Yaptıklar 8 - Enі Baalantı

Koolamak hristiannara

¹ Saul Stefanın öldürülmesinä kayıl oldu. O gün çeketti büük koolamak İerusalim klisesinä karşı. Apostollardan kaarä, hepsi daaldı İudeya hem Samariya erlerinä.

² Allahtan korkan adamnar Stefanı gömdülär da çok aaladılar onun için.

³ Saul sa çalıştı yok etmää kliseyi. Girärdi evlerä, kuvetlän alardı adamnarı hem karıları da zındana kapardı.

Filip nasaat eder Samariyada

⁴ Onnar, kim daalıştılar, erdän erä gidärdilär da ii haberi annadardılar Allahın sözü için.

⁵ Filip Samariya kasabasına gitti da orada Hristos için nasaat edärdi.

⁶ İnsan, nicä bir adam, esap almaklan seslärdi, ne sölärdi Filip, işidip hem görüp meraklı nışannarı, ani o yapardı.

⁷ Çok hastalardan baarıp-çıkardı fena duhlar, hem çok kötürüm hem topal insannar saa olardılar.

⁸ O kasabada oldu büük sevinmäk.

Büücü Simon

⁹ Orada vardı bir adam, adı Simon, angısı çoktan büücülük yapardı da şaştırardı Samariya halkını. O kendini üstün bir adam sayardı.

¹⁰ Hepsi, küçük-büük, esap almaklan seslärdilär onu da deyärdilär: «Bu adam o, kimä deerlär „Allahın büük kuvedi“».

¹¹ Seslärdilär onu, zerä büücülüklän çok vakıt onnarı şaştırardı.

¹² Ama, açan inandılar Filipi, angısı ii haberi annadardı Allahın Padişahlıı hem İisus Hristozun adı için, vaatiz oldular adamnar hem karılar.

¹³ Simon da artık inandı da vaatiz oldu. O Filiptän hiç ayırılmardı da şaşmaklan bakardı meraklı nışannara hem kudretli işlerä, ani yapılardı.

Petri hem İoan Samariyada

¹⁴ İerusalimdä apostollar, işidip, ani Samariya kabletti Allahın sözünü, orayı yolladılar Petriyi hem İoanı.

¹⁵ Onnar, gelip, dua ettilär, ki samariyalılar kabletsinnär Ayoz Duhu.

¹⁶ Zerä Ayoz Duh taa hiç birinin üzerinä inmemişti, sade vaatiz olmuştular Saabi İisusun adına.

¹⁷ Ozaman Petri hem İoan koydular ellerini onnarın üstünä, da onnar kablettilär Ayoz Duhu.

¹⁸ Açan Simon gördü, ani Ayoz Duh veriler apostolların el koymaklarınnan, ozaman teklif etti versin onnara para

¹⁹ da dedi: «Verin bana da bu kuvettän, ki kimin üstünä ellerimi koyacam, kabletsin Ayoz Duh».

²⁰ Ama Petri dedi: «Senin paran telef olsun seninnän, zerä sän sandın, ki Allahın baaşışını var nicä kazanmaa paraylan!

²¹ Yok payın, yok hakın bu iştä, zerä senin ürään diil haliz Allahın önündä.

²² Pişmannık getir senin bu kötülüündän da dua et Saabiyä, beki afedilir senin bu kötü neetin.

²³ Zerä görerim, ani doluysun kin zihirinnän hem baalıysın zakonsuzluk sincirlerinnän».

²⁴ Simon cuvap etti: «Dua edin benim için Saabiyä, ki başıma gelmesin bişey bundan, ne sölediniz».

²⁵ Şaatlık edip, Saabinin sözünü nasaat ettiktän sora Petri hem İoan döndülär İerusalimä, annadarak İi Haberi Samariyanın çok küülerindä.

Filip hem Efiopiyalı

²⁶ Saabidän bir angil Filipä dedi: «Kalk da git üülenä dooru, o yola, ani İerusalimdän Gaza kasabasına dooru iner. O yol şindi boş».

²⁷ Filip kalktı da gitti. Bu arada bir efiopiyalı evnuh, Kandakın, Efiopiya padişahkasının, bir kudretli izmetkeri, ani bakardı bütün onun haznasını, geeri dönärdi İerusalimdän, nereyi gittiydi Allaha baş iiltsin deyni.

²⁸ O, faytonunda oturarak, okuyardı prorok İsayanın kiyadını.

²⁹ Ayoz Duh dedi Filipä: «Git da etiş bu faytonu».

³⁰ Filip kaçıp etişti faytonu da işitti, nicä evnuh okuyêr prorok İsayanın kiyadını. Filip sordu ona: «Acaba annêêrsın mı, ne okuyêrsın?»

³¹ Evnuh cuvap etti: «Nesoy var nicä annayım, birkimsey yol göstermeyincä bana?» Da yalvardı Filipä, pinsin faytona da otursun onunnan barabar.

³² Okuyardı o eri Ayoz Yazıdan, neredä yazılı: «O götürüldü, nicä bir koyun kesilmää deyni, hem nicä bir kuzu susar kırkanın önündä, O ölä açmadı aazını.

³³ Onu aşaaladılar hem dooru daava yapmadılar. Kim anacek Onun senselesini, zerä yaşaması alındı bu erdän».

³⁴ Evnuh dedi Filipä: «Yalvarêrım, sölä, kimin için lafeder prorok? Kendisi için mi osa başkası için mı?»

³⁵ Ozaman Filip aldı lafı da başladı bu Yazıdan annatmaa ii haberi İisus için.

³⁶ Onnar, yolda gidärkän, etiştilär bir suya. Evnuh dedi: «Tä su; ne köstekleer beni, ki vaatiz olayım?» /

³⁷ Filip dedi: «Eer inanarsaydın bütün üräännän, ozaman var nicä vaatiz olasın». Evnuh cuvap etti: «İnanêrım, ani İisus Hristos Allahın Oolu»./

³⁸ Sımarladı, faytonu durgutsunnar. İndilär ikisi dä su içinä, da Filip vaatiz etti evnuhu.

³⁹ Açan çıktılar su içindän, Saabinin Duhu alıp götürdü Filipi. Evnuh başka onu görmedi. O şen gitti kendi yoluna.

⁴⁰ Ama Filip buldu kendini Azot kasabasında, neredän gitti Kesariya kasabasınadan, annadarak İi Haberi hepsi kasabalarda.