1ታሪኬ ማጻፋ 11 - ጋሞ ማጻፋዳዊቴ ካዎቴ ( 2ሳሜ 5፡1-10 ) 1 ሄሳፌ ጉዬ ኢስራኤሌ ኣሳይ ኡባይ ኢሲፌ ዳዊቴኮ ኬብሮኔ ቢዲ፥ «ኑኒ ኢሲ ኣሾኔ ኢሲ ሜቄ፤ 2 ካሴ ሳኦሌ ካዎቴ ዎዴካ ኢስራኤሌ ኣሳ ኦላስ ካሌዳይ ኔና፤ ጎዳ ኔ ጾሳይ ኔና፥ ‹ታ ዴራ ኢስራኤሌ ኔኒ ሄማና፤ ኢስታ ቦላካ ኔኒ ካዎታና› ጊዴስ» ጊዳ። 3 ሄሳ ጊሻስ ኢስራኤሌ ጪማቲ ኡባይ ካዎ ዳዊቴኮ ኬብሮኔ ካታማ ዪዳ፤ ኢዚ ኢስታራ ኬብሮኔን ጎዳ ሲንን ጫቄቲዴስ፤ ጎዳይ ሳሜላ ባጋራ ሃሳይዳ ቃላ ማላ ዳዊቲ ኢስራኤሌ ቦላ ካዎታና ማላ ቲይዳ። ዳዊቲ ዬሩሳላሜ ኦይኪዴስ 4 ዳዊቲኔ ኢስራኤሌ ኣሳይ ኡባይ ዬሩሳላሜ ካታማ ቢዳ፤ ሄ ዎዴ ያቡሴ ኣሳቲ ሄን ዲዛ ጊሻስ ሄ ካታማያ ያቡሴ ጌቴታዉስ። 5 ያቡሴ ኣሳቲ ዳዊቴ፥ «ኔኒ ሃ ካታማ ሙሌካ ጌላካ» ጊዳ፤ ጊዲኮካ ዳዊቲ ጺዮኔን ዲዛ ኢስታ ሚጻ ኦይኪዴስ፤ ሂስቲን ኢዛ ዳዊቴ ካታማ ጌቴታዱስ። 6 ዳዊቲ፥ «ኮይሮቲ ቢዲ ያቡሴ ኣሳታ ሾጪዛዴይ ኦላ ጋዳዋ ጊዳና» ጊዴስ፤ ሂስቲን ጹሪያ ና ኢዮኣቤይ ኮይሮቲ ቢ ኦሊዳ ጊሻስ ኦላ ጋዳዋ ጊዲዴስ። 7 ዳዊቲ ሄ ሚጻዮ ባስ ዱሳሶ ሂስቲዳ ጊሻስ ሚጻያ ዳዊቴ ካታማ ጌቴታዱስ። 8 ዳዊቲ ሄ ካታማይ ዩሾን ኬቻታ ኬጪዲ ካታማዮ ዛሪ ኬጺዴስ፤ ኣቲዳ ካታማ ቃሴ ኢዮኣቤይ ዛሪዲ ኬጺዴስ። 9 ኡባፌ ዎልቃማ ጎዳይ ኢዛራ ዲዛ ጊሻስ ዳዊቲ ሚኒ ሚኒ ቢዴስ። ሚኖ ጊዲዳ ዳዊቴ ኦላንቻታ ( 2ሳሜ 23፡8-39 ) 10 ሚኖ ጊዲዳ ዳዊቴ ኦላንቻቲ ሃይሳፌ ካሊዲ ጻፌቲዳ፤ ኢስቲካ ሃንኮ ኢስራኤሌ ኣሳታራ ጊዲዲ ጎዳይ ኢዛስ ኢሚዳ ሂዶታ ቃላ ማላ ኢዛ ካዎቴይ ኣካና ማላ ኬሂ ማዲዳኔ ሚንዳ። 11 ሚኖ ጊዲዳ ዳዊቴ ኦላንቻታፔ ኮይሮይሲ ሃኪሞኔ ዛርኬፌ ጊዲዳ ያሾቢኣሜ፤ ኢዚ ኦላ ጋዳዋ ሄታስ ሃላቃ፤ ኢዚ ኢሲቶ ኦላን 300 ኣስ ዎዴስ። 12 ሄ ሄ ሚኖ ኦላንቻታፔ ናምኣንዚ ኣሂሆሄ ዛርኬፌ ዶዴ ና ኤልኤዜሬ። 13 ፊሊስጼሜ ኣሳቲ ኦሌታናስ ኤፍሲ-ዴሚሜ ጌቴቲዛሶ ሺቂዳ ዎዴ ኣላዛሬይ ዳዊቴራ ኢሲፌ ዴስ፤ ባንጋይ ኩሚዳ ጎሻ ጋዴ ጊዶን ኢስራኤሌ ኦላንቻቲ ፊሊስጼሜታ ሲንፌ ባቃቲዳ። 14 ጊዶ ኣቲን ኢዚኔ ኢዛ ካሊዛይቲ ሄን ሶሆ ኦይኪዲ ፊሊስጼሜ ኣሳታራ ኤቄቲዳ፤ ጎዳይ ኢስታስ ዎልቃማ ጾኖ ኢሚዴስ። 15 ፊሊስጼሜ ኦላንቻቲ ኤራፋይሜ ሾባን ዱንካኒ ዲዛ ዎዴ 30 ሃላቃታፔ ሄቲ ዳዊቲ ዲዛሶ ኣዱላሜ ጎንጎሎ ማታን ዲዛ ዛላኮ ዎዳ። 16 ሄ ዎዴ ዳዊቲ ሚጻ ጊዶን ዴስ፤ ፊሊስጼሜ ኦላንቻታ ቡቴይ ቤቴሊሄሜን ዴስ። 17 ዳዊቲ ሃ ኡያናስ ኣሞቲዲ፥ «ቤቴሊሄሜ ካታማ ፔንጌ ላንቄን ዲዛ ፑልቶ ሃፌ ታና ኦኔ ኡሻናይ!» ጊዴስ። 18 ሄ ሚኖ ዳዊቴ ኦላንቻቲ ፊሊስጼሜ ኣሳቲ ዱንካኒ ኡቲዳሶሆራ ካን ቢዲ ቤቴሊሄሜ ካታማ ፔንጌን ዲዛ ፑልቶዛፔ ሃ ዱቂዲ ዳዊቴስ ኤሂዳ፤ ጊዶ ኣቲን ዳዊቲ ኡዮንታ ኢጺዲ ሄ ሃ ጎዳ ሲንን ጉሲዴስ። 19 ሂስቲዲ፥ «ሃይሳ ማላ ኦሶፔ ታና ጾሲ ናጎ! ታ ሃይሳ ኡይኮ ባ ሼምፖ ባይዚዲ ኤሂዳ ኣሳታ ሱ ኡሻ ማላ ጊዴኔ?» ጊዴስ፤ ሄሳ ጊሻስ ዳዊቲ ሄ ሃ ኡዪቤና፤ ሄ ሄ ሚኖ ኦላንቻቲ ሄሳ ኦዳ። 20 ኢዮኣቤ ኢሻ ኣቢሳዬይ ሄታስ ሃላቃ፤ ኢዚ ባ ቶራን 300 ኣሳታ ኦሊ ዎዴስ፤ ሄሳ ጋሶን ኢዚካ ሄታ ማላ ኤሬቲዴስ። 21 ኢዚ ሄታራ ቆዴቶንታ ኣጊኮካ ኢስታፌ ኣዳ ቦንቾ ዴሚዴስ፤ ኢስታስካ ሃላቃ ጊዲዴስ። 22 ቃብጺኤሌፔ ዪዳ ዮዳሄ ና ባናያይ ኤሬቲዳ ኦላንቻኔ ዎልቃማ ሚሽ ኦዳ ኣሳ፤ ኢዚ ናምኡ ኤሬቲዳ ሞኣቤ ቢታ ኣሳታ ዎዴስ፤ ቃሴ ሻቺ ዳሪዳ ኢሲ ጋላስ ጎንጎሎ ጊዶ ጌሊዲ ጋሞ ዎዴስ። 23 ባናያይ ኢዛስ ጌሳይ ኢቻሹ ዋ ጊዲዛ ጊብጼ ቢታ ኣስ ዎዴስ፤ ሄ ጊብጼ ኣዴዛ ኩሼን ሼማኔ ዎንዲራሼ ኬና ቶራይ ዴስ፤ ባናያይ ጊዲኮ ጉፌ ኦይኪ ቢዲ ኢዛ ኩሼን ዲዛ ቶራ ዳፊ ኤኪዲ ኢዛ ቶራን ኢዛ ዛሪ ዎዴስ። 24 ዮዳሄ ና ባናያይ ሃይታንታ ኦዴስ፤ ኢዚካ ሄታ ማላ ኤሬቲዳ ኣስ ጊዲዴስ። 25 ኢዚ ሄታራ ቆዴቶንታ ኣጊኮካ 30 ኦላንቻታፔ ኣ ቦንቼቲዴስ፤ ዳዊቲ ኢዛ ባና ናጊዛይታ ቦላ ሃላቃ ሂስቲ ሹሚዴስ። 26 ኣሳ ጊዶን ዲዛ ሚኖ ኦላንቻቲ ሃይሳፌ ካሊ ዲዛይታ፥ ኢዮኣቤ ኢሻ ኣሳሄሌ፥ ቤቴሊሄሜ ኣስ ዶዴ ና ኤልያኔ፥ 27 ሃሮዴ ኣስ ሻሞቴ፥ ፒሎኔ ኣስ ሄሌጼ፥ 28 ቴቁሄ ኣስ ኢቄሻ ና ኢራ፥ ኣናቶቴ ኣስ ኣቢኤዜሬ፥ 29 ሁሼ ኣስ ሲቢካዬ፥ ኣሂሆሄ ኣስ ኤላዬ፥ 30 ናጾፌ ኣስ ማሂራዬ፥ ናጾፌ ኣስ ባኣና ና ሄሌዴ፥ 31 ቢኒያሜ ዛርኬፌ ጊቢኣ ኣስ ኤሪባዬ ና ኢታዬ፥ ፒራቶኔ ኣስ ባናያ፥ 32 ጋኣሼ ሾባ ኣስ ሁራዬ፥ ኣራቤ ኣስ ኣቢኤሌ፥ 33 ባሂሩሜ ኣስ ኣዚሞቴ፥ ሻልቦኔ ኣስ ኤሊያሂቤ፥ 34 ጊዞኔ ኣስ ሃሼሜ፥ ሃራሬ ዴሬ ኣስ ሻጌ ና ዮናታኔ፥ 35 ሃራሬ ዴሬ ኣስ ሳካሬ ና ኣሂኣሜ፥ ኡሬ ና ኤልፋሌ፥ 36 ማኬሬ ዴሬ ኣስ ሄፌሬ፥ ፒሎኔ ዴሬ ኣስ ኣካያ፥ 37 ቃርሜሎሴ ኣስ ሄጺሬ፥ ኤዝባዬ ና ናኢራዬ፥ 38 ናታኔ ኢሻ ኢዩኤሌ፥ ኣጋሬ ና ሚቢሃሬ፥ 39 ኣሞኔ ኣስ ዛላቃ፥ ጹሪያ ና ኢዮኣቤ ኦላ ማሳራ ቶኪዛ ቢኦሮቴ ኣስ ናሂራዬ፥ 40 ያቲሬ ኣስ ኢራ፥ ያቲሬ ኣስ ጋሬቤ፥ 41 ሂቴ ኣስ ኦሪዮ፥ ኣሂላዬ ና ዛባዴ፥ 42 ኦሮቤሌ ዛርኬፌ ሺዛ ና ኣዲኔ፤ ኢዚ ኦሮቤሌ ዛርኬታሲኔ ባናራ ኢሲፌ ዲዛ 30 ኣሳታስ ሃላቃ። 43 ማኢካ ና ሃናኔ፥ ሚታኔ ኣስ ኢዮሳፊጼ፥ 44 ኣሽታሮቴ ኣስ ኡዚያ፥ ኣሮኤሬ ዴሬ ኣስ ሆታሞ ናይታ ሻሜኔ ዪኢኤሌ፥ 45 ሺሚሬ ና ዪዲኤሌኔ ኢዛ ኢሻ ቲዜቴ ዴሬ ኣስ ዮሃ፥ 46 ማሃዌ ኣስ ኤልኤሌ፥ ኤልናሜ ናይታ ዪሪባያኔ ዮሻያ፥ ሞኣቤ ዴሬ ኣስ ዪቲማ፥ 47 ኤልኤሌ፥ ኢዮቤዴኔ ጾቤ ዴሬ ኣስ ያኢሲኤሌ። |
The Word for the World International amp The Word for the World Ethiopia