Romalılara 4 - Enі Baalantı

Avraamın inanı bizä örnek

¹ Ne deyecez bizim güüdeycesinä dedemizin Avraamın durumu için?

² Eer Avraam dooru sayılaydı kendi işlerinnän, ozaman vardır neylän üünsün insanın, ama diil Allahın önündä.

³ Zerä Ayoz Yazı ne deer? «Avraam inandı Allahı, da bu ona dooruluk sayıldı».

⁴ Kim işleer, ödeeni saymaz baaşış, ama sayêr hak.

⁵ Kim kendi işlerinä umutlanmêêr, ama inanêr Ona, Kim allahsızı dooru sayêr, inannan ona dooruluk sayılêr.

⁶ David dä mutlu sayêr onu, kimi Allah, bakmayarak yaptıklarına, dooru sayêr. O dedi:

⁷ «Odur mutlu, kimin zakonsuzluu afedildi hem günahları örtüldü!

⁸ Ne mutludur o adam, kimin günahlarını Allah esaba koymayacek!»

⁹ Bu mutluluk sade kesikli olannar için mi osa kesiksiz olannar için dä mi? Biz deeriz: «Avraam kendi inanınnan dooru sayıldı».

¹⁰ Nezaman dooru sayıldı? Kesikliktän öncä mi osa kesikliktän sora mı? Diil kesikliktän sora, ama kesikliktän öncä.

¹¹ Kesiklik nışanını kabletti nicä dooruluk mühürü. Dooruluu inannan edendi, taa kesikli olmadıynan. Ölä ki, o oldu hepsi kesiksiz inancıların bobası, ki onnar da dooru sayılsınnar deyni.

¹² Hem kesikli olannarın da bobası oldu, kim diil sade kesikli, ama bobamızın Avraamın izlerindän giderlär, angısı inanardı, taa kesikli olmadaan.

İnannan adamak edeniler

¹³ Zerä Zakonnan verilmedi adamak Avraama hem onun uşaklarına, ki dünneyi elä alsınnar, ama dooruluklan, ani edeniler inannan.

¹⁴ Eer mirasçılık olaydı salt onnara, kim Zakonu tutêr, ozaman inan boşuna kalaceydı, adamak da faydasız olaceydı.

¹⁵ Zerä Zakon Allahın üfkesini getirer, ama neredä yok zakon, orada yok zakon basması da.

¹⁶ Onuştan adamak inana görä edenilir, ki Allahın iivergisindän tutunsun da butürlü kaavilensin Avraamın hepsi uşaklarına, diil sade onnara, kim Zakonu tutêr, ama hepsinä dä, kim inanêr Avraam gibi, angısı hepsimizin bobası.

¹⁷ Nicä var yazılı: «Seni, boba olasın çok milletlerä, yaptım». O Allahın önündä, Kimi inandı, hepsimizä boba oldu. Allah Odur, Kim dirilder ölüleri hem varlaa çaarêr onnarı, ne yok.

¹⁸ Umut yokkan, Avraam umutlandı hem inandı. Butürlü oldu çok milletlerin bobası, nicä Allah ona adamıştı: «Senin senselän okadar çok olacek, yıldızlar gibi».

¹⁹ Çünkü onun inanı yufkalanmadı, o bakmadı ölü gibi güüdesinä, ani yakın üz yaşındaydı, hem Sarranın uşaksızlıına.

²⁰ O Allahın adamasında ikilämedi hem inansız olmadı, ama inanı kaavilendi da Allahı metinnedi.

²¹ Bütün ürektän inandı, ani Allah ne adadı, hepsini tamannayabilir.

²² Onuştan o inanınnan dooru sayıldı.

²³ Diil salt Avraam için yazılı, ani «ona dooruluk sayıldı»,

²⁴ ama bizim için dä, ani dooru sayılacez, zerä inanêrız Ona, Kim diriltti Saabimizi İisusu ölüdän.

²⁵ İisus bizim günahlarımız için ölümä verildi hem bizim dooru sayılmamız için dirildildi.