Yaptıklar 21 - Enі Baalantı

İerusalimä yol

¹ Açan biz ayırıldık onnardan, üzüp gemiylän gittik Kos adasına dooru, ikinci günü Rodos adasına, oradan da Patara kasabasına gittik.

² Bulduk orada bir gemi, ani üzärdi Finikiya erinä, pindik ona da yola çıktık.

³ Kipru adasını görüp, üülen tarafından geçtik, üzdük Siriyaya dooru da etiştik Tir kasabasına, zerä burada lääzımdı ükü gemidän indirsinnär.

⁴ Orada üürenicileri bulduk da kaldık edi gün onnarda. Onnar, güdülmüş Ayoz Duhtan, dedilär Pavliyä gitmesin İerusalimä.

⁵ Açan orada vakıdımız geçti, yola çıkıp gittik. Bizi hepsi geçirdilär karılarınnan hem uşaklarınnan kasabanın kenarınadan. Etiştiynän deniz boyuna, diz çöktük da dua ettik.

⁶ Bundan sora biri-birimizdän ayırıldık. Biz pindik gemiyä, ama onnar döndülär geeri evä.

⁷ Tir kasabasından gemiylän ileri dooru gideräk, etiştik Ptolemaida kasabasına, neredä selämnedik kardaşları da onnarda kaldık bir gün.

⁸ İkinci günü /Pavliylän bilä/ yola yollandık da etiştik Kesariya kasabasına. Girdik evangelistin, Filipin evinä, ani edi yardımcının birisiydi, da kaldık onda.

⁹ Onun vardı dört evlenmemiş kızı, angıları prorokluk edärdilär.

¹⁰ Orayı bir parça vakıttan İudeyadan geldi bir prorok, adı Agav.

¹¹ O geldi yanımıza, aldı Pavlinin kuşaanı, baaladı kendi ellerini hem ayaklarını da dedi: «Tä, ne deer Ayoz Duh: „Bölä iudeylär baalayaceklar İerusalimdä bu adamı, kimin bu kuşak, da vereceklär tayfännarın elinä“».

¹² Bunu işidip, biz hem oradakılar yalvardık Pavliyä, gitmesin İerusalimä.

¹³ Ama Pavli dedi: «Ne yapêrsınız, neçin aalêêrsınız hem benim üreemi kırêrsınız? Bän hazırım diil sade baalanayım, ama öleyim da İerusalimdä Saabi İisusun adı için».

¹⁴ Biz onu döndürämedik, onun için, uslanıp, dedik: «Olsun Saabinin istedii!»

¹⁵ Bir parça vakıttan sora, hazırlandık da yollandık İerusalimä dooru.

¹⁶ Bizimnän barabar geldi birkaç üürenici Kesariya kasabasından. Onnar götürdülär bizi bir eski üüreniciyä, Mnasona Kiprudan, angısının evindä lääzımdı konaklanalım.

Pavli İerusalimdä

¹⁷ Açan etiştik İerusalimä, kardaşlar bizi sevinmeliklän kablettilär.

¹⁸ İkinci günü Pavli bizimnän gitti görmää İakovu. Hepsi presviterlär dä orada topluydular.

¹⁹ Pavli selämnedi onnarı, sora hepsini annattı, ne yaptı Allah tayfännarın arasında onun izmetçiliinnän.

²⁰ Onnar sesledilär, metinnedilär Allahı da dedilär: «Görersin mi, kardaş, kaç bin insan inandı iudeylerdän, onnar da hepsi çalışkan Zakon için.

²¹ Onnar senin için işittilär, ani sän hepsi iudeyleri, kim tayfännarda yaşêêrlar, üüredersin, ki Moiseydän atılsınnar, hem deersin, kesiklik uşaklara yapmasınnar hem adetlerimizä görä yaşamasınnar.

²² Şindi ne yapalım? /İnsan toplanacek, zerä/ onnar mutlak işideceklär, ani sän geldin.

²³ Onuştan yap, nicä sana deyecez. Bizdä var dört adam, angıları adamak adadılar Allaha.

²⁴ Al onnarı seninnän, paklan onnarlan barabar, sän harcan onnar için, ki onnar kırktırsınnar başlarını, da herkezi annayacek, ani ne işittilär senin için, diil aslı, ama sän dä kendin Zakonu tutarak yaşêêrsın.

²⁵ Ama tayfännar için, ani inana geldilär, biz kararladık hem yazdık, ki korunsunnar imeklerdän, ani baaşlanmış idollara, kandan, buulmuş hayvan etindän hem orospuluktan».

²⁶ Ozaman Pavli aldı bu adamnarı da ertesi günü paklandı onnarlan bilä. Sora girdi Ayoz binaya, ki haberlesin, nezaman paklanmak günneri biter hem nezaman lääzım herkezi kendisi için kurban getirsin.

Pavliyi tuttular

²⁷ Edi gün bitärkän, Asiyadan iudeylär gördülär Pavliyi Ayoz binanın aulunda. Debreştirdilär hepsi insanı da tuttular onu.

²⁸ Onnar baarardılar: «İzrailin adamnarı, yardım edin! Bu adam hepsini hererdä üüreder halkımıza, Zakona hem bu erä karşı. Bundan kaarä, urumnarı da soktu Ayoz bina içinä da mındarladı ayoz eri».

²⁹ Onnar görmüştülär Efestän Trofimi kasaba içindä Pavliylän barabar da sanmıştılar, ani Pavli onu da soktu Ayoz bina içinä.

³⁰ Bütün kasaba esirdi, toplandı insan her taraftan, tuttular Pavliyi da sürüdülär Ayoz binadan dışarı. Osaat Ayoz binanın kapuları kapandı.

³¹ Açan bakardılar onu öldürmää, romalı polkun binbaşına etişti haber, ani bütün İerusalim kalkındı.

³² Asker binbaşı oyalanmayarak aldı askerleri hem asker üzbaşlarını, da alatladılar kalabalaa dooru. İnsan, görüp asker binbaşını hem askerleri, durgundu Pavliyi düümektän.

³³ Asker binbaşı, yaklaşıp, tuttu onu da sımarladı, baalasınnar iki sincirlän. Sora sordu: «Kimdir o hem ne yaptı?»

³⁴ İnsan baarardı, kimisi bir türlü, başkası başka türlü. Çünkü binbaşı annayamadı işin aslısını gürültü beterinä, sımarladı, götürsünnär onu kaleyä.

³⁵ Açan Pavli etişti merdivenä, askerlär lääzımdı taşısınnar onu kalabalıın sıkışmalıından.

³⁶ Çok insan gidärdi onun ardına da baarardı: «Ölümä onu!»

Pavli lafeder insana korunmak için

³⁷ Gireceykän kaleyä, Pavli sordu asker binbaşına: «Var mı nicä söleyim sana bişey?» Binbaşı sordu: «Ne, urumcä mı bilersin?

³⁸ Diilsin mi sän o mısırlı, kim bir parça vakıt taa ileri kalkıntı yaptı da götürdü çol erä dört bin haydut?»

³⁹ Pavli dedi: «Bän iudeylerdänim, Kilikiyanın Tars kasabasından, ani bilinir bir kasaba. Yalvarêrım sana, salver lafedeyim insannan».

⁴⁰ Açan o izin etti, Pavli durardı ayakça merdivendä, elinnän yaptı nışan insana. Derin bir susuntu oldu. Pavli başladı çıfıt dilindä bölä lafetmää: