Yaptıklar 2 - Enі Baalantı

Ayoz Duhun inmesi

¹ Ellinci günü yortusunda hepsi birerdä topluydular.

² Ap-ansızdan göktän işidildi bir ses, nicä büük bir lüzgär uultusu, ani doldurdu bütün evi, neredä onnar bulunardılar.

³ Onnara göründü ateş dillär gibi, ani bölünüp herkezinä kondular.

⁴ Hepsi Ayoz Duhlan dolup, lafetmää başladılar başka dillerdä, nicä Duh verirdi, lafetsinnär.

⁵ İerusalimdä bulunardılar iudeylär, dinni adamnar, toplu gök altından hertürlü milletlerdän.

⁶ Açan işidildi bu uultu, çok insan orada oldu bir karışıklık, zerä herkezi işidärdi apostolları lafederäk onun kendi dilindä.

⁷ Hepsi şaşıp daptur geldilär da deyärdilär biri-birinä: «Ya bakın, bunnar, kim lafeder, diil mi hepsi Galileyadan?

⁸ Nasıl herbirimiz işideriz onnarı lafederäk bizim kendi ana dilimizdä?

⁹ Biz – parfiyalılar, midiyalılar, elamnılar, insannar, ani yaşêêrlar Mesopotamiyada, İudeyada, Kappadokiyada, Pontta hem Asiyada,

¹⁰ Frigiyada, Pamfiliyada, Mısırda, Liviya erlerindä, ani Kirinä tarafında, Romadan musaafirlär, iudeylär hem prozelitlär,

¹¹ kritlilär hem araplar, işideriz onnarı lafederäk bizim kendi dilimizdä Allahın büük işleri için!»

¹² Hepsi şaşardılar, bilmärdilär ne inansınnar. Onnar sorardı biri-birinä: «Nedir bu?»

¹³ Ama başkaları, gülmää alarak, deyärdilär: «Onnar taazä şaraptan sarfoş olmuşlar!»

Petrinin Ellinci günü nasaatı

¹⁴ Petri kalktı kalan onbir apostollan barabar da, alıp lafı, büük seslän dedi: «İudey adamnarı hem hepsi, kim yaşêêr İerusalim kasabasında, sesleyin benim laflarımı da biliniz!

¹⁵ Onnar diil sarfoş, nicä siz sanêrsınız, zerä şindi salt üçüncu saat sabaadan.

¹⁶ Ama bu oldu o, ne sölendiydi prorok İoildän:

¹⁷ „Son günnerdä, deer Allah, dökecäm Benim Duhumdan herbir insan üstünä. Sizin oollarınız hem kızlarınız prorokluk edeceklär. Gençleriniz görünmäk göreceklär, ihtärlarınız düş göreceklär!

¹⁸ O günnerdä Benim çıraklarımın üstünä, adamnarın hem karıların üstünä, dökecäm Benim Duhumdan, da onnar prorokluk edeceklär.

¹⁹ Gösterecäm şaşmaklı işlär yukarda, göklerdä, hem nışannar aşaada, erdä: kan, ateş hem bulut gibi tütün.

²⁰ Gün karannıklanacek, ay kan renginä dönecek Saabinin büük hem şafklı günün önü sora.

²¹ Ozaman kim Allahın adını çaaracek, kurtulmuş olacek“.

²² İzrail adamnarı, sesleyin bu lafları! Nazaretli İisus bir Adamdı, Angısının kimniini Allah açık gösterdi sizä kudretli yaptıklarlan, şaşmaklı işlärlän hem nışannarlan, angılarını Allah yaptı sizin aranızda Onunnan, nicä kendiniz bilersiniz.

²³ Bu Adam verildi sizin elinizä öncä Allahın kurulmuşuna hem bilmesinä görä. Onu siz enserlediniz stavroza hem öldürdünüz zakonsuzların ellerinnän.

²⁴ Ama Allah, ölümün acılarına son verip, Onu diriltti. Ölüm esirlää alamadı Onu.

²⁵ Zerä David Onun için deer: „Gördüm herzaman Saabiyi benim önümdä, zerä O benim saa tarafımda, ki bän sallanmayım.

²⁶ Onun için ürääm seviner hem dilim şennener, güüdäm umutlan dinnener.

²⁷ Zerä Sän brakmayacan canımı ölülär erindä, izin vermeyecän, Senin Ayozun güüdesi çürüsün.

²⁸ Açtın bana, tanıyım yaşamak yolunu. Sän sevindirecän beni Kendi önündä“.

²⁹ Kardaşlar, David atamız için, sizä açık söleerim, ani o öldü hem gömüldü, mezarı da bizdä büünkü günä kadar.

³⁰ Çünkü David proroktu, o bilärdi, ne Allah eminnän adamıştı, ani onun ardından gelennerdän birisini kaldıracek çorbacılık skemnesinä.

³¹ O gelecek vakıtları göreräk, Hristozun dirilmesi için lafetti, ani Onun canı ölülär erindä brakılmayacek hem güüdesi çürümeyecek.

³² Bu İisusu Allah ölüdän diriltti, biz hepsimiz buna şaadız.

³³ O Allahın saa tarafına kaldırıldı, kabletti adanmış Ayoz Duhu da Onu şindi döktü, nicä görersiniz hem işidersiniz.

³⁴ David kalkmadı gökä, ama kendi dedi: „Saabi dedi benim Çorbacıma: Otur saa tarafımda,

³⁵ Bän koyunca Senin duşmannarını ayakların altına“.

³⁶ Bütün İzrail halkı ii bilsin, ani Allah yaptı İisusu Çorbacı hem Hristos. Odur, Kimi stavroza gerdiniz».

İlk hristiannar

³⁷ Onnar bu lafları işidip, ürekleri saplanmış kaldı, da dedilär Petriyä hem öbür apostollara: «Kardaşlar, ne yapalım?»

³⁸ «Dönün günahlarınızdan Allaha, da herkeziniz vaatiz olsun İisus Hristozun adına günahlarınızın baaşlanması için, sora kabledeceniz Ayoz Duhun baaşışını, – dedi Petri. –

³⁹ Bu adamak sizin için, sizin uşaklarınız için hem hepsi uzakta olannar için, herkez için, kimi bizim Saabi Allahımız çaaracek».

⁴⁰ Hem çok taa başka laflarlan şaatlık etti onnara hem yalvardı, deyeräk: «Kurtarınız kendinizi bu sapık boy insandan».

⁴¹ Hepsi, kim kabletti onun nasaadını, vaatiz oldular, da o gün kliseyä ekleşti bir üç bin kişi.

İnancıların yaşaması

⁴² Onnar herzaman çalışardılar apostolların üürenmeklerindä bir kardaş paydaşlıında. Barabar ekmek iyärdilär hem dua edärdilär.

⁴³ Herkezini bir korku sarmıştı. Apostolların elinnän yapılardı çok şaşmaklı işlär hem nışannar.

⁴⁴ Hepsi inancılar birerdä topluydular. Hepsini ortaklamıştılar.

⁴⁵ Satardılar kendi mallarını hem mülklerini, sora parasını payedärdilär herkezinä, nekadar lääzım.

⁴⁶ Her gün hepsi barabar toplanardılar Ayoz binaya hem evlerdä ekmek payedärdilär da sevinmäklän hem pak üreklän iyärdilär.

⁴⁷ Allahı metinnärdilär hem hepsi insandan beenilmiştilär. Saabi her gün eklärdi eni kurtulannarı onnarın sayısına.