Romalılara 7 - Enі Baalantı

Zakondan azat

¹ Ne, bilmeersiniz mi, kardaşlar – lafederim onnara, kim biler Ayoz Zakonu – Zakonun var kuvedi adamın üstünä okadar vakıt, nekadar adam yaşêêr.

² Sözgelişi: Zakona görä evli karı baalı kocasınnan, nekadar vakıt kocası yaşêêr, ama eer kocası ölürseydi, karı boşanêr steonozluk zakonundan.

³ Ama okadar vakıt, nekadar kocası yaşêêr, eer başka bir adamnan yaşarsaydı, orospu sayılêr. Ama eer kocası ölürseydi, karı Zakondan boşanêr, da ozaman, eer başka adama evlenärseydi, orospuluk yapmêêr.

⁴ Hep ölä siz dä, kardaşlar, çünkü pay alêrsınız Hristozun güüdesindän, öldünüz Zakon için, ki baalanasınız başkasına – Ona, Kim ölüdän dirildi. Bu oldu, ki faydalı olalım Allahın izmetindä.

⁵ Zerä, yaşarkan tenimizä görä, günahker havezleri, Zakondan debreştirilmiş, işlärdilär bizim güüdemizin eklerindä, da yaptıklarımızın meyvası ölümdü.

⁶ Ama şindi, ölüp, boşandık o zakondan, angısınnan baalıydık, ki izmet edelim Allaha Duhun eniliinnän, diil bukvanın eskiliinnän.

Zakon açıklêêr günahı

⁷ Ne deyecez? Ayoz Zakon günahker mi? Olmaz! Buna karşı, o Zakon olmasaydı, biz günahı tanımayaceydık. Sözgelişi, bän bilmeyeceydim, nedir tamahlık, eer Zakon demeyeydi: «Tamahlanmayasın».

⁸ Ama günah, faydalanarak sımarlamaklan, bendä üzä çıkardı hertürlü tamahlık. Zerä neredä yok Zakon, orada günah ölü.

⁹ Bän vakıdın birindä diriydim, açan bilmärdim Zakonu. Ama açan peydalandı sımarlamak, günah dirildi, bän dä öldüm.

¹⁰ Sımarlamak, ani lääzımdı yaşamak versin, beni ölümä götürdü.

¹¹ Zerä günah, sımarlamaklan faydalanarak, aldattı beni da bununnan öldürdü.

¹² Ölä ki, hiç lafsız, Zakon – ayoz, sımarlamak da ayoz, dooru hem ii.

¹³ Ozaman ii bişey, çıkêr, bana ölüm getirdi? Olmaz! Ama günah, faydalanarak ii bişeylän, bana ölüm getirärdi, ki sımarlamaklan açılsın günah nekadar günahlı.

Günahlan düüşmäk

¹⁴ Hakına bileriz, ani Zakon duhça bişey, ama bän tendän bir insanım, satılı günaha çırak gibi.

¹⁵ Bilmeerim, ne yapêrım, zerä yapmêêrım, ne isteerim, ama yapêrım onu, nedän azetmeerim.

¹⁶ Ne yapêrım, bununnan kayıl diilseydim, bundan görüner, ki kablederim, ani Zakon ii.

¹⁷ Bundan tanınêr, ani artık bunu yapmêêrım bän, ama günah yapêr, ani bendä yaşêêr.

¹⁸ Bilerim, ani bendä, doorusu, benim tenimdä, yok iilik. Bendä var ii istemeklär, ama yok kuvet, yapayım ne ii.

¹⁹ Zerä iilik, ani isteerim yapmaa, yapmêêrım, ama kötülük, ani istämeerim yapmaa, onu yapêrım.

²⁰ Çünkü yapêrım, ne istämeerim, bunu yapan artık diil bän, ama günah, ani bendä yaşêêr.

²¹ Ölä ki, kendimdä bulêrım bir zakon, ani istärkän iilik yapmaa, kötülük bendä hazır durêr.

²² İçyankı adamdan hoşluk alêrım Allahın Zakonundan.

²³ Ama görerim benim güüdemin eklerindä bir başka zakon, ani düüşer zakona karşı, angısını kablederim fikirimnän, hem beni esir eder günah zakonunnan, ani işleer benim güüdemdä.

²⁴ Zavallıyım bän! Kim kurtarabilir beni bu güüdedän, ani ölümä götürer?

²⁵ Şükür ederim Allaha, Saabimiz İisus Hristos kurtarêr beni. Ölä ki, bän kendim fikirimnän izmet ederim Allahın Zakonuna, ama tenimnän izmet ederim günah zakonuna.