Yaptıklar 20 - Enі Baalantı

Pavli Makedoniyada

¹ Karışmalık uslanmasından sora Pavli topladı üürenicilerini, girginnetti onnarı, sora söledi onnara «kalın saalıcaklan» da yollandı yola, Makedoniyaya gitmää.

² Geçip oralardan, çok lafetti inancılarlan da onnarı üreklendirdi. Sonda etişti Ellada erlerinä.

³ Orada üç ay kaldıktan sora Pavli istedi gemiylän gitsin Siriyaya, ama iudeylär kötü neet kurdular ona karşı. Onuştan kararladı dönsün geeri Makedoniyadan.

⁴ Ona yoldaş oldular /Asiyaya kadar/: veriyalı Sopater, Pirin oolu; Aristarh hem Sekund, Salonik kasabasından; derviyalı Gay; Timofey; Tihik hem Trofim Asiyadan.

⁵ Onnar öncä gittilär da beklärdilär bizi Troada kasabasında.

⁶ Hamursuz yortuyu geçirdiynän, biz üzdük gemiylän Filip kasabasından. Beş gündän sora etiştik onnarı Troada kasabasında, neredä kaldık edi gün.

Evtih

⁷ Haftanın ilk günü, açan topluyduk ekmek kırmak için, Pavli, angısı ertesi günü lääzımdı gitsin, nasaat etti üürenicilerä da uzattı lafını gecä yarısınadan.

⁸ O yukarkı odada, neredä biz topluyduk, çok şafk yanardı.

⁹ Bir delikannı, adı Evtih, oturardı pençeredä. Pavlinin uzun nasaatında Evtih uyuyar kaldı da, ensenmiş uykudan, düştü üçüncü kattan erä. Onu kaldırdılar ölü.

¹⁰ Pavli aşaa indi, kapandı üstünä, sora, alıp onu kucak, dedi: «Kahırlanmayın, o diri».

¹¹ Pavli enidän pindi geeri içeri, kırdı ekmää da idi. O lafetti aydınnanınca, sora gitti kendi yoluna.

¹² Bu genç olanı getirdilär içeri diri da bu oluş için çok girginnendilär.

Troadadan Militä yolculuk

¹³ Biz Pavlidän ileri gittik gemiyä da üzdük As kasabasına. Oradan Pavliyi almaa düşünürdük, zerä o bölä sımarladı. Kendisi düşünürdü orayı kadar yayan gitmää.

¹⁴ Açan buluştu bizimnän As kasabasında, aldık onu da gemiyä da gittik Mitilini kasabasına.

¹⁵ Oradan gemiylän üzdük. İkinci günü geldik Hios adanın karşısına. Ertesi günü etiştik Samos adaya, /durgunduk Trogilliya kasabasında,/ bir gündän sora gittik Milit kasabasına.

¹⁶ Pavli kararlamıştı geçmää Efes kasabasının yanından, ki oyalanmasın Asiyada, zerä o alatlardı, kolaya görä bulunsun İerusalimdä Ellinci yortusunda.

Pavli deer «kalın saalıcaklan» Efestän presviterlerä

¹⁷ Pavli Milittän yolladı haber Efes kasabasına da çaarttı klisenin presviterlerini.

¹⁸ Açan yanına geldilär, Pavli onnara dedi: «Siz bilersiniz, nicä herzaman sizinnändim ilk gündän, ayak bastıım zaman Asiyaya.

¹⁹ İzmet ettim Saabiyä bütün yavaşlıklan hem yaşlarlan, koymayarak esaba zorlukları, ani başıma geldi iudeylerin kötü neetleri beterinä.

²⁰ Bilersiniz, ani bişey sizdän saklamadım, ne ani sizin için faydalıdır. Sakınmadım haberleyim hem üüredeyim sizi insan önündä hem evlerinizdä.

²¹ Çaardım hem iudeyleri, hem urumnarı, dönsünnär günahlarından Allaha da inansınnar Saabimiz İisusa.

²² Şindi bän, Ayoz Duhtan çekilmiş, giderim İerusalimä. Bilmeerim, ne orada benimnän olacek.

²³ Sade herbir kasabada Ayoz Duh bana haberleer, ki orada beni sincirlär hem zeetlär bekleer.

²⁴ Ama bän bişeyä bakmêêrım, yaşamamı da paaya koymêêrım. İsteerim salt sevinmäklän yolumu hem izmetçiliimi başa çıkarayım, ani kablettim Saabi İisustan, da şaatlık edeyim İi Haberi Allahın iivergisi için.

²⁵ Ama şindi bilerim, ani artık hiç biriniz bilä benim üzümü görmeyecek, kiminnän gezdim hem nasaat ettim Allahın Padişahlıını.

²⁶ Büün şaatlık ederim sizä, ne dä olursa sizin kanınızdan bän pakım.

²⁷ Zerä sakınmadım haberleyim sizä Allahın bütün istediini.

²⁸ Esap alın kendi-kendinizä hem bütün sürüyä, kimin üstünä Allah koydu sizi güdücü, ki güdäsiniz Saabinin /hem Allahın/ klisesini, angısını kazandı Kendi kanınnan.

²⁹ Bilerim, ani benim gitmemdän sora sizin aranıza paralayıcı yabanılar girecek, angıları acımayacek sürüyü.

³⁰ Sizin dä aranızdan kalkacek ölä adamnar, angıları tersinä lafedeceklär, ki üürenicileri kendi tarafına çeksinnär.

³¹ Onun için, kuşku olun hem unutmayın, ani bän üç yıl gecä-gündüz yaşlar gözlerimdä durmamayca herkezinizi üürettim.

³² Ama şindi vererim sizi, kardaşlar, Allahın elinä hem Onun hayırlı sözünä, ani var nasıl sizi kaavilesin da miraslık versin bütün ayoz halkınnan.

³³ Tamahlanmadım kimseyin gümüşünä, altınına yada rubasına.

³⁴ Kendiniz bilersiniz, ani bu ellerim izmet etti kendi lääzımnıklarıma hem onnara, kim benimnän barabardı.

³⁵ Herbir üzerä sizä gösterdim, ani, butürlü işleyip, lääzım yardım edelim yufka olannara da unutmayalım Saabi İisusun sözlerini, zerä O Kendisi dedi: „Taa mutlu vermää, nekadar almaa“».

³⁶ Bölä lafettiktän sora Pavli diz çöktü da hepsinnän barabar dua etti.

³⁷ Hepsi çok aaladı da, sarmaşıp Pavlinin boynusuna, öptülär onu.

³⁸ Kahırlandılar taa pek laflarından, ani dedi, ki artık görmeyeceklär onun üzünü. Sora geçirdilär onu gemiyä kadar.