Romalılara 16 - Enі Baalantı

Maasuz istemeklär hem selämnär

¹ Tanıttırêrım sizä bizim kızkardaşı, Fivayı, angısı diakonisa Kenhreya klisesindä.

² Kabledin onu Saabinin adına, nicä yakışêr Allahın ayoz halkına. Yardım edin ona neylän zoru olacek, zerä o çoyuna hem bana kendimä yardımcı oldu.

³ Seläm Priskillaya hem Akilaya, benim kafadarlarıma İisus Hristozun işindä.

⁴ Onnar koydular kendi kafalarını, ki kurtarsınnar benim yaşamamı. Şükür ederim onnara, diil salt bän, ama hepsi kliselär, ani kuruldu başka milletlerdä.

⁵ Söleyin seläm kliseyä, ani toplanêr onnarın evindä. Seläm Epenetä, sevgili kardaşıma, angısı ilk inancı oldu Hristoza Asiya dolayında.

⁶ Seläm Mariyaya, angısı çok işledi sizin için.

⁷ Seläm Andronika hem İuniyaya, ani benim hısımnarım hem kapanda kafadarlarım. Onnar ii tanınêr apostolların arasında, onnar bendän öncä Hristoza inandılar.

⁸ Seläm Ampliyata, benim sevgili kardaşıma, ani inancı Saabiyä.

⁹ Seläm Urbana, ani bizim kafadarımız Hristozun işindä, hem Stahisä, benim sevgili kardaşıma.

¹⁰ Seläm Apellisä, Hristozun denenmiş işçisinä. Seläm Aristovulun evdekilerinä.

¹¹ Seläm İrodiona, benim hısımıma. Seläm Narkizin evdekilerinä, angıları inancı Saabiyä.

¹² Seläm Trifenaya hem Trifosaya, angıları çalışêrlar Saabinin izmetçiliindä. Seläm Persidaya, sevgili kızkardaşa, angısı çok çalıştı Saabinin izmetçiliindä.

¹³ Seläm Rufa, ani Saabinin seçilmiş izmetkeri, hem onun anasına, angısı bana da ana gibi oldu.

¹⁴ Seläm Asinkritä, Flegona, Ermesä, Patrovasa, Ermasa hem kardaşlara, kim onnarlan barabar.

¹⁵ Seläm Filologa hem İuliyaya, Nereyä hem onun kızkardaşına, Olimpana hem hepsinä Allahın ayoz halkına, ani onnarlan birerdä.

¹⁶ Söleyin seläm biri-birinizä, bir ayoz öpuşlän. Hristozun hepsi kliseleri sizä seläm yollêêrlar.

Korunun kavgadan

¹⁷ Kardaşlar, yalvarêrım korunun onnardan, kim ayırlanmak yapêr, köstek olêr hem karşı gider üüretmeyä, ani kablettiniz. Onnardan uzaklanın.

¹⁸ Zerä busoy insannar izmet etmeerlär Hristoza, bizim Saabiyä, ama kendi şkembelerinä. Tatlı sözlärlän hem yalpak laflarlan aldadêrlar saf üreklileri.

¹⁹ Sizin seslemeniz için hepsi işitti. Onuştan sevinerim sizin için, ama isteerim olasınız aarif iiliktä, ama bilgisiz kötü işlerdä.

²⁰ Allah, usluluk verän, tezdä ezecek şeytanı sizin ayaklarınız altında. İivergi Saabimizdän İisus Hristozdan olsun sizinnän. /Amin./

Sonsöz

²¹ Timofey, benim iştä kafadarım, hem Luţiy, İason hem Sosipater, benim hısımnarım, sizä seläm yollêêrlar.

²² Seläm yollêêrım Saabinin adına bän, Tertiy, ani yazıya geçirdi bu kiyadı.

²³ Seläm sizä Gaydan, kimdä bän konaklanêrım, hem bütün klisedän. Seläm sizä Erasttan, ani kasabanın haznatarı, hem seläm sizä kardaş Kvarttan. /

²⁴ Hayır olsun hepsinizlän Saabimizdän, İisus Hristozdan! Amin./

²⁵ Şindi metinnik olsun Allaha, Kim var nasıl kaavilesin sizi İi Haberä görä, İisus Hristos için haberä görä, ani nasaat ederim, çünkü bu saklılık açıldı, ani saklı tutuluydu sonsuz asirlerdän beeri,

²⁶ ama şindi belli oldu hem prorokların yazılarınnan, diveç Allahın buyurmasına görä, bildirildi hepsi milletlerä, ki seslesinnär hem inansınnar.

²⁷ Allaha, Kim biricik aarif, olsun metinnik İisus Hristozun aracılıınnan daymalardan daymalara! Amin.