Yaptıklar 19 - Enі Baalantı

Efes kasabasında

¹ Açan Apollos Korinf kasabasındaydı, Pavli geçti iç dolaylardan da geldi Efes kasabasına. Orada buldu birkaç üürenici.

² O sordu onnara: «Kablettiniz mi Ayoz Duhu, açan inandınız?» Onnar cuvap ettilär: «Biz hiç işitmedik Ayoz Duh için».

³ Ozaman sordu: «E ne vaatizliklän vaatiz oldunuz?» Onnar cuvap ettilär: «İoanın vaatizliinnän».

⁴ Pavli dedi: «İoan vaatiz edärdi onnarı, kim dönärdi günahlarından Allaha. O sölärdi insana, inansınnar ondan sora Gelenä, Ona, Kimä dener İisus».

⁵ İşidip bunu, vaatiz oldular Saabi İisusun adına.

⁶ Açan Pavli koydu ellerini onnarın üstünä, indi Ayoz Duh, da onnar başladılar başka dillerdä lafetmää hem prorokluk etmää.

⁷ Onnar hepsi bir oniki adamdı.

⁸ Sora girdi sinagoga içinä da üç ay insana korkusuz annadardı hem inandırardı Allahın Padişahlıını.

⁹ Ama çünkü bir boyu çetinnettilär üreklerini da inanmadılar, fena lafederäk insanın önündä Allahın yolunu, Pavli braktı onnarı, ayırdı kendi üürenicilerini da her gün lafedärdi Tiranın salonunda.

¹⁰ Bölä tuttu iki yıla kadar. Ölä hepsi Asiyada, hem iudeylär, hem urumnar, işittilär Allahın sözünü.

¹¹ Allah yaptı görülmemiş kudretli işlär Pavlinin ellerinnän.

¹² Ona kadar, ani basmalar yada parçalar, neyä diimişti o, açan götürülüp koyulurdu hastalara, onnar alışardı hastalıktan hem fena duhlardan kurtulurdu.

¹³ Kimisi iudey büücülerdän, ani erdän erä gezärdilär, baktılar faydalanmaa Saabi İisusun adınnan, ki alıştırsınnar, kimdä vardı fena duh, deyeräk: «Emir ederim sizä İisusun adınnan, Angısını Pavli haberleer, dışarı çıkasınız».

¹⁴ Bunu yapardı Skeva adlı bir iudey büük popazın edi oolu.

¹⁵ Ama fena duh cuvap etti: «İisusu tanıyêrım, Pavliyi da bilerim, ama siz kimsiniz?»

¹⁶ O adam, kimdä vardı fena duh, atıldı onnarın üstünä da hepsini, üsteleyip, ölä ensedi, ani onnar çıplak hem yaralı kaçtılar o evdän.

¹⁷ Bu oluş için haber etişti hepsi iudeylerä hem urumnara, angıları yaşardılar Efes kasabasında. Bir korku hepsini aldı, da Saabi İisusun adı büük bir saygı kazandı.

¹⁸ Çoyu onnardan, kim inandı, gelärdilär, şaatlık edip, açardılar kendi kötü yaptıklarını.

¹⁹ Çoyu onnardan, kim büücülük edärdi, getirdilär kiyatlarını da yaktılar hepsinin önündä. Açan sayıldı kiyatların paası, çıktı elli bin gümüş.

²⁰ Bölä kuvetlän Allahın sözü daalardı hem kaavilenärdi.

Kalkınmak Efes kasabasında

²¹ Açan bu işlär oldu, Pavli kararladı, Makedoniya hem Ahaya erlerindän geçip, İerusalimä gitsin. O dedi: «İerusalimdän sora Roma kasabasını da göreyim giderim».

²² Onun yardımcılarından ikisini yolladı Makedoniyaya, Timofeyi hem Erastı, ama kendisi kaldı bir parça vakıt Asiyada.

²³ O vakıt oldu bir büük kalkınmak Saabinin yoluna karşı.

²⁴ Bir gümüş ustası, adı Dimitri, yapardı gümüştän Artemida ayoz binanın maketlerini, zanaatçıları bu iştän çok para kazandırardı.

²⁵ O topladı zanaatçıları hem hepsini, kim yapardı buna benzär işlär, da dedi onnara: «Arkadaşlar, bilersiniz, ani bizim zanaat kazanç bizä getirer,

²⁶ ama görersiniz hem işidersiniz, ani Pavli, diil sade Efes kasabasında, ama yakın bütün Asiyada çok insanı inandırıp-saptırdı, deyip, ani adam elinnän yapılı allahlar – diil hakına allahlar.

²⁷ Diil sade, ani bizim zanaat saygısı düşer, ama büük allahın, Artemidanın, ayoz binası da artık hiç bişey sayılmayacek. Onun büüklüü, angısını ikramnêêr bütün Asiya hem dünnä, yok olacek».

²⁸ Bunu sesleyennär üfkeylän doldular da başladılar baarmaa: «Büüktür Efesli Artemida!»

²⁹ Bütün kasaba karıştı. İnsan tuttu makedoniyalıları, Gayı hem Aristarhı, Pavlinin yoldaşlarını da birliktä üüştülär teatru içinä.

³⁰ Pavli baktı çıksın insan karşısına, ama üürenicilär kolvermedilär.

³¹ Asiyanın öndercilerindän, kim Pavliylän dosttu, haber yolladılar, yalvarıp gösterilmesin teatruda.

³² Kimisi baarardı bir türlü, başkası – başka türlü. Zerä toplantı bir alak-bulaktı, çoyu hiç bilmärdi, neçin toplandılar.

³³ Açan iudeylär karşıya çıkardılar Aleksandruyu, kimisi insandan sandılar, ani onun bu iştä var karışmalıı. Aleksandru elinnän nışan yaptı, ki isteer korunmak için lafetmää.

³⁴ Ama annayıp, ani o iudeylerdän, hepsi bir seslän yakın iki saat baardılar: «Büüktür Efesli Artemida!»

³⁵ Kasabanın sekretarı uslandırdı insanı da dedi: «Efeslilär! Acaba kim bilmeer, ani Efes kasabası büük Artemidanın ayoz binanın koruyucusu hem onun taşının, ani göktän düştü?

³⁶ Çünkü bunnarı kimsey inkär edämäz, lääzım uslanasınız da yapmayasınız bişey düşünmedään.

³⁷ Siz getirdiniz bu adamnarı, kim ne ayoz binayı soydu, ne dä allahımızı kötüledi.

³⁸ Ama Dimitrinin hem onun zanaat arkadaşlarının varsa daavaları birkimseyä karşı, bunun için var daava hem prokonsullar. Orada aalaşsınnar biri-birinä.

³⁹ Ama eer sizdä varsa başka bir neet, ozaman bu kararlanacek zakona görä toplanmakta.

⁴⁰ Büün kabaatlı olabiliriz bir kalkınmak için. Zerä yok bir dä sebep, ki gösteräbilelim, neçin bu karışmalık oldu».

⁴¹ Bu laflardan sora topluşu kolverdi.