Yaptıklar 17 - Enі Baalantı

Salonik kasabasında

¹ Amfipolis hem Apolloniya kasabalarından geçtiktän sora Pavli hem Sila geldilär Salonik kasabasına, neredä vardı iudeylerin sinagogası.

² Pavli, alışmasına görä, girdi sinagoga içinä da üç cumertesi onnarlan lafetti, okuyarak Ayoz Yazılardan.

³ Açıkladı da gösterdi onnara, ani Hristos lääzımdı zeetlensin da öldüktän sora dirilsin. «Bu İisus, Angısı için sizä haberleerim, O Hristos», – deyärdi o.

⁴ Kimisi onnardan, büük bir sürü urum, ani korkardılar Allahtan, hem anılmış karılardan birkaçı, inandılar da geçtilär Pavlinin hem Silanın tarafına.

⁵ Ama iudeylär, kim inanmadı, kıskanmaktan aldılar sokaklardan kimi yaramaz insannardan, oldu büük kalabalık, da debreştirdilär kasabayı. Üüştülär İasonun evinä, baktılar Pavliyi hem Silayı çıkarmaa insanın önünä.

⁶ Ama bulamadılar da sürüdülär İasonu hem taa birkaç kardaşı kasabanın zaabitleri önünä, baarıp: «Bunnar bulandırêrlar bütün dünneyi, şindi geldilär burayı da.

⁷ İason konaklaa kabletti onnarı. Hepsi karşı durêrlar Kesarın sımarlamasına. Deerlär, ani varmış bir başka padişah – İisus».

⁸ Bölä laflarlan iudeylär debreştirärdilär insanı hem kasabanın zaabitlerini.

⁹ Zaabitlär salverdilär İasonu hem öbürlerini salt ondan sora, açan para aldılar.

Veriya kasabasında

¹⁰ Gecä kardaşlar alatlan yolladılar Pavliyi hem Silayı Veriya kasabasına. Açan etiştilär orayı, girdilär iudeylerin sinagogalarına.

¹¹ Bunnar taa açık fikirliydilär, nekadar iudeylär Saloniktä. Onnar kablettilär Allahın sözünü büük havezlän. Her gün, aaraştırıp Ayoz Yazıları, bakardılar annasınnar, ölä mi, nicä sölener.

¹² Onnardan çoyu inandılar hem bir sürü urum karı-adam ii insannardan.

¹³ Ama iudeylär Salonik kasabasından, açan annadılar, ani Pavli nasaat eder Allahın sözünü Veriya kasabasında da, geldilär orayı karışmalık yapsınnar hem insanı debreştirsinnär.

¹⁴ Kardaşlar alatlan yolladılar Pavliyi deniz kenarına, ama Sila hem Timofey kaldılar Veriyada.

Pavli Afina kasabasında

¹⁵ Pavliylän gidennär onu geçirdilär Afina kasabasınadan. Sora döndülär geeri bir sımarlamaklan, ki Sila hem Timofey gitsinnär Pavliyä nekadar taa tez.

¹⁶ Pavli, beklärkän onnarı Afina kasabasında, duhunda derin bir acı duydu, görüp kasabayı, dolu idollan.

¹⁷ Sinagoga içindä lafedärdi iudeylärlän hem Allahtan korkan insannan. Meydanda lafedärdi her gün, kiminnän karşı gelärdi.

¹⁸ Kimisi Epikur hem Stoik filosoflarından onunnan atışmaa başladılar. Kimisi deyärdi: «Ne isteer sölesin bu boşuna lafedän?» Başkaları, işidip, ani o annadêr haberi İisus için hem Onun dirilmesi için, dedilär: «Allelem, o nasaat eder yabancı allahlar için».

¹⁹ Alıp götürdülär onu Areopaga da dedilär: «Var mı nicä üürenelim, nasıl eni üüretmäk sän nasaat edersin?

²⁰ Sän söleersin kimi fasıl işlär için. İsteeriz bilmää, bunnarın annaması nedir?»

²¹ Zerä hepsi Afinalılar hem kim orada yabancılardan bütün haylak vakıdı geçirip sölärdilär hem seslärdilär son eni haberleri.

Pavli Areopagda

²² Pavli durdu Areopagın ortasında da dedi: «Afinalılar! Bän görerim, ani her taraftan pek inancıysınız.

²³ Gezinip, baktım, neyä baş iildersiniz, uuradım bir kurbannık üstünä, neredä yazılı: „Bilinmeyän bir Allaha“. Bu Allahı, kimi siz bilmeyeräk ikramnêêrsınız, Onu sizä haberleerim.

²⁴ Bu Allah, Kim yarattı dünneyi hem hepsini, ne var, Odur, gökün hem erin Saabisi. O yaşamêêr adam elinnän yapılı yapılarda.

²⁵ Ona izmet etmää yoktur nicä adam elinnän, nicä açan Onun olur lääzımnıı bişey için. O Kendisi hepsi insana yaşamak, soluk hem hepsini, ne lääzım, verer.

²⁶ O bir insandan yarattı hepsi milletleri, yaşasınnar bütün er üstündä. Sıraladı belli vakıtları hem sınırları, neredä lääzım yaşasınnar,

²⁷ ki aarasınnar Allahı da, ellerinnän yoklayarak bulsunnar, makar ki Allah diil uzak bizdän.

²⁸ Biz Onda yaşêêrız, gezeriz, bulunêrız, nicä sizin peetçilerdän birisi dedi: „Biz dä Ondan çekileriz“.

²⁹ Öleysä, ki Allahtan çekileriz, düşmeer sanalım, ani Allah benzeer altına, gümüşä eki taşa, ani yapılmış adam fikirinnän hem becermesinnän.

³⁰ Allah koymêêr esaba bilmezlik vakıdı geçmiştän, ama büün hepsi insana hererdä sımarlêêr, dönsünnär Ona günahlarından.

³¹ Zerä O belli etti bir gün, nezaman daava kesecek dünneyä doorulaa görä bir Adamın aracılıınnan, Kimi O Kendi ayırdı. Ki inandırabilsin hepsi insanı, Onu diriltti ölüdän».

³² Ölüdän dirilmäk için işidip, onnarın kimisi başladı gülmää almaa, ama başkaları dedilär: «Bunun için sesläriz seni başka kerä».

³³ Butakım, Pavli çıktı onnarın arasından.

³⁴ Ama hep okadar kimisi, geçip onun tarafına, inandılar. Bunnarın arasında Dionisiy, Areopagın azası, bir karı, adı Damar, hem onnarlan başkaları da.