1ታሪኬ ማጻፋ 16 - ጋሞ ማጻፋ

¹ ኢስቲ ጾሳ ታቦታ ኤሂዲ ዳዊቲ ታቦታ ዎናስ ቶሊዳ ዱንካኔዛ ጊዶን ዎዳ፤ ሂስቲዲ ጹጌቲዛ ያርሾኔ ኢሲፌቴ ያርሾ ጾሳስ ያርሺዳ።

² ዳዊቲ ጹጌቲዛ ያርሾዛኔ ኢሲፌቴ ያርሾ ያርሺዳፔ ጉዬ ጎዳ ሱንን ዴሬዛ ኣንጂዴስ።

³ ሄሳፌ ጉዬ ኢስራኤሌ ኣሳ ኡባስ፥ ማጫሳሲኔ ኣቱማሳስ፥ ሁኤን ሁኤን ኢሲ ኢሲ ጉ ኡኬ፥ ኢሲ ኢሲ ቃንጾ ኣሾኔ ኢሲ ኢሲ ዛቢቤ ኮምፓ ጊሺዴስ።

⁴ ጎዳ ታቦታ ሲንን ኦና ማላኔ ጎዳ ኢስራኤሌ ጾሳ ዎሳናስ፥ ሳባናሲኔ ጋላታናስ ዳዊቲ ሌዌ ቆሞታፔ ጉታ ሱንዴስ።

⁵ ሌዌታ ሃላቃይ ኣሳፌ፤ ኢዛፔ ጋርሳራ ዛካራሳ፤ ዛካራሳራ ዲዛይቲ ዪኢኤሌ፥ ሻሚራሞቴ፥ ዪሂኤሌ፥ ማቲቲያ፥ ኤልያቤ፥ ባናያኔ ኦቤድ-ኤዶሜኔ ዪኢኤሌ፤ ሄይቲ ማሲንቆኔ ዲ ዲጻና ማላ ሱሚዳ፤ ኣሳፊ ጊዲኮ ዳላ ቃናስ ሱሚዴስ።

⁶ ቄሴ ባናያይኔ ያሃዚኤሌይ ጾሳ ታቦታ ሲንን ኡባ ዎዴ ዛዬ ፑናና ማላ ሱሚዳ።

ጋላታ ዬ

⁷ ሄ ጋላስ ዳዊቲ ካሴቲዲ ኣሳፌሲኔ ኢዛራ ኦዛ ላጌታስ ጎዳ ጋላቲዛ ዬ ኢሚዴስ።

⁸ ጎዳ ጋላቲቴ፤ ኢዛ ሱን ጼይጊቴ፤ ኢዚ ኦዳ ኡባ ካዎቴታስ ዮቲቴ።

⁹ ኢዛ ሳቢቴ፤ ጋላታ ዬካ ኢዛስ ዬጺቴ፤ ኢዚ ኦዳ ማላሊሲዛ ኦሶ ኡባ ዮቲቴ።

¹⁰ ኢዛ ጌሻ ሱንን ቦንቺቴ፤ ጎዳ ኮይዛይታ ዎዚናይ ኡፋዬቶ።

¹¹ ጎዳኔ ኢዛ ዎልቃ ጾሞሲቴ፤ ኡባ ዎዴ ኢዛ ኮዪቴ።

¹² ኢዚ ኦዳ ማላሊሲዛ ኦሶታ፥ ማላታታኔ ኢዛ ፒርዳ ኣኬኪቴ።

¹³ ኢንቴኖ ጾሳ ኣይሌ ኢስራኤሌ ዜሬቶ! ኢንቴኖ ዶሬቲዳ ያቆቤ ናይቶ!

¹⁴ ኢዚ ጎዳይ ኑ ጾሳ፤ ኢዛ ፒርዳይ ኡባ ቦላና።

¹⁵ ባ ጫቂዳ ቃላ ሜርናስ፥ ባ ኣዛዚዳይሳካ ሺ ዬሌታ ጋካናስ ቆፔስ።

¹⁶ ኣብራሃሜስ ጫቂዳ ጫቃ፥ ዪሳቃስ ኢሚዳ ሂዶታ ቃላ፥

¹⁷ ያቆቤስ ዎጋ ጊዳና ማላ፥ ኢስራኤሌሲካ ሜርና ጫቆ ቃላ ጊዳና ማላ ሚንዴስ።

¹⁸ «ካናኔይ ኔስ ጺንጾ ጊዳና ማላ ታ ኔና ላቲሳና» ጊዴስ።

¹⁹ ኢስቲ ቆዳን ጉ ጊዲ ዲዛ ዎዴ፥ ዴራሲካ ኢማ ጊዲ ዲዛ ዎዴ፥

²⁰ ኢሲ ዴሬፔ ሃራ ዴሬ፥ ኢሲ ካዎቴፌ ሃራ ካዎቴ ቶይላቲዳ።

²¹ ኦኒካ ኢስታ ኡንኤና ማላ ኣ ኢሚቤና፤ ኢስታ ጊሻስ ካዎታ ሴሪዴስ፤

²² «ታ ቲይዳይታ ቦቾፍቴ፤ ታ ናቤታ ቆሆፒቴ» ጊዴስ።

²³ ቢታ ኡባይ ጎዳስ ዬጺቴ፤ ኢዚ ኣሺዛይሳ ሃች ሃች ዮቲቴ።

²⁴ ካዎቴታስ ኢዛ ቦንቾ ኣዋጂቴ፤ ኢዚ ኦዳ ማላሊሲዛ ሚሻታ ዴሬ ኡባስ ዮቲቴ።

²⁵ ጎዳይ ጊታ፤ ኢዛስ ቤሲዛ ጋላታይካ ቃ፤ ጾሳታ ኡባፌ ኣስ፤ ኢዛስ ያያናስ ቤሴስ።

²⁶ ኣይዛቤታ ጾሳቲ ኡባይ ኤቃ ጾሳታ፤ ጎዳይ ጊዲኮ ሳሎታ ሜዳ ጾሳ።

²⁷ ቦንቾይኔ ቴማይ ኢዛስ ዴስ፤ ሚኖቴኔ ኡፋይሲ ኢዛ ኬን ዴስ።

²⁸ ኢንቴኖ ኣሳ ዛሬ ኡባቶ! ጎዳ ሳቢቴ፤ «ቦንቾይኔ ዎልቃይ ጎዳሳ» ጊ ዮቲቴ።

²⁹ ጎዳ ሱንስ ቤሲዛ ቦንቾ ኢሚቴ፤ ያርሾ ኤኪዲ ኢዛ ሲን ሺቂቴ፤ ኢዛ ጌሻቴ ቦንቾ ጊሻስ ጎዳስ ጎይኒቴ።

³⁰ ቢታን ዲዛ ኣስ ኡባይ ኢዛ ሲንን ኮኮሪቴ፤ ሳኣይ ሚኒ ኤቂዴስ፤ ሙሌካ ቃጼና።

³¹ ሳሎቲ ኡፋዬቴቶ! ሳኣይካ ሃሹ ጎ! ካዎቴታ ጊዶን ኢስታስ፥ «ጎዳይ ካዎቲዴስ!» ጌቶ።

³² ኣባይኔ ኢዛ ጊዶን ዲዛ ኡባይ ጉሜቶ፤ ዴምባቲኔ ኢስታ ቦላ ዲዛ ኡባቲ ኡፋዬቴቶ።

³³ ኢዚ ቢታ ቦላ ፒርዳናስ ያና። ሄ ዎዴ ዎራ ሚቲ ጎዳ ጾሳ ሲንን ኡፋይሳን ዬጻና።

³⁴ ጎዳይ ኪያ፤ ኢዛ ማሮቴይካ ሜርናሳ፤ ሄሳ ጊሻስ ጎዳ ጋላቲቴ።

³⁵ «ኣቤት ኑና ኣሺዛ ጎዳዉ! ኑና ኣሻ፤ ኔ ጌሻ ሱን ኑ ጋላታና ማላ፥ ኑ ኔና ጋላታን ቦንቻና ማላ ካዎቴታ ጊዶፌ ኑና ሺሻዳ ኣሻ» ጊቴ።

³⁶ ጎዳ ኢስራኤሌ ጾሳይ ሜርናፔ ሜርና ጋካናስ ጋላቴቶ! ሄሳፌ ጉዬ ዴሬ ኡባይ፥ «ኣሚን» ጊዲ ጎዳ ጋላቲዴስ።

ዬሩሳላሜኒኔ ጌባኦኔን ሃኒዳ ጎይኖ ማራ

³⁷ ጎዳ ታቦታ ሲንን ሃች ሃች ጎይኖስ ኮሺዛዝ ኡባ ዎዴ ኢስቲ ኦና ማላ ዳዊቲ ኣሳፌኔ ኢዛ ዳቦታ ዎዴስ።

³⁸ ቃሴካ ኦቤድ-ኤዶሜኔ ኢዛ ዳቦታ ኡሱፑን ታማኔ ኦስፑናታ ኢስታራ ኦና ማላ ዎዴስ፤ ኤዶታኔ ና ኦቤድ-ኤዶሜኔ ሆሳ ዲርሳ ፔንጌ ናጋና ማላ ዎዴስ።

³⁹ ቄሴ ሳዶቄኔ ኢዛራ ኦዛ ቄሴቲ ጌባኦኔን ቃሶሆን ዲዛ ጎዳ ዱንካኔዛ ሲንን ኦና ማላ ሄን ዎዴስ።

⁴⁰ ጋሶይካ ጎዳይ ኢስራኤሌስ ኢሚዳ ዎጋ ማላ ኢስቲ ኡባ ዎዴ ጹጌቲዛ ያርሾይ ያርሼቲዛሶን ማላዶኔ ኦማርስ ጹጌቲዛ ያርሾ ያርሻናሳ።

⁴¹ ኢዛ ማሮታይ ሜርናስ ጊዲዳ ጊሻስ ጎዳ ጋላታና ማላ ሄማኔ፥ ኤዶታኔኔ ዶሬቲዳ ሃራታ ዳዊቲ ኢስታራ ኢሲፌ ኤሲዴስ።

⁴² ሄማኔሲኔ ኤዶታኔስ ጹሩምባ ፑናናስ፥ ዳላ ጊሪሳናሲኔ ዬ ዬጺሼ ጎኤቲዛ ሃራ ማሳራታ ቦላ ኣዋቴ ኢስታስ ኢሜቲዴስ፤ ኤዶታኔ ናይቲ ዲርሳ ፔንጌ ናጋና ማላ ኣላፌቴ ኢሜቲዴስ።

⁴³ ሄሳፌ ጉዬ ኡባ ኣሳይ ባሶ ባሶ ቢዴስ፤ ዳዊቲካ ባሶ ኣሳ ኣንጃናስ ሶ ሲሚዴስ።