Tіta 3 - Enі Baalantı

Yap dooruluk

¹ İnancılara aklına getir, kullanıcılara hem zaabitlerä ön versinnär, onnarı seslesinnär da herbir ii işä hazır olsunnar.

² Kimseyi kötülämesinnär, kavga yapmasınnar, ama herbir iş üzerä yavaş hepsi insannarlan olsunnar.

³ Zerä biz kendimiz da, vakıdın birindä fikirsiz, seslämeyici hem şaşıktık. İzmet edärdik türlü hamellerä hem keflerä. Yaşardık kinniktä hem kıskançlıkta. Hepsi bizdän, biz dä biri-birimizdän azetmärdik.

⁴ Ama açan açıldı Allahın, bizim Kurtarıcının, iilii hem insana sevgisi,

⁵ O kurtardı bizi diil bizim dooru yaptıklarımız için, ama Kendi acıyannıınnan. Zerä O yıkadı bizi, enidän duudurarak hem enileyeräk Ayoz Duhlan,

⁶ Angısını zebilliktän döktü bizim üstümüzä Kurtarıcımız İisus Hristozlan,

⁷ ki biz Onun iivergisinnän dooru sayılalım da, nicä umutlanêrız, mirasçı diveç yaşamakta olalım.

⁸ Aslıdır bu söz, da bän isteerim, ani sän bunnarı kaavileyäsin, ki onnar, kim Allaha inandı, baksınnar kendilerini vermää ii işlerä, zerä bunnar ii hem faydalı adama.

⁹ Ahmak çekişlerdän hem senselä dizinnerindän, kavgalardan hem denkleşmeklerdän Zakon için sän sakın. Zerä bunnar faydasız hem boşuna iş.

¹⁰ İnsan bölennerdän, bir-iki azarlamaktan sora, yıraklan.

¹¹ Bil, ani onnar dooru yoldan saptılar hem günah yapêrlar, da kendi-kendilerinä daava ederlär.

Son selämnär

¹² Açan sana Artemayı yada Tihiki yollayacam, alatla gelmää bana Nikopolis kasabasına, zerä orada, düşündüm, kışlayım.

¹³ Advokat Zenayı hem Apollosu yollayaceykan yola, çalış, ki onnarın bişey için lääzımnıkları olmasın.

¹⁴ Ko bizimkilär dä üürensinnär kendilerini vermää ii işlerä da yardım etmää zorlukta olannara, ki meyvasız kalmasınnar.

¹⁵ Sana seläm yollêêr hepsi, kim benimnän bilä bulunêr. Selämnä onnarı, kim inanda bizi sever. Sizinnän hepsinizlän iivergi olsun. /Amin./