Yaptıklar 16 - Enі Baalantı

Timofey

¹ Sonda Pavli etişti Derviya hem Listra kasabalarına. Orada vardı bir üürenici, adı Timofey. Onun anası bir inancı karı iudeylerdän, ama bobası urumnardandı.

² Kardaşlar Listra hem İkoniya kasabalarından Timofeyi metettilär.

³ Pavli, çünkü istärdi onu alsın kendisinnän, yaptırdı ona kesiklik, iudeylerin beterinä, angıları yaşardılar orada, zerä hepsi bilärdi, ani onun bobası urum.

⁴ Geçeräk kasabalardan, onnar üürettilär kardaşları kayıl olsunnar karara, ne almıştılar apostollar hem presviterlär İerusalimdä.

⁵ Butakım kliselär kaavilenärdilär inanda, da gün gündän zeedelenärdi sayısı.

Pavlinin görümü Makedoniya için

⁶ Ayoz Duh brakmadı onnarı, nasaat etsinnär Allahın sözünü Asiyada, onuştan geçtilär Frigiya hem Galatiya erlerindän.

⁷ Etiştiynän Misiya sınırına, istedilär gitmää Vifiniyaya, ama İisusun Duhu izin vermedi.

⁸ Geçtilär Misiyadan da gittilär Troada kasabasına.

⁹ Pavli gecä gördü bir görüm. Bir adam Makedoniyadan, önündä durup, yalvarardı: «Geç Makedoniyaya da yardım et bizä».

¹⁰ Pavlinin görümündän sora biz hemen baktık gidelim Makedoniyaya, zerä annadık, ani Allah çaarêr bizi, ki orada annadalım İi Haberi.

Lidiya İi Haberi inanêr

¹¹ Yollanıp Troada kasabasından, biz üzdük gemiylän uz Samofrakiya adasına, ikinci günü etiştik Neapolis kasabasına.

¹² Ordan gittik Filip kasabasına, angısı Roma koloniyası Makedoniyanın ilk bölümündä. Bu kasabada durduk birkaç gün.

¹³ Cumertesi günü çıktık kasaba tokatlarından dışarı bir akarsu boyuna, neredä düşündük, bir dua eri var. Oturup orada, başladık lafetmää karılarlan, ani geldilär.

¹⁴ Allahtan korkan bir karı, adı Lidiya, kıp-kırmızı bez satıcısıydı Fiyatira kasabasından, seslärdi bizi. Saabi açtı onun üreeni, ki esap alsın Pavlinin laflarını.

¹⁵ O hem evdekileri vaatiz olduktan sora yalvarıp dedi bizä: «Eer beni inancı Saabiyä kabledirseniz, gelin evimä da kalın bendä». Da çevirdi bizi.

Pavli hem Sila kapanda

¹⁶ Bir sıra oldu, açan gidärdik dua erinä, karşı çıktı bizä bir izmetkär-kız, angısında vardı falcılık duhu. O falcılıınnan büük kazanç getirärdi çorbacılarına.

¹⁷ Takışıp Pavlinin hem bizim ardımıza, bu izmetkär-kız baarardı: «Bu insannar Pek üüsek Allahın çırakları, angıları haberleerlär sizä kurtulmak yolunu».

¹⁸ Bunu çok sıra yaptı. Pavli, bıkıp, üfkelendi, döndü da dedi fena duha: «İisus Hristozun adınnan deerim, çık ondan!» Fena duh çıktı o kıpımda.

¹⁹ Çorbacıları, görüp, ani kaybeldi kazançtan umutları, tuttular Pavliyi hem Silayı da sürüdülär merkez meydana, kasabanın zaabitlerinä,

²⁰ Verip onnarın elinä, dedilär: «Bu adamnar, iudeylär, debreştirerlär insanı bizim kasabada.

²¹ Onnar üürederlär adetleri, ne biz, romalılar, düşmeer kabledelim hem dä tamannayalım».

²² İnsan kalktı Pavliyä hem Silaya karşı. Zaabitlär, yırttırıp onnarın rubalarını, sımarladılar düüsünnär onnarı fışkannan.

²³ Pek kötü düüyüp, attılar sora onnarı kapana. Sımarladılar zından bekçisinä, ki baksın, ii korusun onnarı.

²⁴ Kabledip bu emiri, bekçi kapadı onnarı zındanın içyandakı bölmesinä da ayaklarını bukaalarlan kitledi.

²⁵ Yakın gecä yarısı Pavli hem Sila dua edärdilär hem Allahı metedärdilär, kapancılar da onnarı seslärdilär.

²⁶ Ap-ansızdan oldu ölä bir büük er tepremesi, ani zından sallandı temelädän. Birdän hepsi kapular açıldı, hepsi bukaalar çözüldü.

²⁷ Zından bekçisi uyandı, görüp zındanın kapularını açık, çıkardı kılıcını kendi-kendini öldürsün, çünkü sandı, ani kapancılar kaçtı.

²⁸ Pavli pek baardı: «Yapma kendinä zarar, zerä biz hepsimiz buradayız!»

²⁹ Bekçi istedi şafk, kaçarak girdi içyanına, da titireyeräk düştü Pavlinin hem Silanın ayaklarına.

³⁰ Çıkarıp onnarı dışarı, dedi: «Çorbacılarım, ne düşer yapayım, ki kurtulayım?»

³¹ Onnar dedilär: «İnan Saabi İisus Hristoza da kurtulacan sän hem bütün senin evin».

³² Nasaat ettilär Saabinin sözünü ona hem hepsinä, kim onun evindäydi.

³³ O gecä bekçi alıp-yıkadı onnarın yaralarını, da osaat vaatiz oldu kendisi hem hepsi onun evdekileri.

³⁴ Pavliyi hem Silayı kendi evinä buyur etti, sofra onnara koydu da sevindi bütün evinnän, ani Allaha inandı.

Pavli hem Sila kolveriler

³⁵ Açan aydınnandı, zaabitlär yolladılar izmetçilerini, ani fışkan taşıyardı, desinnär: «Salver o adamnarı».

³⁶ Zından bekçisi söledi bunu Pavliyä da dedi: «Zaabitlär haber yolladılar, ki kolvereyim sizi. Onuştan çıkın şindi da gidin uslulukta».

³⁷ Ama Pavli dedi onnara: «Bizi, Roma vatandaşlarını, daavasız hepsinin önündä düüdülär fışkannan, sora kapadılar zındana, ama şindi bakêrlar, saklı salversinnär mi? Olmaz bölä, ko kendileri gelip-çıkarsınnar bizi».

³⁸ İzmetçilär söledilär bu lafları zaabitlerä. Zaabitlär korktular, işidip, ani onnar Roma vatandaşlarıymış.

³⁹ Geldilär, afetmäk istedilär, çıkardılar kapandan da, yalvarıp onnara, dedilär gitsinnär kasabadan.

⁴⁰ Pavli hem Sila, çıkıp zındandan, gittilär Lidiyanın evinä. Orada görüştülär kardaşlarlan, girginnettilär onnarı, sora yola gittilär.