1ታሪኬ ማጻፋ 10 - ጋሞ ማጻፋ

ካዎ ሳኦሌ ሃይቆ

¹ ፊሊስጼሜ ኣሳቲ ኢስራኤሌ ኣሳታራ ኦሌቲዳ፤ ኢስራኤሌ ኣሳቲ ፊሊስጼሜ ኣሳታ ሲንፌ ባቃቲዳ፤ ኢስራኤሌታፔ ዳሮቲ ጊልቦኣ ዙማ ሁኤን ሃይቂዳ።

² ፊሊስጼሜ ኣሳቲ ሳኦሌኔ ኢዛ ናይታ ዬዴ ጋኪዲ ኢዛ ናይታ ዮናታኔ፥ ኣቢናዳቤኔ ማልኬሹኣ ዎዳ።

³ ኦላይ ሳኦሌ ዩዪ ኣዲ ኡንኤዴስ፤ ኦላንቻቲ ኢዛ ዎንዳፌን ዱኪ ማዱንዳ።

⁴ ሳኦሊ ባ ኦላ ማሳራ ቶኪዛ ዎታዳራዛ፥ «ሃ ቃጻሬቶንታ ፊሊስጼሜ ኣሳቲ ዪዲ ታ ቦላ ካኦንታ ማላ ኔ ጊ ማሻን ታና ዎ» ጊዴስ። ጊዶ ኣቲን ኢዛ ኦላ ማሳራ ቶኪዛ ዎታዳራዚ ኬሂ ያዪዳ ጊሻስ ኢጺዴስ፤ ሂስቲን ሳኦሊ ባ ጊ ማሻ ቦላ ኩንዲዲ ሃይቂዴስ።

⁵ ኢዛ ኦላ ማሳራ ቶኪዛይሲ ሳኦሊ ሃይቂዳይሳ ቤኢዳፔ ጉዬ ኢዚካ ባ ጊ ማሻ ሳኣን ኤሲዲ ኢዛ ቦላ ኩንዲ ሃይቂዴስ።

⁶ ሄሳ ሃኒዲ ሳኦሊ፥ ኢዛ ናይቲ ሄቲኔ ኢዛሶ ኣሳቲ ኡባይ ሄ ጋላስ ኢሲፌ ሃይቂዳ።

⁷ ዙሌዛን ዴኢዛ ኢስራኤሌ ኣሳቲ ኡባይ ባንታ ኦላንቻቲ ባቃቲዳይሳ፥ ሳኦሊኔ ኢዛ ናይቲ ሃይቂዳይሳ ቤኢዲ ኢስቲካ ባንታ ካታማታ ኣጊዲ ጋንጊዳ፤ ፊሊስጼሜ ኣሳቲ ዪዲ ሄ ካታማታ ኦይኪዳ።

⁸ ዎንቴ ጋላስ ፊሊስጼሜቲ ኦላ ማሳራታ ሃይቂዳይታ ቦላፌ ቃሪ ኤካናስ ዪዲ ሳኦሊኔ ኢዛ ናይቲ ጊልቦኣ ዙማ ሁኤን ሃይቂዳይሳ ዴሚዳ።

⁹ ሂስቲዲ ኢስቲ ሳኦሌ ሁኤ ቃንጺ ኤኪዲኔ ኢዛ ኦላ ማሳራ ቃሪ ኤኪዳ፤ ሄሳፌ ጉዬ ባንታ ኤቃ ጾሳታሲኔ ባንታ ዴራስ ሃ ጾኖ ሚሺራቾዛ ኣዋጃና ማላ ፊሊስጼሜ ቢታ ኡባስ ኣስ ኪቲ ዬዲዳ።

¹⁰ ኢስቲ ሳኦሌ ኦላ ማሳራታ ባንታ ኤቃ ጾሳታ ኬታን ዎዳ፤ ኢዛ ሁኤዛ ባንታ ኤቃ ጾሳ ዳጎኔ ኬን ካቂዳ።

¹¹ ፊሊስጼሜ ኣሳቲ ሳኦሌ ቦላ ኦዳይሳ ኡባ ጋላኣዴን ዲዛ ያቡሴ ካታማ ኣሳቲ ሲዪዳ ዎዴ፥

¹² ሚኖ ኣሳቲ ቢዲ ሳኦሌ ኣሃኔ ኢዛ ናይታ ኣሃ ኤኪዲ ያቡሴ ካታማ ኤሂዳ፤ ሂስቲዲ ያቡሴን ዲዛ ጊታ ሚ ጋርሳን ሞጊዳ፤ ሄሳፌ ጉዬ 7 ጋላስ ጾሚዳ።

¹³ ሳኦሊ ጎዳስ ኣማኔቲቤና፤ ኢዛ ቃላካ ናጎንታ ኢጺዲ ሞይቲሌ ጼይጊዛይታ ዞሬ ኦይቺዳ ጊሻስ ሃይቂዴስ።

¹⁴ ሄሳ ጋሶን ጎዳይ ኢዛ ዎዲ ኢዛ ካዎቴ ኢሴዬ ና ዳዊቴስ ኣ ኢሚዴስ።