Yaptıklar 14 - Enі Baalantı

İkoniyada

¹ İkoniya kasabasında hep butürlü oldu. Pavli hem Varnava girdilär iudey sinagogasına da lafettilär ölä, ani inandı çok insan iudeylerdän hem urumnardan.

² Ama o iudeylär, angıları inanmadılar, debreştirdilär tayfännarı da çevirdilär onnarın üreklerini kardaşlara karşı.

³ Hep okadar çok vakıt kalıp orada, lafettilär kıyışmaklan Saabi için, Angısı inandırırdı sözü Kendi iivergisi için da verirdi kuvet, onnarın ellerinnän yapılsın meraklı nışannar hem şaşmaklı işlär.

⁴ İnsan kasaba içindä bölündü. Kimisi iudeylerin, kimisi apostolların tarafındaydı.

⁵ Tayfännar hem iudeylär zaabitlerinnän bilä neetlendilär zeetlesinnär da öldürsünnär taşlan apostolları.

⁶ Apostollar annadılar bunu da kaçtılar Likaoniya, Listra hem Derviya kasabalarına hem dolay erlerinä.

⁷ Bu erlerdä onnar annattılar İi Haberi.

Listrada hem Derviyada

⁸ Listra kasabasında vardı bir adam, sakat ayaklarından. O duumaktan hiç gezmemişti.

⁹ O, oturup erdä, seslärdi, ne söleer Pavli. Pavli baktı uz onun gözlerinä, gördü, ani onda var inan saa olmaa deyni,

¹⁰ da büük bir seslän ona dedi: «Sana deerim, Saabi İisus Hristozun adınnan, kalk ayakça!» O adam çabuk kalktı ayakça da başladı gezmää.

¹¹ İnsannar, görüp, ne yaptı Pavli, kaldırdılar bir büük ses da Likaon dilindä dedilär: «Allahlar indilär aramıza adama benzär!»

¹² Varnavaya ad koydular Zevs, ama Pavliyä Ermis, zerä bu lafetmeklerdä kullanıcıydı.

¹³ Zevsin ayoz binası bulunardı kasabanın hemen dışında. Zevsin popazı getirdi ayoz bina tokatlarına öküzleri hem feneţleri, isteyip insannan barabar kurban getirsin.

¹⁴ Ama apostollar, Varnava hem Pavli, işidip bunu, yırttılar kendi rubalarını korkudan, hızlandılar insan içinä da baardılar:

¹⁵ «Adamnar, neçin bunu yapêrsınız? Biz sizin gibi insanız. Biz sizä ii haber getireriz, ki dönäsiniz boşuna işlerdän diri Allaha, Ona, Kim yarattı gökü, eri, denizi hem hepsini, ne var onnarda.

¹⁶ Allah evelki vakıtlarda braktı, hepsi milletlär gitsinnär kendi yollarında.

¹⁷ Ama hiç durgunmadı şaatlık vermää kendisi için, zerä yaptı iilik, verdi yaamur göktän hem bereket, bolluktan imäk verdi hem sevindirdi üreklerinizi».

¹⁸ Bu laflarlan bilä hemen-hemen durgudabildilär insanı kurban getirmektän onnara.

¹⁹ Antiohiya hem İkoniya kasabalarından geldi birkaç iudey da, insanı kendi taraflarına çekip, düüdülär Pavliyi taşlan, sora sanarak, ani öldü, sürüdülär kasabadan dışarı.

²⁰ Ama Pavlinin üürenicileri toplandılar dolayına, da o, kalkıp, girdi kasaba içinä. İkinci günü Varnavaylan gittilär Derviya kasabasına.

²¹ Annattılar İi Haberi bu kasabada da edendilär çok üürenici. Sora döndülär geeri Listra, İkoniya hem Antiohiya kasabalarına.

Antiohiya kasabasına dönüş

²² Üürenicileri duhça kaaviledilär hem üreklendirdilär, ki inanda kalsınnar. Dedilär, ani lääzım çok acılardan geçelim, ki Allahın Padişahlıına giräbilelim.

²³ Herbir klisedä ayırdılar presviterleri, dua edip hem oruç tutup, verdilär onnarı Saabinin elinä, Angısına inandılar.

²⁴ Ondan sora geçtilär Pisidiyadan da etiştilär Pamfiliya erinä.

²⁵ Haberledilär Saabinin sözünü Pergä kasabasında, sora gittilär Attaliya kasabasına.

²⁶ Oradan gemiylän üzdülär Antiohiya kasabasına, neredä baştan verilmiştilär Allahın iivergisinä o iş için, ne şindi tamannadılar.

²⁷ Etişip orayı, topladılar kliseyi da annattılar hepsini, ne Allah yaptı onnarlan hem nicä açtı başka milletlerä inan kapusunu.

²⁸ Orada kaldılar üürenicilärlän çok vakıt.