Yaptıklar 24 - Enі Baalantı

¹ Beş gündän sora geldi Ananiya, baş popaz, aksakallarlan barabar hem bir becerikli laf ustasınnan, adı Tertul. Onnar aalaştılar Pavlidän kullanıcının önündä.

² Çaardılar Pavliyi da Tertul başladı kabaatlandırmaa onu butürlü: «Çok hatırlı Feliks, Canabin yapêrsın, ki biz çok vakıtlar yaşêêrız barışmakta. Bu millet için Canabinin zaametinnän çok ii işlär yapıldı.

³ Bunnarı biz çok şükürlüklän anarız herzaman hem hererdä.

⁴ Ama, ki taa yorultmayalım Canabini deyni, yalvarêrız, saburluklan seslä bizi kısadan.

⁵ Biz bulduk, ani bu adam – bir beladır. O kalkındırêr hepsi iudeyleri bütün dünnedä hem bir öncüdür nazoreylerin sektasında.

⁶ O kıyıştı artık mındarlasın Ayoz binayı, ama biz tuttuk onu /da istedik daava yapmaa bizim zakona görä,

⁷ ama asker binbaşı Lisiy, gelip büük kuvetlän, kaptı onu bizim elimizdän

⁸ da bizä, onun kabaatçılarına, sımarladı, gelelim Canabinä/. Sän onu soruya çekirseydin, var nicä kendin dä annayasın hepsini bunnarı, neylän biz onu kabaatlêêrız».

⁹ Oradakı iudeylär, kabaatlamaya katılıp, dedilär, ani hepsi bunnar hakına aslı.

Pavli doorudêr kendini Feliksin önündä

¹⁰ Kullanıcı Pavliyä nışan yaptı, ki lafetsin. Pavli bölä dedi: «Bilerim, ani Canabin çok yıllar daava yapêrsın bu milletä, onuştan sevinçlän bakacam, çıkarayım dooruluumu.

¹¹ Canabin kendin var nicä annayasın, ani yok oniki gündän zeedä, nezamandan bän gittim İerusalimä, baş iildeyim Allaha.

¹² Onnar ne Ayoz bina içindä, ne sinagogalar içindä, ne da kasaba içindä beni bulmadılar birinnän lafedärkän yada karışmalık insan arasında yaparkan.

¹³ Onnar yok nasıl sana, çıkarıp, göstersinnär bunun aslısını, neylän şindi beni kabaatlandırêrlar.

¹⁴ Ama şaatlık ederim Canabinä, ani izmet ederim benim bobaların Allahına o yola görä, ani onnar sayêrlar bir sekta. İnanêrım hepsini, ne var yazılı Zakonda hem proroklarda.

¹⁵ Umut ederim Allaha, nicä onnar da inanêrlar, ani olacek ölülerin dirilmesi, nicä doorulara, hem ölä dooru olmayannara da.

¹⁶ Onuştan bän çalışêrım, ki herzaman pak üzlän olayım Allahın hem insanın önündä.

¹⁷ Çok yıllardan sora geldim, ki getireyim yardım milletimä hem kurban Allaha.

¹⁸ Bän kurban getirirkän, Asiyadan kimi iudeylär hızlandılar üstümä Ayoz binada. O vakıt bän paklandıydım, dolayımda da kalabalık yada karışmalık yoktu.

¹⁹ Onnar kendileri lääzımdı gelsinnär Canabinin önünä da kabaatlandırsınnar beni, eer varsa ne aalaşsınnar bendän.

²⁰ Yada, burada olannar sölesinnär, ne kabaat bendä buldular, açan çıkardılar beni Sinedrionun önünä?

²¹ Salt bir laftan kaarä, ani baardım, ki çıkarıldım onnarın önünä: „Ölülerin dirilmesi için bän büün daava olêrım sizin önünüzdä“».

²² Feliks, angısı ii bilärdi İisusun yolunu, attı daavayı başka vakıda da dedi: «Sizin işinizi aaraştıracam, açan gelecek binbaşı Lisiy».

²³ Sora o sımarladı üzbaşına beklesin Pavliyi, ama taa serbest braksın hem durgutmasın yakın olannarını, ki izmet etsinnär ona.

Pavli nasaat eder Feliksä

²⁴ Birkaç gündän sora Feliks geldi kendi karısınnan, Druzillaylan, angısı iudeykaydı, çaarttı Pavliyi da sesledi onun lafını İisus Hristozun inanı için.

²⁵ Açan Pavli başladı sölemää dooruluk için, kendini zaplamak için hem Allahın gelän daavası için, Feliks titsilendi da dedi: «Şindilik git, açan bulacam vakıt, enidän çaardacam seni».

²⁶ Bununnan barabar o umut çekärdi, ani Pavli ona para verecek, ki salversin onu. Onuştan sıkça çaardardı da lafa durardı onunnan.

²⁷ İki yıl geçtiktän sora Feliksin erinä geldi Porţiy Fest. Feliks, ani istedi beendirsin kendini iudeylerä, braktı Pavliyi kapanda.