Yaptıklar 12 - Enі Baalantı

Petri kurtulêr kapandan

¹ O vakıt padişah İrod tutturdu klisedän kimisini, neetlenip onnara kötülük yapsın.

² O kılıçlan öldürttü İakovu, İoanın kardaşını.

³ Görüp, ani iudeylär beenerlär bunu, ondan sora Hamursuz yortunun günnerindä tutturdu Petriyi dä.

⁴ Arestat ettirdiktän sora kapana kapattı. Koydu dört bölük asker, beklesinnär onu. Bölüklerdä vardı dördär asker. Neetlenärdi Paskellä yortusundan sora çıkarmaa onu insanın önünä daava için.

⁵ Petri bulunurdu bekçilik altında, kapanda. Ama klisä haşlak dua edärdi onun için Allaha.

⁶ O gecä, nezaman ertesi günü İrod lääzımdı çıkarsın onu daavaya, Petri uyuyardı iki asker arasında baalı iki sincirlän, bekçilär dä beklärdilär kapanın kapusunda.

⁷ Ansızdan Allahtan bir angil peydalandı, da bir şafk aydınnattı odayı kapanda. Angil dürttü Petriyi bir yanına da, uyandırıp onu, dedi: «Çabuk kalk!» Sincirlär birdän düştülär onun ellerindän.

⁸ Angil dedi ona: «Kuşan hem gii ayak kaplarını!» O ölä dä yaptı. Sora angil dedi: «Gii üst rubanı da gel benim ardıma!»

⁹ Petri dışarı çıktı, gidip onun ardına, annamayarak, ani, ne yapêr angil, bu hakına aslı. O sanardı, ani görünmäk görer.

¹⁰ Açan geçtilär ilk hem ikinci bekçilii, etiştilär demir tokatlara, ani çıkêr kasaba içinä. Tokatlar kendiliindän açıldılar önnerindä. Onnar çıktılar da geçtilär bir sokak. Sora angil birdän yok oldu onun yanından.

¹¹ Açan Petri geldi kendinä, dedi: «Şindi bän hakına görerim, ani Saabi yolladı angilini da kurtardı beni İrodun elindän hem hepsi belalardan, ne beklärdi iudey insanı, ki olsun benimnän».

¹² Annayıp, ne oldu, o gitti Mariyanın evinä, angısı İoanın – Mark denilenin – anasıydı, kimdä çoyu toplanmıştılar da dua edärdilär.

¹³ Açan Petri urdu dışankı tokatlara, çıktı bir izmetçiyka, adı Roda, ki baksın, kim urêr.

¹⁴ Açan tanıdı Petrinin sesini, sevinmeliktän açmadı tokadı, ama kaçarak gitti da söledi, ani Petri durêr tokatlarda.

¹⁵ Onnar dedilär ona: «Sän deli miysin?» Ama o bakardı annatsın, ani söledikleri aslı, onuştan onnar dedilär: «Bu olmalı onun angili».

¹⁶ Bu vakıt Petri hep urardı tokatlara. Açan açtılar, görüp onu, daptur geldilär.

¹⁷ Petri yaptı elinnän nışan, ki sussunnar. Sora annattı, nicä Saabi çıkardı onu zındandan, da dedi: «Söleyiniz İakova hem kardaşlara bu oluşlar için». Sora kendisi çıktı da gitti başka erä.

¹⁸ Açan aydınnandı, askerlerin arasında bir büük kaçınmak oldu, bakardılar annasınnar, ne oldu Petriylän.

¹⁹ İrod aarattı onu hererdä, da, açan bulamadı, bekçileri soruşa çekti da sımarladı, öldürülsünnär. Sora kendi gitti İudeyadan Kesariya kasabasına da orada kaldı.

İrod öler bir çirkin ölümnän

²⁰ İrod pek üfkeliydi Tir hem Sidon kasabasından insana. Onnar, annaşıp, geldilär İrodlan görüşmää. Kendi tarafına çevirdilär Vlastı, ani bakardı padişahın binasını. İstedilär barışmak yapmaa, zerä onnarın memleketi beslenärdi padişahın memleketindän.

²¹ Bir koyulmuş gündä İrod giidi padişah rubalarını, da, oturup padişah skemnesindä, başladı lafetmää insanın önündä.

²² İnsan baarardı: «Bu ses diil adamın, ama Allahın!»

²³ Saabidän bir angil hemen birdän çarptı onu, zerä o yapmıştı, ki metinnesinnär onu, ama diil Allahı. Onu kurtlar idi, da o öldü.

²⁴ Ama Allahın sözü her tarafa daalardı hem ilerlärdi.

²⁵ Varnava hem Saul, izmetlerini tamannadıktan sora, döndülär İerusalimdän geeri, alıp kendilerinnän İoanı, angısına deniler Mark.