Yaptıklar 26 - Enі Baalantı

Pavli çıkarêr dooruluunu Agrippanın önündä

¹ Agrippa dedi Pavliyä: «Veriler izin, lafedäsin kendin için». Ozaman Pavli, uzadıp elini, başladı dooruluunu çıkarmaa:

² «Padişah Agrippa! Sayêrım kendimi mutlu, ani büün var kolaylıım dooruluumu çıkarayım senin önündä hepsindän, neylän iudeylär beni kabaatlandırêr.

³ En çok sevinerim, çünkü Canabin bilersin iudeylerin hepsi adetlerini hem soruşlarını. Onuştan yalvarêrım, seslä beni saburlu.

⁴ Hepsi iudeylär bilerlär, nasıl yaşadım baştan, gençliimdän kendi halkımın arasında hem İerusalimdä.

⁵ Beni çoktan tanıyêrlar hem eer kayıl olursaydılar, şaatlık edäbilirlär, ani yaşadım nicä bir farisey, bizim dinin en sıkı bölümünä görä.

⁶ Da şindi durêrım daava önündä umudum için ona, ne Allah adadı bizim bobalara.

⁷ Hepsi bizim oniki senselä umutlan bekleer, bu adamak tamannansın, izmet ederäk Allaha şeremetliklän gecä-gündüz. Tä bu umut için, padişahım, kabaatlandırêrlar beni iudeylär.

⁸ Neçin sizä inanılmaz görünür, ani Allah ölüleri dirilder?

⁹ Dooru, ani bän dä sanardım, ki lääzım kuvetlän karşı gideyim Nazaretli İisusa.

¹⁰ Ölä da yaptım İerusalimdä. Büük popazlardan zaabitlik kabledip, çoyunu Allahın ayoz halkından kapadım zındana. Açan onnar ölümä verildilär, bän dä ses verdim onnara karşı.

¹¹ Hepsi sinagogaları gezeräk, çok sıra onnarı cezalardım hem zorlardım, kötülesinnär İisusu. Bän ölä kudurmuştum, ki artık yabancı milletlerin kasabalarına da gidärdim onnarı koolamak için.

¹² Bu neetlän yollandım Damask kasabasına zaabitliklän hem bir maasuz sımarlamaklan, ne aldıydım büük popazlardan.

¹³ Üülendä, padişahım, yolda gördüm bir şafk göktän, taa keskin günün aydınnıından, ani aydınnattı benim hem yoldaşlarımın dolayını.

¹⁴ Hepsimiz erä düştük. Bän işittim bir ses, ani dedi bana çıfıt dilindä: „Saul! Saul! Neçin Beni koolêêrsın? Zor sana gitmää kazaa karşı“.

¹⁵ Ozaman sordum: „Saabim, Kimsin Sän?“ Saabi dedi: „Bänim – İisus, Kimi sän koolêêrsın.

¹⁶ Haydi şindi kalk ayakça da dik dur, zerä Bän göründüm sana, ki koyayım seni izmetkär hem şaat, nicä onnar için, ne gördün hem ne dä açacam sana.

¹⁷ Seni kurtaracam kendi halkından hem başka milletlerdän, kimä Bän seni yollêêrım,

¹⁸ ki açasın onnarın gözlerini, da dönsünnär karannıktan aydınnaa hem şeytanın kuvedindän Allaha, edensinnär afetmäk günahlarından hem bir pay onnarlan, kim ayozlanêr inannan Bana“.

¹⁹ Onuştan, padişah Agrippa, bän karşı durmadım göktän görünmeyä.

²⁰ Nasaat ettim ilkin Damask kasabasında, sora İerusalimdä insana, sora bütün İudeya erindä hem yabancı milletlerä, ki pişman olsunnar günahlarından, dönsünnär geeri Allaha da yapsınnar, ne yaraşır bu pişmannıkta.

²¹ Tä bunun için tuttular beni iudeylär Ayoz bina içindä da baktılar paralamaa.

²² Ama yardım kablettim Allahtan da büünädän yaşamakta bulunêrım hem şaatlık ederim küçüünä-büünä. Bişey zeedä sölämeerim ondan kaarä, ne proroklar hem Moisey söledi, ki lääzım tamannansın.

²³ Onnar söledi, ani Hristos lääzımdı zeetlensin da olsun ölülerdän ilk dirilän, haberlesin aydınnıı Kendi halkına hem yabancı milletlerä».

²⁴ Açan Pavli butürlü dooruluunu çıkarardı, Fest büük seslän dedi: «Pavli, sän deliysin! Senin çok üürenmişliin seni akıldan çıkarêr!»

²⁵ «Diilim deli, çok hatırlı Fest! – cuvap etti Pavli. – Ama bän söleerim aslı hem akıllı laflar.

²⁶ Bunnarı biler padişah. Onun için girgin lafederim onun önündä hem sanmêêrım, ani padişaha bunnardan kaldı saklı bişey, zerä bunnar olmadılar bir köşedä.

²⁷ İnanêrsın mı, padişah Agrippa, prorokları? Bilerim, ani inanêrsın!»

²⁸ Agrippa dedi Pavliyä: «Beni yakın inandırdın hristian olayım!»

²⁹ Pavli dedi: «Allah versin, taa tez yada taa geç, diil salt Canabin, ama hepsi, kim sesleer büün beni, benim gibi olsunnar, bu sincirlerdän kaarä».

³⁰ /Açan Pavli dedi bunu,/ padişah, kullanıcı hem Verenika, hem hepsi orada oturannar kalktılar.

³¹ Toplanıp bir tarafta, lafettilär biri-birinnän, ani bu adam yapmêêr bir dä kötülük, ani lääzım olsun cezalansın ölümnän eki kapannan.

³² Agrippa dedi Festä: «Vardı nicä salvermää onu, eer o istämeydi Kesarın daavasını».