Yaptıklar 4 - Enі Baalantı

Petri hem İoan Sinedrionun önündä

¹ Açan Petri hem İoan lafedärdilär insana, ap-ansızdan geldi popazlar, Ayoz binanın bekçilerin zaabidi hem sadukeylär.

² Darsıktılar onnara, zerä üürederlär insanı, ki hepsi ölülär dirilecek, çünkü İisus dirildi.

³ Tutup onnarı, kapadılar kapana ertesi günä kadar, zerä avşamdı.

⁴ Çoyu onnardan, ani sesledilär nasaatı, inandılar, da inancıların sayısı yaklaştı beş binä.

⁵ İkinci günü iudey öndercileri, aksakallar hem bilgiçlär toplandılar İerusalimä.

⁶ Baş popaz Annan, Kayafa, İoan, Aleksandru, hem öbürleri dä, kim çekiler baş popazın senselesindän, oradaydılar.

⁷ Aldılar Petriyi hem İoanı araya da sordular onnara: «Ne kuvetlän hem kimin adına siz bunu yaptınız?»

⁸ Ozaman Petri, dolu Ayoz Duhlan, dedi onnara: «Halkın öndercileri hem /İzrailin/ aksakalları!

⁹ Çünkü bu gün çaarıldık cuvaba, ki yaptık iilik bir hastaya, da sorulêr, nasıl o alıştı,

¹⁰ biliniz siz hem bütün İzrail milleti! Bu adam, heptän saa durêr sizin önünüzdä Nazaretli İisus Hristozun adından, Angısını siz stavroza gerdiniz, ama Allah diriltti Onu ölüdän.

¹¹ Odur taş, Kim sizdän, ustalardan sıbıdılmış, ama şindi etişti köşä taşı olsun.

¹² Yok başka kimseydä kurtarmak, zerä yok gök altında başka bir ad, baaşlanmış insana, angısınnan kurtulabilelim».

¹³ Görüp Petrinin hem İoanın kıyışıklıını, şaştılar, zerä annadılar, ani onnar diil üürenmiş hem sıradan insannar, da tanıdılar, ani İisuslan gezmişlär.

¹⁴ Ama görüp saa olmuş adamı durarkan onnarın yanında, bişey karşı lafedämärdilär.

¹⁵ Sımarladılar onnara, Sinedriondan çıksınnar, sora dartışmaa başladılar:

¹⁶ «Ne var nasıl yapalım? – dedilär. – Hepsi İerusalimdä yaşayan insan biler, ani onnardan yapıldı bu meraklı nışan. Biz yok nicä deyelim, ani bu olmadı.

¹⁷ Ama ki ileri dooru daalmasın bu haber insan arasında, korkudalım onnarı da sımarlayalım, kimseyä nasaat etmesinnär bu Adamın adınnan».

¹⁸ Sora çaardılar da sımarladılar onnara, hiç bir zaman İisusun adını anmasınnar hem üüretmesinnär insanı Onun adınnan.

¹⁹ Ama Petriylän İoan bölä cuvap ettilär da dedilär: «Siz kendiniz düşünün, dooru mu Allahın önündä olacek, ki taa çok sesleyelim sizi, nekadar Allahı?

²⁰ Biz yok nicä sölämeyelim, ne gördük hem ne işittik».

²¹ Enidän onnarı korkuttuktan sora braktılar, gitsinnär. Hiç bir maana bulamardılar cezalamaa onnarı, zerä hepsi insan Allahı bu oluş için metinnärdi.

²² Zerä bu adam, ani meraklı nışannan alıştırılmıştı, kırk yaşını geçmişti.

²³ Petri hem İoan salverildiktän sora döndülär kafadarlarına da annattılar, ne dedi onnara büük popazlar hem aksakallar.

²⁴ Kafadarları, bunu sesleyip, duada birliktä oldular, seslerini Allaha kaldırıp, dedilär: «Çorbacı, Sänsin, Kim gökü hem eri, denizleri hem hepsini, ne var onnar içindä, yarattı!

²⁵ Sän Ayoz Duhunnan, senin izmetkerin, bizim bobanın, Davidin aazından dedin: „Neçin debreşer milletlär, neçin insannar boş işlär düşünerlär?

²⁶ Erin padişahları kalktılar, hem zaabitlär birleşti Saabiyä hem Onun Hristozuna karşı“.

²⁷ Dooru, ani birleştilär bu kasabada İrod hem Pontiy Pilat, tayfännarlan hem İzrail milletinnän bilä, Senin ayoz Ooluna, İisusa karşı, Kimi Sän yaaladın,

²⁸ ki yapsınnar, ne öncä Kendi kuvedinnän hem ii istediinnän kararladın olsun deyni.

²⁹ Şindi, Saabi, esap al onnarın korkutmaklarını da ver kuvet senin çıraklarına girginniklän Senin sözünü haberlesinnär.

³⁰ Sän dä uzat elini, ki insannar alıştırılsın, da şaşmaklı işlär hem nışannar yapılsın Senin ayoz Oolunun İisusun adınnan».

³¹ Onnarın dualarından sora er sarsalandı, neredä onnar topluydular. Hepsi doldu Ayoz Duhlan da başladılar girginniklän nasaat etmää Allahın sözünü.

İnancıların birlii

³² Hepsi inancılar bir ürek hem bir can gibiydilär. Birisi bilä demärdi, ki varlıı salt kendisinin. Hepsi işlerini biri-birinnän paylaşardılar.

³³ Apostollar büük kuvetlän şaatlık edärdilär Saabi İisus /Hristozun/ dirilmesi için, da insan onnarı hepsini çok beenärdi.

³⁴ Onnarın arasında yoktu birisi bilä, ani yokluk götürsün, zerä herkezin, kimin vardı tarlası eki evi, satıp, parasını getirärdilär

³⁵ apostolların ayaklarına, sora para pay olardı herkezinä lääzımnıına görä.

³⁶ Kipruda duumuş bir leviyli, İosif, angısına apostollar deyärdilär Varnava, annaması «iilendirici»,

³⁷ sattı kendi tarlasını da parayı apostolların ayaklarına getirdi.