Yaptıklar 11 - Enі Baalantı

Petrinin doorulanması İerusalimdä

¹ Apostollar hem İudeyanın her tarafından kardaşlar işittilär, ani yabancılar da kablettilär Allahın sözünü.

² Da açan Petri İerusalimä döndü, kesiklik taraflıları takazaladılar onu

³ da dedilär: «Sän gitmişin kesiksiz olannarın evinä da imäk imişin onnarlan barabar».

⁴ Petri, baştan başlayarak, onnara hepsini sıravardır söledi da dedi:

⁵ «Bulunurdum İoppiya kasabasında. Dua vakıdı gözlerim döndü da gördüm bir görünmäk. Göktän inärdi nesä, ani benzärdi büük bir çarşafa, ani sarkıdılardı dört köşesindän. Geldi benim yanıma kadar.

⁶ Gözlerimi çarşafa dikip, islää baktım. Gördüm dört bacaklıları, canavarları, sürünenneri hem gök kuşlarını.

⁷ Da işittim bir ses, ani dedi bana: „Petri, kalk, kes da i!“

⁸ Ama bän cuvap ettim: „Olmaz, Saabi, hiç bir vakıt bişey mındar hem diil pak girmedi aazıma“.

⁹ Ama ses göktän ikinci sıra dedi bana: „Ne Allah pakladı, onu sayma mındar“.

¹⁰ Bölä oldu üç sıra. Sora hepsi enidän alındı gökä.

¹¹ Taman o vakıt üç adam, yollanılan Kesariyadan bana, durgundular evin önündä, neredeydik biz.

¹² Ayoz Duh bana dedi gideyim onnarlan, hiç şüpelenmeyeräk. Bu altı kardaş geldilär benimnän, bilä girdik o adamın evinä.

¹³ O söledi bizä, nicä görmüş angili, angısı onun evindä peydalanmış da demiş ona: „Yolla İoppiya kasabasına da teklif et Simonu, angısına deniler Petri.

¹⁴ O söleyecek sana sözleri, neylän sän kurtulacan hem hepsi senin evin“.

¹⁵ Açan başladım lafetmää, onnarın üstünä indi Ayoz Duh, nicä dä baştan indi bizim üstümüzä.

¹⁶ Ozaman aklıma getirdim Saabinin sözlerini: „İoan vaatiz etti suylan, ama siz vaatiz olacenız Ayoz Duhlan“.

¹⁷ Çünkü Allah verdi onnara hep ölä baaşışı, nicä dä bizä, kim inandı Saabi İisus Hristoza, bän kimim, ki Allaha karşı durayım?»

¹⁸ Sesleyip bu lafları, onnar uslandılar da metinnedilär Allahı, deyip: «Görüner, ani tayfännara da Allah verdi kolaylık, dönsünnär Ona günahlarından da yaşamak edensinnär».

Varnava hem Saul Antiohiya kasabasında

¹⁹ Onnar, ani daalıştıydılar koolamak vakıdında, Stefanın öldürülmesindän sora, gittilär erdän erä Finikiya, Kipru hem Antiohiyaya kadar, haberleyeräk Allahın sözünü salt iudeylerä.

²⁰ Ama onnardan kimi adamnar vardı Kiprudan hem Kirinedän, angıları gittilär Antiohiya kasabasına da lafettilär urumnarlan, annadarak ii haberi Saabi İisus için.

²¹ Saabinin eli onnarlandı. Çok insan inandılar da döndülär Saabiyä.

²² Onnar için haber etişti İerusalim klisesinä. Oradan yolladılar Varnavayı Antiohiya kasabasına.

²³ Açan o, gelip orayı, gördü Allahın iivergisini, sevindi da üreklendirdi hepsini, karar alıp, verilsinnär Saabiyä.

²⁴ Zerä Varnava ii bir adamdı, dolu Ayoz Duhlan hem inannan. Da çok insan ekleşti Saabiyä.

²⁵ Sora Varnava gitti Tars kasabasına, ki aarasın Saulu.

²⁶ Bulup onu, getirdi Antiohiya kasabasına. Bütün yıl onnar, kliseylän toplanıp, çok insan üürettilär. En ilkin Antiohiyada üürenicilerä «hristian» adı verildi.

Agav prorokluk eder aaçlık için

²⁷ Bu vakıt İerusalimdän Antiohiyaya geldilär proroklar.

²⁸ Onnardan birisi, adı Agav, kalkıp haberledi Ayoz Duhlan, ani olacek büük aaçlık bütün dünnedä, nicä da sora oldu imperator Klavdiyin vakıdında.

²⁹ Ozaman üürenicilär kararladı herkezi, kuvedinä görä, yollasın yardım kardaşlara, angıları yaşardılar İudeyada.

³⁰ Ölä da yaptılar. Varnavanın hem Saulun elinnän yolladılar bir yardım presviterlerä.