Romalılara 2 - Enі Baalantı

Allahın dooru daavası

¹ Ölä ki, sana yok afetmäk, bey adam, kim dä sän olsan, eer maana bularsaydın. Zerä, başkasına maana bulurkan, kendi-kendini kabaatlandırêrsın, zerä sän, ani maana bulêrsın, kendin dä hep onu yapêrsın.

² Biz bileriz, ki bölä yapannara Allah dooru daava keser.

³ Bey adam, sän, ani bölä yapannara maana bulêrsın, ama kendin dä hep ölä yapêrsın, sanêrsın Allahın daavasından kurtulabilecän mi?

⁴ Osa paya koymêêrsın Allahın cömert iiliklerini, saburluunu hem çok dayanmasını? Bilmeersin, ani Allah iiliklerini uzadêr, ki seni günahlarından Kendisinä döndürsün?

⁵ Ama sän inatlaşêrsın da günahlarından dönmää istämeersin, onuştan Allahın cezasını o üfkeli daava günü için toplêêrsın. Ozaman Allahın dooru kararı görünecek.

⁶ O herkezinä kendi yaptıklarına görä ödeyecek.

⁷ Onnara, kim, dayma iilik yaparak, metinnik, ikram hem ölümsüzlük aarêêr, diveç yaşamak verecek.

⁸ Ama kim kendini sever, aslılıı seslämeer hem haksızlaa veriler, onnara üfkesini gösterecek hem bela verecek.

⁹ Hepsi, kim kötülük yapêr, öncä iudeylerin, sora urumnarın üstünä zeet hem sıkıntı gelär.

¹⁰ Buna karşı, hepsinä, kim iilik yapêr, öncä iudeylerä, sora urumnara, metinnik, ikram hem usluluk olacek.

¹¹ Zerä Allah kimseyä pay tutmaz.

¹² Kim, Ayoz Zakonu bilmeyeräk, günah yapêr, onnar, Zakona bakmayarak, telef olaceklar. Ama kim, Zakonu bileräk, günah yapêr, onnara Zakona görä dä daava olacek.

¹³ Zerä diil Zakonu işidennär Allahın önündä dooru, ama Zakonu tamannayannar dooru sayılacek.

¹⁴ Zerä o milletlär, kimdä yok Ayoz Zakon, duygularından Zakona görä yaşadıkça, onnar gösterirlär, ne lääzım hem diil lääzım yapılsın, makar ki Zakonu bilmeerlär.

¹⁵ Bununnan göstererlär, ani ne Zakon isteer, onnarın üreklerindä yazılı. Onnarın içyandan duyguları bunu dooruklêêr, fikirleri onnarı ya kabaatlandırêr, ya da dooru çıkarêr

¹⁶ o gün, açan İi Haberä görä, angısını bän nasaat ederim, Allah daava yapacek İisus Hristozlan insannarın saklı işlerinä.

İudeylär hem Ayoz Zakon

¹⁷ Sän, ani kendini iudey sayêrsın, umutlanıp Ayoz Zakona, Allahlan üünersin,

¹⁸ bilersin Onun istediini hem, Zakondan üürenmiş, annêêrsın, ne taa ii,

¹⁹ inanêrsın, ani köörları gezdiräbilirsin, karannıkta olannara aydınnık olabilirsin,

²⁰ akılsızları yola getiräbilirsin hem uşakları üüredäbilirsin, zerä Zakonnan etiştin bilginin hem aslılıın tamannıına.

²¹ Öleysä, nesoy sän, başkasını üürederäk, kendini üüretmeersin? Nasaat ederäk: «çalmayasın», kendin çalêrsın?

²² «Orospuluk yapma» söleyeräk, kendin yapêrsın? İdollardan azetmeyeräk, kendin ayoz binaları soyêrsın?

²³ Ayoz Zakonnan üünersin, ama Allahı aşaalêêrsın, zerä Zakonu basêrsın?

²⁴ Nicä var yazılı: «Sizin beterinizä Allahın adı milletlär arasında kötülener».

²⁵ Eer Ayoz Zakonu tamannarsaydın, elbetki kesikliin faydası var, ama eer Zakonu basarsaydın, kesiklik olêr, nicä dä kesiksizlik.

²⁶ Onuştan, eer kesiksiz adam Zakonun sımarlamaklarını tamannarsa, sayılmayacek mı o nicä kesikli?

²⁷ Kim güüdeycesinä kesiksiz, ama Zakonu tamannêêr, kabaatlandırmayacek mı seni, kimdä var Ayoz Yazılar hem kesiklik, ama basêrsın Zakonu?

²⁸ O diil iudey, kim dışandan ölä sade, hem o diil kesiklik, ne güüdedä nışannı sade.

²⁹ Ama hakına iudey o, kim içyandan ölä, hem hakına kesikli o, ani duhça ürektä kesikli, ama diil sade kiyat üstündä. Hakına iudey odur, kim diil insandan, ama Kendindän Allahtan metinni.