዎ ዳዊቴ ታሪኬ ማዝጋባን ጻፌቲቤና።

ካዎ ኣቆታ ቦላ ኣዋቴን ሱሚዳይታ

²⁵ ካዎ ኬን ቡቁራ ዎዛ ሚንጃ ኬ ኣላፌይ ኣዲኤሌ ና ኣዚሞቴ። ጋጻሬታን፥ ካታማታን፥ ሞታኒኔ ናጌሶ ሚጻታን ዲዛ ሚንጃ ኬታ ኣላፌይ ኦዚያ ና ዮናታኔ።

²⁶ ጎሻንቻታ ኣላፌይ ካሉቤ ና ኤዚሬ።

²⁷ ዎይኔ ሚ ቶኪዛሶሆታ ኣላፌይ ኤራማቴ ዴሬ ኣስ ሺምኤ፤ ዎይኔ ኡሹ ሚንጂዛሶታ ኣላፌይ ሻፋሜ ዴሬ ኣስ ዛብዴ።

²⁸ ሻራ ሜንታን ዙምቡላታ ጻጶን ዲዛ ዎጋራ ሚኔ ዎላ ሚታ ናጋናስ ኣላፌቴ ጋዴሬ ዴሬ ኣስ ባኣሊ-ሃናኔስ ኢሜቲዴስ፤ ዛይቴ ሚንጂዛ ኬ ኣላፌቴ ኢዮኣሳስ ኢሜቲዴስ።

²⁹ ላሻሮኔ ዴምባን ሄሜቲዛ ዉዴ ሜሄታ ኣላፌቴ ሳሮኔ ኣስ ሺጺራያስ ኢሜቲዴስ፤ ሾባን ሄሜቲዛ ዉዴ ሜሄታ ኣላፌቴ ኣዲላያ ና ሳፋጼስ ኢሜቲዴስ።

³⁰ ጋሜላታ ቦላ ኣላፌቴ ኢስማኤሌ ኣስ ኦቢላስ ኢሜቲዴስ። ሃሬታ ቦላ ኣላፌቴ ሜሮኖቴ ኣስ ዬሂዳዬስ ኢሜቲዴስ።

³¹ ዶርሳ ዉዴታኔ ዴይሻ ዉዴታ ናጋና ኣላፌቴ ኣጋሪ ዛሬፔ ጊዲዳ ያዚዜስ ኢሜቲዴስ፤ ሃይቲ ኡባይ ካዎ ዳዊቴ ኣቆታ ናጋናስ ኣላፌቴ ኤኪዳ።

ካዎ ዳዊቴ ዞሪዛይታ

³² ዳዊቴ ኣዋ ኢሻይ ዮናታኔይ ጻፌ፥ ኣኬካንቻ ኣሳኔ ዞሪዛ ኣሳ፤ ሃኪሞኔ ና ዪሂኤሌይ ካዎ ናይታ ዲቺዛዴ።

³³ ኣክጾፌሌይ ቃሴ ካዎዛ ዞሪዛዴ፤ ኣርኬ ዴሬ ኣስ ሁሼይ ካዎስ ሲቆ ላጌ።

³⁴ ኣክጾፌሌፔ ጉዬ ባናያ ና ዮዳሄይኔ ኣቢያታሬይ ካዎ ዞራንቻ ጊዲዳ፤ ኢዮኣቤይ ካዎ ኦላንቻታ ሃላቃታስ ጋዳዋ ጊዲዴስ።