Yaptıklar 25 - Enі Baalantı

Pavli isteer Kesarın daavasını

¹ Fest, bu dolaya geldiktän üç gün sora, Kesariya kasabasından gitti İerusalimä.

² Büük popazlar hem iudeylerin öndercileri aalaştılar ona Pavlidän da yalvardılar,

³ ki onnara bir hatır yapsın da getirtsin Pavliyi İerusalimä. Onnar neetlenärdilär kollamaa onu yolda hem öldürmää.

⁴ Ama Fest cuvap etti, ani Pavli durêr bekçilik altında Kesariya kasabasında, hem ani o kendisi tezdä orayı gidecek.

⁵ Sora dedi: «Sizin aranızdan zaabitlerdän gelsinnär benimnän barabar, da varsa bir yannışlık bu adamda, onu kabaatlasınnar».

⁶ Fest kalmadı onnarın arasında sekiz-on gündän zeedä. Sora yollandı Kesariya kasabasına. İkinci günü oturdu daava skemnesinä da sımarladı, getirsinnär Pavliyi.

⁷ Açan içyanına girdi Pavli, iudeylär, ani geldiydilär İerusalimdän, sardılar onu doz-dolay, kabaatlamaa başladılar çok aar laflarlan, neyin aslısını gösterämärdilär.

⁸ Pavli dooruluunu bölä çıkardı: «Benim yok kabaatım iudeylerin zakonuna karşı, ne da Ayoz binaya karşı, ne da Kesara karşı».

⁹ Fest, angısı iudeylerä istedi hatır yapmaa, sordu Pavliyä: «İsteersin mi gidäsin İerusalimä, ki sana orada daava yapayım bunnar için?»

¹⁰ Pavli cuvap etti: «Bän durêrım Kesarın daava skemnesinin önündä, neredä bana daava lääzım olsun. İudeyleri bän bişeylän gücendirmedim, nicä sän dä ii bilersin.

¹¹ Eer kabaatlısaydım hem yaptısaydım bişey, ki ölümnän cezalanayım, ölmektän çekinmeerim. Ama eer yoksaydı bişey aslı, neylän beni kabaatlandırêrlar, ozaman yok nasıl kimsey beni versin onnarın elinä. İsteerim Kesarın daavasını!»

¹² Fest, lafedip kendi yardımcılarınnan, cuvap etti: «Sän istedin Kesarın daavasını, Kesara gidecän».

Fest padişah Agrippaya danışêr

¹³ Birkaç gündän sora padişah Agrippa hem Verenika geldilär Kesariya kasabasına Festi selämnemää.

¹⁴ Çünkü çok gün orada bulundular, Fest annattı padişaha, nicä durêr Pavlinin işi, da dedi: «Burada kalma Felikstän var bir kapancı.

¹⁵ Bän İerusalimdeykän, ondan aalaştılar büük popazlar hem iudeylerin aksakalları da istedilär, kabaatlı bulayım onu.

¹⁶ Bän cuvap ettim onnara, ani romalılarda yok alışmak vermää adamı ölümä, taa üzleştirmediynän onu kabaatçılarlan hem vermediynän ona kolaylık, dooruluunu çıkarsın onda, neylän onu kabaatlandırêrlar.

¹⁷ Açan onnar geldilär burayı, bän hiç oyalanmadım da ikinci günü, oturup daava skemnesinä, emir ettim, getirsinnär onu.

¹⁸ Ama onun kabaatçıları, ayakça kalkıp, bir dä kötü işin aslısını gösterämedilär, neylän bän sanardım, ani kabaatlandıraceklar onu.

¹⁹ Sade onunnan çekişleri vardı kendi dinneri için hem bir Adam için, adı İisus, Angısı öldü, ama Pavli söleer, ki yaşêêr.

²⁰ Bän bilmärdim, nasıl bu işleri aaraştırayım, onuştan sordum: „İsteersin mi gitmää İerusalimä, ki orada daava yapılsın sana bunnar için?“

²¹ Ama Pavli istedi, ki bekçilik altında tutulsun imperatorun kararı için. Onuştan bän sımarladım, ki tutsunnar onu bän Kesara yollayınca».

²² Agrippa dedi Festä: «İsteerim sesleyim bän dä bu adamı». «Yaarına sesleyecän», – cuvap etti Fest.

²³ Ertesi günü Agrippa hem Verenika büük donaklıklan geldilär da girdilär auditoriyaya asker binbaşlarınnan hem kasabanın anılmış adamnarınnan barabar. Festin sımarlamasına görä içeri getirdilär Pavliyi.

²⁴ Fest dedi: «Padişah Agrippa hem hepsi, kim burada bizimnän! Siz görersiniz o adamı, kimin için bütün iudey halkı, hem İerusalimdä, hem burada bana yalvardı, baarıp, ani o diil lääzım yaşasın.

²⁵ Ama bän buldum, ani o bişey yapmadı, ki cezalansın ölümnän. Çünkü kendisi istedi daava kessin ona imperator, bän kararladım onu imperatora yollamaa.

²⁶ Bendä yok aslı açıklanmış bişey, ki yazayım benim çorbacıma. Onun için çıkarttım onu sizin önünüzä, hem ayırıca senin önünä, padişah Agrippa, ki aaraştırdıktan sora olsun ne yazayım.

²⁷ Zerä sanêrım, ki uygun olmaz yollayım bir kapancıyı, açıklamadaan neylän kabaatlı».