Romalılara 14 - Enі Baalantı

Kaavi hem zayıf inan

¹ İi kabledin onnarı, kim inanda zayıf, ama sanmaklar beterinä çekişmeyin.

² Birisi inanêr, ani var nasıl imää hepsindän, ama zayıf olan iyer sade eşillik.

³ Kim iyer hepsindän, aşaalatmasın onu, kim imeer. Kim imeer, maanalamasın onu, kim iyer hepsindän, zerä Allah kabletmiş onu.

⁴ Kimsin sän, ani başkasının izmetkerinä maana bulêrsın? O izmetkeri dooru çıkarmaa eki kabaatlandırmaa – onun çorbacısının işi. O dooru çıkacek, zerä Allahın kuvedi var, onu dooru çıkarsın.

⁵ Birisi sayêr bir günü taa üstün öbür gündän. Taa başkası sayêr hepsi günneri birtürlü. Herkezi karar versin, neyi inanêr.

⁶ Kim günü gündän seçer, Saabi için ölä yapêr. /Kim günü gündän seçmeer, Saabi için seçmeer./ Kim iyer, Allah için iyer, zerä Allaha şükür eder. Kim imeer, Allah için imeer, o da Allaha şükür eder.

⁷ Kimsey bizdän yaşamêêr kendisi için, hem kimsey ölmeer kendisi için.

⁸ Yaşarsak, Saabi için yaşêêrız. Ölürsäk, Saabi için öleriz. Onuştan, yaşarız mı, öläriz mi, biz varız Saabinin.

⁹ Zerä Hristos onuştan öldü hem dirildi, ki çorbacılık etsin ölülerin hem dirilerin üstünä.

¹⁰ Neçin sän maana bulêrsın kardaşına? Neçin aşaalêêrsın kardaşını? Biz hepsimiz çıkacez Allahın daava skemnesinin önünä.

¹¹ Zerä yazılı: «Bän varım, deer Saabi, herbiri diz çökecek Benim önümdä, hem herbir dil açık şaatlık edecek, ani Bänim Allah».

¹² Ölä ki, hepsimiz cuvap verecek kendi için Allahın önündä.

Gücendirmeyelim bizim kardaşımızı

¹³ Onuştan maana bulmayalım biri-birimizä, ama taa ii, kararlayın yapmayasınız bişey, ani köstek olêr kardaşınıza eki onu günaha düşürür.

¹⁴ Bän bilerim hem çok inanêrım, nicä bir inancı Saabi İisusa, ani yok bişey diil pak kendi-kendinä. O iş diil pak sade onnara, kim sayêr onu diil pak.

¹⁵ Ama eer sän gücendirärseydin kardaşını imäklän, ozaman gezmeersin artık sevgilik yolunda. Yok etmä imäklän birkimseyi, kimin için Hristos öldü.

¹⁶ Kötülenmesin o, ne sän ii sayêrsın.

¹⁷ Zerä Gök Padişahlıı diil imäk hem içmäk, ama dooruluk, usluluk hem sevinmäk Ayoz Duhta.

¹⁸ Kim butürlü izmet eder Hristoza, beenilmiş Allahtan hem saygı kazanêr insandan.

¹⁹ Ölä ki, bakalım yapmaa, ne getirer usluluk hem duhça kaavilendirir biri-birimizi.

²⁰ Bir imäk için yıkma Allahın işini. Dooru sölemää, her imäk temiz, ama o adam kötülük yapêr, angısı imäklän köstek olêr başkasına.

²¹ İidir imeyäsin yaanı, içmeyäsin şarap hem korunasın hepsindän, ne köstek olêr senin kardaşına, /eki nedän o günaha düşer eki yufkalanêr/.

²² Var mı inanın? Koru onu kendin için Allahın önündä. Ne mutlu ona, kim kendini kabaatlamêêr, açan yapêr, ne sayêr dooru!

²³ Ama kim şüpeylän iyer, kabaatlı olêr, zerä imeer inannan. Ne inansız yapılêr, o günah.